«Удмуртия» издательство истори тодосъя докторлэсь, профессорлэсь Карл Пономарёвлэсь «О судьбе удмуртского народа» книгазэ поттӥз. Кызьы вераз ивортодэтъя «Удмуртия» агентстволы ужъюртысь валтӥсь редактор Георгий Грязев, книгае тодосчилэн пӧртэм аръёсы пӧртэм изданиосын потэм статьяосыз огазеямын.
Карл Александрович Удмурт Элькунлы 100 ар тырмон азьын юри соосты люказ одӥг липет улэ-а, мар-а шуод ни но сыӵе книга кылдытӥз. Табере удмурт движенилы, удмурт культуралы статьяос, финн-угор движение сярысь малпанъёсыз, удмурт кылэз школаосын дышетон сярысь статьяос тани люкамын одӥг книгае
Статьяос пуштроссыя ньыль люкетэ огазеямын. Нырысетӥяз Ижкарын Удмурт клублэн кылдэмез, аслаз удмурт движение пыриськемез но кивалтэмез, со вакытысь шуг-секытъёс, кивалтӥсьёсын одӥг кыл шедьтон понна кызьы ужамзы сярысь вера.
Книгалэн кыкетӥ люкетэз удмурт этнослэн азинскемезлы сӥземын.
Татын бадӟым саклык висъя со историезлы но: нырысетӥ съездысен кутскыса, со пӧртэм дунъет сётэ, солэсь кулэлыксэ, солэсь удмурт калыклэн историяз интыез сярысь, ваньзэ радъя со но возьматэ удмурт движенилэсь туала вакытэ кызьы азинскемзэ. Адӟе янгышъёссэ но, умой палъёссэ но, аслэсьтыз малпанъёссэ вера та пумысен
Куинетӥ люкетаз Карл Пономарёв огъя финн-угор движение сярысь вера – Россиын но, кунгож сьӧрын но.
Бичетлэн ньылетӥ люкетаз пӧртэм катъёс дасян бордын ужамез сярысь статьяос пыртэмын. Озьы ик удмурт кылэз школаосын дышетон сярысь вераськон мынэ.
Со, пӧртэм документъёс, пӧртэм лыдпусъёс вылэ чӧлсыкса, сыӵе анализ лэсьтэ, кызьы мынэ удмурт кылэз дышетон, кыӵе югдур удмуртлык шаерамы возиськонэн… <…> Адями ачиз тодосчи бере, солэн быгатонлыкез вань ӵошатыны, тӥни со 50-60 аръёсты басьтыса, 70-тӥоссэ но, 20-тӥ даурлэсь кутсконзэ но туала нуналэз басьтыса. <…> Со яраос ваньмыз поттэмын, усьтэмын и валэктэмын, мар бордын ужаны кулэ
Георгий Грязев чакламъя, та книга нырысь ик пайдалыко луоз историен тунсыкъяськисьёслы. Озьы ик кивалтӥсьёслы – соос син азязы пуктыны быгатозы, кыӵе янгышъёс лэсьтэмын вал пӧртэм аръёсы. Со валаны юрттоз, оло, кыӵе амалъёс быръёно кылдэм ужпумъёсты сэрттон-пертчон понна.
Издательствоысь валтӥсь редакторлэн кылъёсызъя, вуоно 10-20 аръёсы таӵе книга уз поты ни, дыр, «малы ке шуоно татын кышкатэк возьматэмын но усьтэмын удмурт движенилэн пӧртэм палъёсыз: урод палъёсыз но, умой палъёсыз но. Ваньмыз со сётэмын зэмлыкен <...>».
Уката но мыным пусйымон потӥз удмурт кылэз дышетон пумысен статьяосыз, малы ке шуоно Карл Александрович ачиз ужамын ас вакытаз калыкез дышетонъя министр луыса, соин ик со югдурез 50-60 арысен умой тодэ но, со аръёсты туала арен ӵошатыса, со лыдпусъёс вылын возьматэ, кыӵе югдур та удысын. Сюлэм висёнъёссэ усьтэ но дэмла сюресъёс, кызьы та ужпумысь потыны. Малпасько, таӵе кышкатэк-а, мар-а шуод верам, именно аргументированно верам, - со туж дуно потэ
Георгий Грязевлэн верамезъя, Карл Пономарёв ачиз вань статьяосты люказ, книгаез 500 экземплярен ас коньдонэныз поттӥз. Валтӥсь тиражзэ лыдӟиськонниослы, школаослы кузьманы малпа, но мылкыд карисьёс сое издательстволэн вузкаронниысьтыз но шедьтыны быгатозы.
Книга 12 ареслэсь бадӟым лыдӟисьёслы чакламын.