Ижкар+11 °C
18 -тӥ коньывуон 2021 Вордӥськон
18+

Можга ёросысь егитъёсты «Шудком» визьбурлыко шудонэ ӧтё

  • 592
  • 0
Можга / Удмуртия
Можга ёросысь егитъёсты «Шудком» визьбурлыко шудонэ ӧтё
Туспуктэм: Михаил Шустов

Можга карысь но Можга ёросысь удмурт егитъёсты «Шудком» визьбурлыко шудонэ ӧтё. 22-тӥ шуркынмонэ ортчоно ужрадэз «Шунды» огазеяськонлэн Можга ёросысь ёзэтэз радъя. Кызьы вераз ивортодэтъя «Удмуртия» агентстволы ёрос ёзэтлэн кивалтӥсез Надежда Сапожникова, шудонэз ортчытыны мылкыдын со доры Можгаысь педагогикая колледжын дышетскисьёс вазиськизы.

Нырысь ик, со али котькытын – Ижкарын но, Татарстанын но, трос ёросъёсын – ортчылэ. Соин ик ми медам бере кыле шуыса, ми но ортчытоно кариським. Кыкетӥез, мыным вазиськизы Можга педколледжысь студентъёс, милям потэ сыӵе шудон шуыса
Надежда Сапожникова, «Шунды» огазеяськонлэн Можга ёросысь ёзэтэзлэн кивалтӥсез

Радъясь верамъя, шудонэз ортчытыны солы асьсэос ик студентъёс юрттозы. Кылсярысь, юанъёсты дасян бордын Педагогикая колледжын дышетскись Пелагея Куликова но элькунысь егитъёслэн «Шунды» огазеяськонлэн ёзчиосыз тыршозы. Ваньмыз 50-лэсь ятыр юан луоз.

«Шудком» шудонын арлыдъя куронъёс ӧвӧл. Туннэ нуналлы педколлеждын дышетскисьёс куриськон сётӥзы ни. Надежда Сапожникова чакламъя, студентъёс сяна, ужрадэ ужась егитъёс но пыриськозы. Ваньмыз ог тямыс команда люкаськыны кулэ.

Тодэ вайытом, «Шудком» — «Что? Где? Когда?» но «60 секунд» выллем шудон. Удмуртиын ӵектос 2016-тӥ арын кутскиз. Ижкарын радъяськись пумиськонъёсы али 20-лэсь ятыр командаос пырисько ни. «Шудком» удмурт визьбур клублэсь валтӥсь кузьымзэ бӧрсьысь кык ар «Валамон-Паримон» команда утӥз.

Ватсалом, «Шудком» шудонъёс Пичи Пурга, Кияса но Балезино ёросъёсын ортчыло ни. 



Наверх
Вниз