Ижкар+1 °C
13 -тӥ оштолэзь 2021 Пуксён
18+

Трокай Борисов нимо йӧскалык премиен пусъем Валериан Никитин: табере удмурт калык понна эшшо золгес ужаны кулэ

  • 612
  • 0
Ижкар / Удмуртия
Трокай Борисов нимо йӧскалык премиен пусъем Валериан Никитин: табере удмурт калык понна эшшо золгес ужаны кулэ

Вис карем бере Удмуртиын нош ик Трокай Борисов нимо йӧскалык премиез сётӥзы. 2018-тӥ ар понна мерлыко данъетэз Дэри ёрос администрацилэн тӧроезлэн воштӥсез – Гуртэз азинтонъя но гурт возёсъя управленилэн кивалтӥсез, экономика тодосъя кандидат Валериан Никитин басьтӥз.

Премиен пусъён «Удмурт Кенеш» огазеяськонлэн Пичи кенешаз 8-тӥ шуркынмонэ ортчиз.

Кызьы вераз Валериан Никитин журналистъёслы, йӧскалык премиен пусъемзы пӧртэм мылкыдъёсты бугыртӥз: паймон, шумпотон, возьдаськон.

Кӧня асьмелэн удмурт калыкмы, кудӥз действительно туж трос сётӥзы удмурт калыкез, удмуртлыкез возён понна, удмурт политикаен но кӧня ужась калык, соин ик мон пайми. Виноват кадь, малы монэ адӟиллям шуыса, <…> мукет ласянь, тоже валасько, эшшо золгес ужаны кулэ таре удмурт калык понна шуыса
Валериан Никитин, Трокай Борисов нимо йӧскалык премилэн лауреатэз

Валериан Никитин туала удмурт движениез кылдытыны кичӧлтӥсьёс пӧлын вал, 1997-2000 аръёсы «Удмурт Кенеш» огазеяськонлэн Дэри ёросысь ёзэтэныз кивалтӥз, али Азьвалтэтэзлэн ёзчиез луэ. Удмурт лулчеберетэн герӟаськем ужрадъёсы котьку мыло-кыдо пыриське.

Тодэ вайытом, Удмуртиын Трокай Борисов нимо премиен пусъёнэз выльдон сярысь пумкылъянэз туэ южтолэзе кутӥзы. Азьвыл сое удмурт лулчеберетъя «Дэмен» огазеяськон сётъя вал, но берло дыре данъямъёс сярысь ивортонъёс ӧз луылэ. Соин ик та ужез «Удмурт Кенеш» ас вылаз басьтӥз.

Удмурт калык туж ужась, азьланяз но сыӵе ик мед луоз, шуэ Валериан Никитин. Ужен юрттыны котьку уг луы, нош удмурт кылын вераськон кӧня ке буйгатэ.

«Тани пичи чиновник ке мон али шуиськом, лыкто ке, сразу валасько, кин удмурт, кин мукет национальностен, сразу вераськисько ни удмурт кылын, туж шумпото соос. Туж шумпото, удмурт кылын верасько соосын шуыса. Соос даже вунэто, мар курыны лыктӥзы, соос шуо: всё, ми валам, юрттыны уд быгатэ, тау, вераськид шуыса. Мон валасько, что удмурт кылмы уз быры, удмурт калыкмы уз быры, хозяйствоосмы но соин ик ужало», - вераз журналистъёслы Валериан Никитин.

Со вань улонзэ гурт возёс удысэн герӟаз. Кема аръёс ӵоже элькунысь одӥгеныз азинлыко возёсэн – Дэри ёросысь «Путь Ильича» колхозэн – кивалтӥз. Кылем даур пумын ай висъяськылӥз пудо вордон, ю нянь будэтон удысын выль ужан амалъёсты пыӵатыны тыршеменыз. Но ачиз Валериан Никитин аслэсьтыз ужамзэ сокем вылӥ дунъяны керпотэ.

Калык лэсьтэ. Калыкен вераськиськод, нуиськод но, сое ваньзэ калык лэсьтэ. Али тани Дэри ёросын но управлениын ужасько ке, отын сыӵе специалистъёс люкаськемын, кызьы соосын уд ужа! 12-тӥ арысен тани ужаськомы ни, одӥг колхозмы но ӧз куашка! Возиськом, быгатӥськом, валаськом. Мынам гинэ со уже ӧвӧл, ваньзэ лэсьто калык, адямиос, именно гуртын улӥсь ужасьёс. Соос валало, кызьы, мар лэсьтыны, ми кӧня ке валэктӥськом гинэ
Валериан Никитин, Трокай Борисов нимо йӧскалык премилэн лауреатэз

Гуртын ужан ноку капчи ӧй вал. Аслэсьтыз гуртын улӥсьлэсь гинэ ке потысал… Россиысь но быдэс дуннеысь политикаен но экономикаен герӟаськем ужпумъёс но элькунысьтымы пудо вордӥсьёс но ю нянь будэтӥсьёс вылын шуккиськытэк уг кылё. Эстӥськон тужгес кулэ вакытэ солэн дуныз шуак будӥзы, со дыре ик йӧллы дунъёс кулэсмизы. Озьы ке но, гуртоос ужало, шуэ Валериан Никитин. Солэн кылъёсызъя, 2018-тӥ арез но ёросысьтызы гурт возёсъёс умой ужъемышъёсын йылпумъялозы.

Россиын но, Удмуртиын но асьме кунын сиён-юон поттонлэсь кулэлыксэ туж валало, дотациос но тросгес сётыны кутско ни, шуэ Дэри ёрос администрацилэн тӧроезлэн воштӥсез – Гуртэз азинтонъя но гурт возёсъя управленилэн кивалтӥсез.

Берло аръёсты учконо ке, Удмуртиын ӵапак гурт возёс удыс ваньбур поттонэз арлы быдэ йылэтэ. Со дыре ик удысын уждун ваньмызлэсь ӧжыт лыдъяське. Туж трос коньдон выльдӥськонлы кошке, шуэ Валериан Никитин, нош сотэк возёс бырыны быгатоз.

Животдноводческий помещениосты ӧд ке выльды, ӧд ке выльды техникаез, технологиез – кылёд улонлэсь, секыт луоз азьланяз потыны. <…> Конешно, тросгес уксё тырысалзы ужасьлы, но вань экономический законъёс, кудӥзъя ум быгатӥське тросгес тырыны, яке куашкалом. Соин ик ваньзэ лыдӟыса-пертчыса, воштӥськонъёс мыно, технология воштӥське туж зол котькуд ар, соин ик дырыз дыръя ваньзэ лэсьтоно, басьтоно
Валериан Никитин, Трокай Борисов нимо йӧскалык премилэн лауреатэз

Солэн кылъёсызъя, туннэ Дэри ёросысь гурт возёс удысын ужасьёслэн шоро-куспо уждунзы 25 сюрс манетлэсь тросгес луыны быгатэ. Зэм, татын бадӟым промышленной предприятиос ужало.

«Милям бадӟым животноводческий промышленной производствомы вань – птицефабрикаос, свинокомлексъёс бадӟымесь, тепличный комбинат, соин ик 25-26 сюрс луэ ужасьлы быдэ. Со вераськод ке, опеть та пӧяз, шуо, сомында ум басьтӥське. Но кызьы уг басьто?! Вань хозяйствоос, кытын комбайнёръёс басьто тӧролэсь тросгес уждун, именно ужан дыръязы. Животноводствоын тоже - кин туж умой ужа, соос тросгес басьто», - пусъе Дэри ёросысь Гуртэз азинтонъя но гурт возёсъя управленилэн кивалтӥсез.

Уждунэз будэтон понна пайдалыко ужан амалъёсты шедьтыны но кутыны кулэ.

«Кин умой ужа, со интыяз уг сылы, со ачиз утча, ветлэ. Ми но управлениын ӧтьылӥськомы учёнойёсты, тодӥськомы ке кытын ке сыӵе выль технология луэ, потаськомы, люкаса гуртын ужасьёсты, ветлӥськомы возьматыны, асьмеос но ветлӥськом, дышетскиськом, вот озьы технологиез кутӥськом. Но, конешно, технологиез тодыса, учкыса гинэ сое сразу пыртыны уг луы. Трос луо ошибкаос, кудзэ тоже потыны кулэ. Отын дыр ортче кык ар, куинь ар, куать ар но ортче. Тани али рапсэн вырын кутскимы туж трос хозяйствоос, нош «Путь Ильича» сое 10 арлэсь больше выре ни, али только-только солэн умой пӧрмыны кутскиз. Нош каждоез лыктэ, малпа, али мон тоже кизё, рапс кидыс басьто но уксёен луо. Но вот озьы уг луы сразу, хотя вань специалистъёс, вань технология, вань техника - уг пӧрмы озьы гинэ», - вера Валериан Никитин.

Технологиосын ужаны быгатӥсь адямиослы кулэяськон но котьку бадӟым луэ. Валериан Никитинлэн верамезъя, Дэри ёросэ котькуд ар 20-лэсь трос ӧнерчиос лыкто, но ваньмыз ик уг кылё. Туала егитъёслэн трос уждун басьтэмзы но умой коркаын улэмзы потэ, нош уноезлэн гурт возёсъёслэн сое сётыны луонлыкъёссы ӧвӧл.

Ми сельхозакадемиен туэ люкаллямы вал студентъёсты <…> Дэри ёросысь <…> но вераським, мед лыктозы, кин именно кулэ – ветврачьёс кулэ, агрономъёс кулэ, тепличный комбинатын милям картошка кидысэн выро, «РусЕвропалант» шуиськом, отын тоже туж трос куронъёссы бадӟымесь - специалист кулэ, чтоб мед тодоз иностранный язык даже. Вот кыӵе технологиос ни али! Сыӵе туж бадӟымесь, туж зол тодӥсь специалистъёс кулэ
Валериан Никитин, Трокай Борисов нимо йӧскалык премилэн лауреатэз

Гурт возёсын техникаен ужасьёс но уг тырмо. Но кин кылемын, соослэн квалификацизы туж бадӟым, пусъе кивалтӥсь. Туннэ котькуд механизатор борды 2-3 пӧртэм техника юнматэмын. Тракторен кизем бераз адями комбайнэ пудо сиён дасяны, ю утялтыны пуксе. Толалтэ сое тупатъяса вуоно бусы ужъёс вакытлы дася.

Егит ӧнерчиослы ужаны кутскыкузы юрттэт сётон программаос элькунын вань, соос быдэсъясько, нош ёрос та ласянь номыр ӵектыны уг быгаты, шуэ Валериан Никитин.

Ёросын бюджетысь, жаляса вераны кулэ, ум быгатӥське туж трос ик юрттыны, малы ке шуоно милем сразу шуо: бюджет - дотационной, нош хозяйствоос – соос коммерческоесь, бюджетысь ум быгатӥське. Азьло луэ вал сётыны, вот али озьы. Соин ми быгатӥськом только ушъяны, кытын ке быгатӥськом, юрттыны, соос мед валалозы, мед дышетскозы, мед кылёзы ужаны шуыса
Валериан Никитин, Трокай Борисов нимо йӧскалык премилэн лауреатэз

Озьы ик со пусйиз, устолыко ӧнерчиослэсь кулэяськонзэс валась гурт возёсъёс асьсэос но трос лэсьтыны быгато. Кылсярысь, «Путь Ильича» возёс музъемзэ лэсьтӥськон улэ висъяз но ужасьёслы люкылӥз. Егитъёс отын одӥг-кык ар куспын коркаос пуктӥзы. Али мукетъёсыз соослэсь адӟем каро.

«Таре со сюресъя ик мынэ Азин нимо акционер огазеяськонмы. Ми тоже солы верам, верам, верам, со али тоже люкылоз участокъёс ужасьёсылы, специалистъёслы. Кин корка пуктӥз, соос кылёзы. Техникаен но, пилорамаен но, сюрес лэсьтыны, ву лэсьтыны юртто, кин маин быгатэ», - вераз Трокай Борисов нимо йӧскалык премилэн 2018-тӥ ар понна лауреатэз, Дэри ёрос администрацилэн тӧроезлэн воштӥсез – Гуртэз азинтонъя но гурт возёсъя управленилэн кивалтӥсез, экономика тодосъя кандидат Валериан Никитин.

Ватсалом, «Удмурт Кенеш» огазеяськонлэн Пичи кенешез Удмуртилэн кунлык нуналэзлы сӥземын вал. Удмурт автономи кылдэм дырысен 100 ар тырмонэз пусъёнлы дасяськон ужрадъёс сярысь улосвыл кивалтэтлэн тӧроез Ярослав Семёнов ивортон лэсьтӥз. Солэн кылъёсызъя, Ижкарын Удмурт лулчеберетъя центрлы ӵектос лэсьтонъя аукционэ куриськонъёсты кутон вуоно арняе йылпумъяське. Озьы ик Пичи кенешын «Удмурт Кенешлэн» Данъян книгаяз пыртэм муртъёсты сӥлы каризы. Нош кенешон кутскемлэсь азьвыл кенешчиос удмурт автономилы кутскон сётӥсьёслэн Иосиф Наговицынлэн, Трокай Борисовлэн но Кузебай Гердлэн синпелетъёссы дорысь сяськаос нуизы. 



Наверх
Вниз