Ижкар-3 °C
21 шуркынмон 2018 Вирнунал
16+

Удмуртиын малпам этнографи диктантэз 2018-тӥ арын арын инсьӧрын но гожтозы

  • 140
  • 0
Москва / Россиын
Удмуртиын малпам этнографи диктантэз 2018-тӥ арын арын инсьӧрын но гожтозы
Туспуктэм: Полина Уразова

Удмуртиын малпам «Бадӟым этнографи диктант» ӵектос инсьӧры потӥз. Этнографияя тодон-валанъёссэс Калыккуспо инсьӧр станциысь космонавтъёс но гожтозы. Со сярысь ивортӥз Россиысь Йӧскалык ужпумъёсъя федерал агентстволэн кивалтӥсез Игорь Баринов.

Ужрад арысь аре паськыта. Таяз ардэ диктантэз вань континентъёсын гожтозы, со пӧлын Россилэн Арктикаысь «Прогресс» станцияз, но ми соин гинэ ум дугдӥське: Роскосмос юрттэмен акци борды итӥсько МКС-ын ужась росси космонавтъёс
Игорь Баринов, Россиысь Йӧскалык ужпумъёсъя федерал агентстволэн кивалтӥсез

«Бадӟым этнографи диктант» акци туэ 2-тӥ шуркынмонэ ортчоз. Со понна быдэс Россиын 1 сюрс 600 пала нимысьтыз площадкаос усьтӥськозы. Тужгес трос сыӵе интыос ужалозы Удмуртиын (216), Чечняын (137) но Якутиын (102).

Диктантын 30 юанъёс луозы: 20 юан – ваньмызлы одӥг кадь но 10 юан – котькуд улосвыллэн аслаз. Ужез быдэстыны 45 минут сётӥське. Вань юанъёслы валэктон сётэм понна 100 балл басьтыны луэ.

Пусъём, таяз арын диктантэз акцилэн нимлыко сайтаз онлайн амалэн гожтон понна ньыль нунал висъяське.

Ужрадлы йылпумъянъёс лэсьтозы 12-тӥ толсурлы. Юанъёслы шонер валэктонъёсты но тужгес ӵем пумиськылӥсь янгышъёсты азьвылгес шараялозы – 10-тӥ шуркынмонэ.

Тодэ вайытом, «Бадӟым этнографи диктант» ӵектосэз Удмуртиысь йӧскалык политикая министерствоын малпазы. Пӧртэм калыкъёс сярысь тодон-валанъёсты эскерон ужрад Россиын нырысьсэ ортчиз 2016-тӥ арын. Нялтас вераса, со арын этнография диктантэз гожтӥсьёслэн лыдзыя Удмуртия кыкетӥ инты басьтӥз, тросгес вал Оренбург улосвылын гинэ.

2017-тӥ арын ужрад калыккуспо инлык басьтӥз. Диктант гожтон борды итӥськизы СНГ-е пырись кунъёс: Азербайджан, Армения, Казахстан, Белоруссия, Молдова, Кыргызстан, Таджикистан, Туркменистан, Узбекистан, озьы ик Абхазия но Лымшор Осетия. 2016-тӥ арын акцие Турция но Швейцария пыриськизы.

Таяз арын ӵектос нош ик калыккуспо луоз. Диктантэз радъяло Россиысь Йӧскалык ужпумъёсъя федерал агентство но Удмуртиысь Йӧскалык политикая министерство Россиысь Кунсьӧр ужъёсъя министерство, Россотрудничество но Роскосмос, Удмуртиысь калыкъёслэн ассамблеязы юрттэмен. Акцилэн тодосъя юрттӥсез Россиысь тодосъя академилэн Этнологияя но антропологияя Н. Н. Миклухо-Маклай институтэз.

ВАТСАН

2017-тӥ арын «Бадӟым этнографи диктантэз» 367 сюрс адями гожтӥз: 167 сюрсэз нимысьтыз площадкаосын но 220 сюрслэсь уноез онлайн амалэн. Россиын улӥсь калыкъёслэн историзы, лулчеберетсы, йылолъёссы сярысь тодонлыкъёссэс Удмуртиын 9 сюрслэсь трос адями эскериз. Кунъя диктант понна шоро-куспо балл 17,4 луиз (30 пӧлысь).

Наши партнеры

Наверх
Вниз