Ижкар-3 °C
21 шуркынмон 2018 Вирнунал
16+

10 сюрслэсь трос адями этнографияя тодон-валанъёссэ эскериз Удмуртиын

  • 267
  • 0
Ижкар / Удмуртиын
10 сюрслэсь трос адями этнографияя тодон-валанъёссэ эскериз Удмуртиын
Туспуктэм: Удмуртиысь тӧролэн но кивалтэтлэн пресс-службазы

Туннэ, 2-тӥ гудырикошконэ, Россиысь ваньмаз улосвылъёсын «Бадӟым этнографи диктант» калыккуспо ужрад ортчиз. Нимысьтыз дасям интыосы 300 сюрслэсь трос адями вуиз. Удмуртиын 222 площадкаосы 10 сюрслэсь трос адями лыктӥз. Сыӵе нырысь-валысь лыдпусэз шараязы ужрадэз радъясьёс.

Этнографияя диктант гожтыны тужгес трос интыос дасямын вал Ижкарын (31) но Сарапул ёросын (16). Валтӥсез площадка Удмуртиысь Калыкъёслэн эшъяськон юртсы луиз. Отын 133 адями диктант гожтӥз.
этнографияя диктантэз радъясьёс

Тестирование Удмуртиысь тӧролэн но кивалтэтлэн администрацизылэн кивалтӥсез Сергей Смирнов, элькунысь йӧскалык политикая министр Лариса Буранова, Кун Думаын Удмуртилэсь депутат Алексей Загребин, Удмуртиысь калыкъёслэн ассамблеязылэн кивалтӥсез Владимир Байметов пыриськизы. Озьы ик валтӥсь площадкае Кун Кенешысь депутатъёс, кивалтэтысь министръёс, мер огазеяськонъёслэн ёзчиоссы ӧтемын вал.

«Бадӟым этнографи диктант» Удмуртиысь калыкъёслэн эшъяськон юртазы

8 фото

Калыкъёслэн эшъяськон юртазы диктант гожтэмъёс пӧлын 100 но 97 балл басьтэмъёс вань.

Ужрад борды Удмуртилэн тӧроез Александр Бречалов но итӥськиз. Ижкарысь 91 номеро школаын дышетскисьёсын ӵош со экскурсиен ветлӥсь трамвайын диктант гожтӥз. Россиын но Удмуртиын улӥсь калыкъёслэн лулчеберетсыя, йылолъёссыя юанъёслы сизьыметӥ но укмысэтӥ классъёсын дышетскисьёс, кадетъёс но школалэн кивалтӥсез валэктонъёс сётӥзы. Трамвай асьме дыръя 11 часын вырӟиз, со вакытэ вань улосвылъёсын диктант гожтыны кутскизы. Трамвай Октябрь пролкаысен Металлургъёслэн городоказы но берен ортчиз. Кутсконаз ик пассажиръёс диктант гожтӥзы, собере Удмуртилэн тӧроеныз кенешизы.


Юанъёслы шонер валэктонъёсты но тужгес ӵем пумиськылӥсь янгышъёсты азьвылгес шараялозы – 10-тӥ шуркынмонэ. Нимаз йылпумъянъёсты - 12-тӥ толсуре. 

Тодэ вайытом, Удмуртиын малпам «Бадӟым этнографи диктант» ӵектос туэ инсьӧры потӥз. Этнографияя тодон-валанъёссэс Калыккуспо инсьӧр станциысь космонавтъёс но гожтӥзы.

Пусъём, кин ӧз быгаты «Бадӟым этнографи диктантэз» нимысьтыз радъям площадкаын гожтыны, солэн ужрадлэн нимлыко сайтаз онлайн амалэн тодон-валанъёссэ эскерыны луонлыкез вань. Туэ со понна ньыль нунал висъяське.

ВАТСАН

2018-тӥ арын ужрад куинетӥзэ ортчытӥське ни, кыкетӥ арзэ – калыккуспо инлыкен. Туэ 35 кунъёс итӥськизы. Диктантэз радъяло Россиысь Йӧскалык ужпумъёсъя федерал агентство но Удмуртиысь Йӧскалык политикая министерство Россиысь Кунсьӧр ужъёсъя министерство, Россотрудничество но Роскосмос, Удмуртиысь калыкъёслэн ассамблеязы юрттэмен. Акцилэн тодосъя юрттӥсез Россиысь тодосъя академилэн Этнологияя но антропологияя Н. Н. Миклухо-Маклай институтэз.

Наши партнеры

Наверх
Вниз