Ижкар+1 °C
13 -тӥ оштолэзь 2021 Пуксён
18+

«Удмурт Кенешлэн» Данъян книгаяз пыртэм муртъёсты сӥлы каризы Ижкарын

  • 539
  • 0
Ижкар / Удмуртия
«Удмурт Кенешлэн» Данъян книгаяз пыртэм муртъёсты сӥлы каризы Ижкарын

Туннэ, 8-тӥ шуркынмонэ, Ижкарын «Удмурт Кенешлэн» Пичи кенешаз огазеяськонлэн Данъян книгаяз пыртэм муртъёсты сӥлы каризы.

Трос аръёс ӵоже удмуртлыкез калыке пыӵатэмзы, сям-йылолъёсты но лулчеберетэз утемзы понна Вань удмуртъёслэн огазеяськонзылэн исполкомез пуктэмъя Данъян книгае вить адямиез пыртӥзы:

  • Геннадий Корепанов – Удмуртиысь лулчеберет удысысь дано ужась, ужбергатӥсь, «Удмурт Кенеш» огазеяськонлэн исполкомезлэн ёзчиез;
  • Юрий Перевозчиков – «Удмурт Кенеш» огазеяськонлэн Шаркан ёросысь ёзэтэзлэн азьвыл кивалтӥсез, Ёрос кенешлэн правлениезлэн ёзчиез;
  • Елена Смирнова – Алнаш ёросысь Чем-Куюк шоръёзо школаысь удмурт кылъя но литературая дышетӥсь, Ёрос кенешлэн ёзчиез;
  • Геннадий Шубин – «Удмурт Кенеш» огазеяськонлэн Вавож ёросысь ёзэтэзлэн кивалтӥсез;
  • Наталия Перевощикова – Можга карысь «Октябрь» культура юртлэн чеберлыкъя кивалтӥсез, удмурт кырӟанъя «Ингур» калык ансамбльлэн кивалтӥсез.

Кызьы вераз журналистъёслы Наталия Перевощикова, «Удмурт Кенешлэн» Данъян книгаяз пыртэмзы сярысь со толон ӝытазе гинэ тодӥз, соин ик мылкыдыз «йыромемынгес ай».

Со туж бадӟым дунъет мон понна, малы ке шуоно быдэс улонме удмурт калык понна тыршисько кадь потӥсько ни, туж гажаса, сӥлы карыса, асьме Можга карысь но ёросысь, мукет ёросъёсысь но удмурт калыкен тодматыны турттыса. <…> «Выль» праздник но кылдытӥмы удмуртъёсмылы. Тани 15-тӥ пол ортчиз ни та арын. Элькун шулдыръяськон луиз ини со милям. Культура юртмылэн гинэ нимыныз кутскимы вал, собере ёроскуспо луиз, табере шаермылы тодмо луиз ини. Соин ик шумпотӥсько, тау, кин сое адӟиз, кин дунъяз
Наталия Перевощикова, «Удмурт Кенешлэн» Данъян книгаяз пыртэм мурт

Шаркан ёросын дышетон, лулчеберет но кивалтон удысын ужатозяз удмуртлыкез утён сярысь ялан сюлмаськиз Юрий Перевозчиков но. Умоен верам кылъёс котьку шумпотто, но тазьы дунъян егитъёслы кулэгес, соосты со эшшо ӟечгес ужаны бурдъясал, шуиз воргорон журналистъёслы.

Мон малпасько, егитъёссэгес утчано вал, кин али бугыртэ. Милям туж трос сыӵе адямиос ёросамы: культура удысын, пиналъёсын ужасьёс пӧлын. Сыӵе адямиос, кудъёсыз али сюлэмзэс поныса ужало. Нош мон пенсие потӥ но, туж ик бызьса уг бызьылӥськы ни шуысал со удысын. Ужаку, может, маке лэсьтӥськиз но, сое, может, адӟизы, тодазы ваизы
Юрий Перевозчиков, «Удмурт Кенешлэн» Данъян книгаяз пыртэм мурт

Пичи кенешын озьы ик Трокай Борисов нимо йӧскалык премиен пусъён ортчиз. 2018-тӥ арын сое Дэри ёрос администрацилэн тӧроезлэн воштӥсез – Гуртэз азинтонъя но гурт возёсъя управленилэн кивалтӥсез Валериан Никитин басьтӥз. 

Со сяна, Пичи кенешын «Удмурт Кенешлэн» исполкомезлэн, ёрос кенешъёслэн ужамзы сярысь вераськизы.



Наверх
Вниз