Ижкар+8 °C
1 -тӥ коньывуон 2020 Покчиарня
18+

Историклэсь Карл Пономарёвлэсь удмурт калыклэн адӟонэз сярысь книгазэ поттӥзы Ижкарын

  • 410
  • 0
Ижкар / Удмуртия
Историклэсь Карл Пономарёвлэсь удмурт калыклэн адӟонэз сярысь книгазэ поттӥзы Ижкарын
Туспуктэм: Григорий Фомин

«Удмуртия» издательство истори тодосъя докторлэсь, профессорлэсь Карл Пономарёвлэсь «О судьбе удмуртского народа» книгазэ поттӥз. Кызьы вераз ивортодэтъя «Удмуртия» агентстволы ужъюртысь валтӥсь редактор Георгий Грязев, книгае тодосчилэн пӧртэм аръёсы пӧртэм изданиосын потэм статьяосыз огазеямын.

Карл Александрович Удмурт Элькунлы 100 ар тырмон азьын юри соосты люказ одӥг липет улэ-а, мар-а шуод ни но сыӵе книга кылдытӥз. Табере удмурт движенилы, удмурт культуралы статьяос, финн-угор движение сярысь малпанъёсыз, удмурт кылэз школаосын дышетон сярысь статьяос тани люкамын одӥг книгае
Георгий Грязев, «Удмуртия» издательстволэн валтӥсь редакторез

Статьяос пуштроссыя ньыль люкетэ огазеямын. Нырысетӥяз Ижкарын Удмурт клублэн кылдэмез, аслаз удмурт движение пыриськемез но кивалтэмез, со вакытысь шуг-секытъёс, кивалтӥсьёсын одӥг кыл шедьтон понна кызьы ужамзы сярысь вера.

«Удмуртиын нырысетӥосыз асьсэ огазеяськонзэс кылдытӥзы бигеръёс - Татарский общественный центр (ТОЦ). 16-тӥ толшоре 1988-тӥ арын Ижкарын Удмурт клуб кылдытэмын вал». (книгаысь чуръёс)

Книгалэн кыкетӥ люкетэз удмурт этнослэн азинскемезлы сӥземын.

Татын бадӟым саклык висъя со историезлы но: нырысетӥ съездысен кутскыса, со пӧртэм дунъет сётэ, солэсь кулэлыксэ, солэсь удмурт калыклэн историяз интыез сярысь, ваньзэ радъя со но возьматэ удмурт движенилэсь туала вакытэ кызьы азинскемзэ. Адӟе янгышъёссэ но, умой палъёссэ но, аслэсьтыз малпанъёссэ вера та пумысен
Георгий Грязев, «Удмуртия» издательстволэн валтӥсь редакторез

Куинетӥ люкетаз Карл Пономарёв огъя финн-угор движение сярысь вера – Россиын но, кунгож сьӧрын но.

«15-16 куартолэзе 1992-тӥ арын Удмурт Элькунлэн шоркараз Ижкарын Росси Федерациысь финн-угор калыкъёслэн I ӧтчамзы ортчиз. Со дас одӥг ужкагазъёсты кутӥз. <…> Ӧтчамын Росси Федерациысь финн-угор калыкъёслэн ассоциацизы кылдытэмын. <…> Ӧтчам 1992-тӥ арын шуркынмонэ Сыктывкарын Финн-угор калыкъёслэсь дунневыл конгрессэс ортчытон сярысь пумкылъян кутӥз <…>» (книгаысь чуръёс)

Бичетлэн ньылетӥ люкетаз пӧртэм катъёс дасян бордын ужамез сярысь статьяос пыртэмын. Озьы ик удмурт кылэз школаосын дышетон сярысь вераськон мынэ.

Со, пӧртэм документъёс, пӧртэм лыдпусъёс вылэ чӧлсыкса, сыӵе анализ лэсьтэ, кызьы мынэ удмурт кылэз дышетон, кыӵе югдур удмуртлык шаерамы возиськонэн… <…> Адями ачиз тодосчи бере, солэн быгатонлыкез вань ӵошатыны, тӥни со 50-60 аръёсты басьтыса, 70-тӥоссэ но, 20-тӥ даурлэсь кутсконзэ но туала нуналэз басьтыса. <…> Со яраос ваньмыз поттэмын, усьтэмын и валэктэмын, мар бордын ужаны кулэ
Георгий Грязев, «Удмуртия» издательстволэн валтӥсь редакторез

Георгий Грязев чакламъя, та книга нырысь ик пайдалыко луоз историен тунсыкъяськисьёслы. Озьы ик кивалтӥсьёслы – соос син азязы пуктыны быгатозы, кыӵе янгышъёс лэсьтэмын вал пӧртэм аръёсы. Со валаны юрттоз, оло, кыӵе амалъёс быръёно кылдэм ужпумъёсты сэрттон-пертчон понна.

Издательствоысь валтӥсь редакторлэн кылъёсызъя, вуоно 10-20 аръёсы таӵе книга уз поты ни, дыр, «малы ке шуоно татын кышкатэк возьматэмын но усьтэмын удмурт движенилэн пӧртэм палъёсыз: урод палъёсыз но, умой палъёсыз но. Ваньмыз со сётэмын зэмлыкен <...>».

Уката но мыным пусйымон потӥз удмурт кылэз дышетон пумысен статьяосыз, малы ке шуоно Карл Александрович ачиз ужамын ас вакытаз калыкез дышетонъя министр луыса, соин ик со югдурез 50-60 арысен умой тодэ но, со аръёсты туала арен ӵошатыса, со лыдпусъёс вылын возьматэ, кыӵе югдур та удысын. Сюлэм висёнъёссэ усьтэ но дэмла сюресъёс, кызьы та ужпумысь потыны. Малпасько, таӵе кышкатэк-а, мар-а шуод верам, именно аргументированно верам, - со туж дуно потэ
Георгий Грязев, «Удмуртия» издательстволэн валтӥсь редакторез

«2000/01 – 2011/12 дышетскон аръёсы <…> удмурт кылэз дышетӥсь школаослэн лыдзы 408-ысен 261-ёзь кулэсмиз (147-лы_, нош дышетскисьёслэн 33 сюрс 131-ысь 17 сюрс 263-ёзь (15 сюрс 868 адямилы). <…> 1926-тӥ арын 99,1 процентэз удмуртъёс анай кылынызы удмурт кылэз лыдъяло ке вал, 2010-тӥ арын – 55,6 процентэз». (книгаысь чуръёс)

Георгий Грязевлэн верамезъя, Карл Пономарёв ачиз вань статьяосты люказ, книгаез 500 экземплярен ас коньдонэныз поттӥз. Валтӥсь тиражзэ лыдӟиськонниослы, школаослы кузьманы малпа, но мылкыд карисьёс сое издательстволэн вузкаронниысьтыз но шедьтыны быгатозы.

Книга 12 ареслэсь бадӟым лыдӟисьёслы чакламын. 



Наверх
Вниз