Ижкар-7 °C
12 толсур 2018 Вирнунал
16+

Удмуртлыкез азинтон но вӧлмытон понна выль мер огазеяськон кылдыто Удмуртиын

  • 276
  • 0
Ижкар / Удмуртиын
Удмуртлыкез азинтон но вӧлмытон понна выль мер огазеяськон кылдыто Удмуртиын
Туспуктэм: vk.com ("КУАРА" огин)

Егит удмурт азьветлӥсьёс удмуртлыкез азинтон понна выль огазеяськон кылдыто. «Куара» огин удмуртъёс сярысь ӟечлыко но тунсыко материалъёсты вотэсын вӧлмытыны чакла. Ивортодэтъя «Удмуртия» агентстволы со сярысь вераз огазеяськонлэн кивалтӥсезлэн воштӥсез, Ижкарысь Кузебай Герд нимо йӧскалык гимназиысь дышетӥсь Артём Малинин.

Милям валтӥсь малпанмы - узырмытыны удмурт контентэз. <…> Соин ужмес вотэсын нырысь ик синйылтыны луоз, дыр. Но бӧрысь пӧртэм пумо ужрадъёс но ортчытъяны малпаськом. Кинлэн мылкыдыз вань, кин дась ужаны но удмурт кылэз вӧлмытыны, сое адӟымон но кылымон карыны, ӟечлыко, шонер, визьмо возьматыны - соослы ӧсъёс усьтэмын. Шумпотыса ужалом мукет огазеяськонъёсын, ӵектонъёсты но кенешез лыдэ басьтом
Артём Малинин, «Куара» огазеяськонлэн кивалтӥсезлэн воштӥсез

Выль огазеяськонлэн «ВКонтакте» вотэсысь огиназ нырысетӥ ужзы интыямын ни – «Тубат» ӵектосын кылосбур тодосъя кандидат Сергей Максимов удмурт кыл сярысь вера. Артём Малининлэн кылъёсызъя, ар пумозь эшшо 3-5 таӵе видеоматериалъёс луозы на.

Научно-популярной видео луыны кулэ. Малы ке шуоно удмурт кыл, лулчеберет, удмуртлык сярысь лад-лад но валамон материал али тырмыт ӧвӧл. <…> Озьы ик луыны кулэ калыкез шулдыртӥсь, серемес контент но, кудӥз тунсыко луоз егитъёслы, пиналъёслы, пӧртэмлыкез ӧвӧл, гуртын-а, городын-а соос уло
Артём Малинин, «Куара» огазеяськонлэн кивалтӥсезлэн воштӥсез

ТУБАТ. Сергей Максимов удмурт кыл сярысь вера


Артём Малининлэн верамезъя, котькуд мылкыд карись вотэсысь огинын аслэсьтыз ӵектонъёссэ шараяны яке юрттэтсэ дэмланы быгатэ.

Ваньды, кинлэн вань малпанэз, мылкыдыз, шедьтыны быгатӥськоды «Вконтакте» вотэсбамысь огинэз но гожтыны милемлы, вераны, ма тӥледлы тунсыко но ма сюлэмшугъятэ. Со тунсыко но быдэстымон ке, ми со бордын ӵошен ужалом. Берло, оло, кыӵе ке гуртъёсын, районъёсын ёзъёс но кылдозы, кудъёсыз озьы ик медиапространствоын удмурт кыл сярысь, удмурт адямиос, асьсэлэн улонзы сярысь вералозы
Артём Малинин, «Куара» огазеяськонлэн кивалтӥсезлэн воштӥсез

Ватсалом, огинлэн нырысетӥ пумиськоназ «Куаралы» кивалтӥсе Чеберлыко киужъёсъя элькун центрысь ӧнерчиез Владислав Степановез бырйизы. Али коммерци луисьтэм огазеяськонлэн уставез бордын ужало, вуоно арлы ужпумъёс пукто.

Наши партнеры

Наверх
Вниз