«Бадӟым этнографи диктант» калыккуспо ужрадлэн нимлыко федерал юанъёслы валэктонъёсты шараязы. Акцие пыриськемъёс тодыны быгато, 30 юанъёс пӧлысь кудаз соос янгыш лэсьтӥзы, нош кӧняезлы шонер валэктон сётӥзы.
Пусъём, Удмуртиысь нимысьтыз площадкаосын тодон-валанъёссэс эскерем муртъёс быдэсак вань диктантсэс эскерыны Калыкъёслэн эшъяськон юртсылэн нимлыко сайтаз 8-тӥ шуркынмонысен быгатозы. Ӵапак ӵуказе радъясьёс отчы улосвыл юанъёслы шонер валэктонъёсты интыялозы, вераз ивортодэтъя «Удмуртия» агентстволы акцилэн элькунъя координаторез Наталья Шергина.
Вань юанъёслы шонер валэктонъёс сётыса, 100 балл басьтыны луэ вал. Удмуртиын шоро-куспо балл 55,12 луиз, кунъя - 56,1. Россиысь йӧскалык политикаез, калыкъёслэсь йылолъёссэс тужгес умой тодэмзэс Уйпал Осетиын возьматӥзы – 75 балл. Соослэсь одӥг баллы Карачаево-Черкесия кылиз. 72 баллэн куинетӥ луизы Татарстанысь пыриськисьёс.
Ужрадэ пӧртэм арлыдъемъёс пыриськизы. Тужгес пичиез Санкт-Петербургын пусъемын – солы 5 арес. Тужгес арлыдоез диктантэз гожтӥсь – Москваысь 96 аресъем мурт.
Кунгож сьӧрын улӥсьёсын возьматэм тодонлыкъёсты эскерон мынэ на. Ужрадэ пыриськисьёслэн нима-нимаз ужъемышъёссы 12-тӥ толсуре тодмо луозы.
Тодэ вайытом, Удмуртиысь Йӧскалык политикая министерствоен кичӧлтэм «Бадӟым этнографи диктант» туэ 2-тӥ гудырикошконэ Россиысь ваньмаз улосвылъёсын ортчиз. Удмуртиын 222 площадкаосын диктантэз 10 сюрслэсь трос адями гожтӥз.