Ижкар+18 °C
9 -тӥ куартолэзь 2021 Воскресенье
18+

Удмурт кыллэсь нуналзэ пусъёзы 27-тӥ шуркынмонэ

  • 933
  • 0
Ижкар / Удмуртия
Удмурт кыллэсь нуналзэ пусъёзы 27-тӥ шуркынмонэ
Туспуктэм: Руслан Нуриахметов

27-тӥ шуркынмонэ Удмуртиын но Москваын Удмурт кыллэсь нуналзэ пусъёзы. Праздник финн-угор азьветлӥсьёслэн «МУШ» ужан огинзы кичӧлтэмъя ортчоз, вераз ивортодэтъя «Удмуртия» агентстволы ужрадэз одӥгез радъясь Алексей Шкляев. 

Радъясь верамъя, Удмуртиын та нунал улсын тодосъя конференци, удмурт кылын фильм возьматон но удмурт кылэз азинтонъя ӵектосъёслы сӥзем неконференци чакламын.

Со удмурт кыл сярысь вань сюлмаськисьёслы усьтэм лекция. Сӥземын луоз кылъя кичӧлтонъёслы, кин кылэз улӟытонъя ӵектосъёс лэсьтэ, кылсярысь, «Шудком», кыӵе ке приложениос. Сыӵе вакчи докладъёс паськыт аудиторилы
Алексей Шкляев, Удмурт кылъя дунневыл нуналэз радъясь

Удмурт кыллэсь нуналзэ Москваын но пусъёзы. Со улсын Ольга Урасиновалэн «Введение в удмуртский язык» лекциез, удмурт кылбуретлэн ХХ даурын азинскемез сярысь кенешон но удмурт кыллэн Удмуртиын туала югдурез сярысь вераськон ортчозы.

Удмурт кыллэсь нуналзэ пусъён понна 27-тӥ шуркынмон юнме быръемын ӧвӧл. Ӵапак та нуналэ 2001-тӥ арын «Удмурт Элькунысь кун кылъёс но Удмурт Элькунын улӥсь мукет калыкъёслэн кылъёссы сярысь» кат юнматэмын. Соя удмурт кыл Удмуртиын кун кыл инлык басьтӥз.

Праздникез кичӧлтӥсьёс Удмурт кыллэсь нуналзэ интыосын радъяны мылкыд карисьёсты витё. Куриськон сётыны луоз info@udmurtkyl.ru электрон почтае.

Пусъем, удмурт кыллэсь нуналзэ юнматон сярысь вераськонъёс кемалась мыно ни. Удмуртъёслэн нырысетӥ ӧтчамзы дырысен 100 ар тырмонлы сӥзем конференциын Алабгоын но туэ со сярысь кенешизы но та ужпумез ужрадлэн резолюцияз пыртӥзы. 

Ватсалом, кичӧлтӥсьёслэн верамзыя, 28-тӥ шуркынмонэ Венгриысь Сегед карын удмурт кылэз дышетӥсьёсын пумиськон ӝыт ортчытыны малпало. 



Наверх
Вниз