Ижкар-24 °C
6 -тӥ толсур 2021 Вордӥськон
18+

«Удмурт нылкышно кенеш» огазеяськонлэн 25 ар тырмонэзлы сӥзем форум ортчиз Ижкарын

  • 750
  • 0
Ижкар / Удмуртия
«Удмурт нылкышно кенеш» огазеяськонлэн 25 ар тырмонэзлы сӥзем форум ортчиз Ижкарын
Туспуктэм: Майя Бывальцева

Туннэ, 18-тӥ толсуре, Ижкарын Калыкъёслэн эшъяськон юртазы «Удмурт нылкышно кенеш» «Анайлы сӥзьыса» улосвылкуспо форум ортчытӥз. Огазеяськонлэн 25 ар тырмонэзлы сӥзем ужрадэ 25 делегаци вуиз – Удмуртиысь каръёсысь но ёросъёсысь ёзэтъёслэн азьветлӥсьёссы, озьы ик Башкортостанысь удмурт нылкышноослэн «Эшъяськон тугоко» клубзылэн ёзчиосыз. 

Огазеяськонлэн тӧроез Надежда Степанова удмурт нылкышно движенилэн кутсконэз сярысь но тодэ вайытӥз, соку но али быдэстоно ужпумъёс сярысь вераз. Нырысетӥез конференци кылем даурысь 20-тӥ арын ортчем. Соку валтӥсез ужпум дышетонэн герӟаськемын вал.

20-тӥ арын, валамон ни, валтӥсь ужпум вал удмурт нылкышноосты выль совето власте кыскон, удмурт автономиез валче ужаны мед лэсьтом шуыса, нылпи садъёс отын кылдытъян. Самой бадӟым ужпум вал, дыр, нылкышноосты дышетон. 20-тӥ арын со делегатъёс пӧлысь укмысэз-а, мар-а гинэ… туж ӧжытэз вал дышетскемын удмуртъёс
Надежда Степанова, «Удмурт нылкышно кенеш» огазеяськонлэн тӧроез

Удмурт нылкышноослэн кыкетӥез конференцизы 70 аръёс ортчыса гинэ радъяськиз. 1993-тӥ арын солы кичӧлтон сётӥз «Удмурт кенешлэн» тӧроезлэн воштӥсез Нина Малых. Ӵапак отын кылдӥз «Удмурт нылкышно кенеш», но со кылдытэмын вал «Удмурт Кенеш» пушкын секция кадь гинэ.

Со вакытэ <…> Людмила Степановна Христолюбовалэн валтӥсь доклад ке лэсьтэмын, отын туж трос бытовой шуод-а, мар-а ужпумъёс. Кылсярысь, со вакытэ трос нылкышноос ужтэк кылемын вал, трос воргоронъёс юон вылэ чӧлскемын. Сыӵе секыт дыр экономика ласянь. Со семьялэн тазалыкез вылын но туж шӧдӥськиз. Соослэн одӥгез валтӥсь ужпумзы вал морально-психологической юрттэт сётон нылкышноослы. Со вакытэ со туж кулэ вал, дыр. Али но со, конешно, кулэ
Надежда Степанова, «Удмурт нылкышно кенеш» огазеяськонлэн тӧроез

Туала вакытэ «Удмурт нылкышно кенеш» бадӟымгес саклык висъя семьяын удмурт кылэз утён ужпумлы. Нош сое быдэстон ӵапак нылкышно, анай, бордысь потэ.

Анайлы сӥзьыса» нимамы форуммес, малы ке шуоно анайлэн позициез бордысь, анайлэн улон шоры учкемез бордысь, мон шуысал, ваньмыз потэ, ваньмыз со бордысь кутске. Валамон ини, отын семья, но куинь аресозь пиналэн анайгес пуке, соин ик анай кыл но анай, анайлэн улон шоры учкемез, мыным потэ, пуктыны луоно «равно» та кылъёс вискы
Надежда Степанова, «Удмурт нылкышно кенеш» огазеяськонлэн тӧроез

Нылкышно кенешлэн Дэбес ёросысь ёзэтэз удмурт кылэз нылпи садъёсын утён, пыӵатон ласянь сюлмаське. Пичи пиналъёс кыллы ӝог дышо но валало, азьланяз соослы капчигес луэ ни, шуэ черкогуртысь нылпи садын ужась Екатерина Касаткина.

Тани милям нылпи садын туж бадӟым уж нуиське со ужрадъя, милям котькуд ар ортче отын удмурт фестиваль, «Шундыпиос» нимаське кудӥз. Отчы быдэс районысь лыкто пиналъёс но возьмато быгатонлыксэс, кызьы соос быгато кырӟаны, вераськыны, мадиськыны удмурт кылын
Екатерина Касаткина, Дэбес черкогуртысь нылпи садын ужась

«Удмурт нылкышно кенешлэн» Вотка карысь ёзэтэныз 2006-тӥ арысен Галина Перевозчикова кивалтэ. Со ужазы егитъёсты кыскыны быгатымтэзы пумысен сюлмаськемзэ вераз: одӥгъёсыз нылпиоссэс нокинэн кельтыны шуо, мукетъёсыз ужзылэсь уг ӵыдо. Соин ик ужрадъёсазы арлыдоосгес люкаськыло, но соос нунокъёссэс сьӧразы ваё.

Ми асьмелэсь пичи нунокъёсмес ваиськом бордамы. <…> Отын ми лэсьтӥськомы ни мастер-класс, малы ке но киужъёслы дышетӥськомы. Нунокъёсмы витьыса уло ни со пумиськонъёсмес, шумпотыса витё, мар ке но опеть дышетозы, мар ке но опеть киужен кошкомы шуыса. <…> (Удмурт кылэз – ред.) валасьтэмъёсыз но вань, но соос кыло, соос адӟо. Может, куке будӥзы ке ай, дышозы но, валалозы но
Галина Перевозчикова, «Удмурт нылкышно кенешлэн» Вотка карысь ёзэтэныз кивалтӥсь

Галина Перевозчикова верамъя, соос огазеяськонлэн вань ӵектосъёсаз пыриськыны тыршо, кылсярысь, «Меми дор сяськаос» вожвылъяськонэ. Ачиз нылпи садын ужа бере, пиналъёс «Пичи Чеберайёс но Батыръёс»«Выжы-выжы-выжыкыл» фестивальёсы пырисько.

«Анайлы сӥзьыса» улосвылкуспо форум

6 фото

Форумын быдэс элькунын вӧлмытыны луоно тужгес тунсыко но пайдалыко ӵектосъёссы сярысь но вераськизы. Надежда Степановалэн кылъёсызъя, берло дыре нылпиослы чаклам ӵектосъёс бордынгес выро, нош даур кутсконын трос мерлыко проектъёссы вал, али соосты выльысь улӟытыны кулэ.

2000-тӥ аръёсы ми ужамы трос социальной проектъёсын, али со туж валтӥсь лыдъяське. Кылсярысь, тани юрттон проектмы вал, кенешон проектмы,гурт нылкышноослы психологической юрттэт сётонъя, ӧнерчиосты гуртъёсы нуллӥськом вал. Солэн кулэлыкез вань. <…> Сыӵе проектъёс но азинскыны кулэ кадь мыным потэ
Надежда Степанова, «Удмурт нылкышно кенеш» огазеяськонлэн тӧроез

«Анайлы сӥзьыса» форуме люкаськемъёсты огазеяськонлэн котырес лыдпусэныз ӟечкылаз но пайдалыко ужъёс сӥзиз Удмуртиысь йӧскалык политикая министрлэн воштӥсез Людмила Соковикова. Нылкышноослы тау карон кылъёс вераз элькунлэн Кун Кенешысьтыз тодосъя, дышетонъя, лулчеберетъя, йӧскалык но егитъёсын ужан политикая ялан ужась ӧрилэн кивалтӥсез, «Удмурт Кенеш» огазеяськонлэн тӧроез Татьяна Ишматова. Солэн кылъёсызъя, тросэз, мар герӟаськемын удмуртлыкен – семьяын-а, ужын-а, мер огазеяськонын-а – «возиське нылкышнолэн пельпум вылаз». Огазе люкаськыса, соос ог-огзылэсь мылкыдзэс бурдъяло, выль ӵектосъёс малпало но соосты улонэ пыӵатыны луонлык кылдыто. Нылпиосты визьнодан амалъёсынызы тодматскыса, асьсэ семьяосазы, гуртъёсазы быдэстыны тыршо.

Ӵош люкаськыса, конешно, соос семья кусыпъёсты гинэ уг эскеро, бадӟым политической юанъёс борды но кутӥсько. И соин туж потэ вал, азьланяз но <…> асьме нылкышноосмы но кӧня ке шарагес мед кылӥськозы элькунамы, тросгес мед финн-угор дуннеямы пыриськыны быгатозы, малы ке шуоно нылкышнолэн сюлмыз, нылкышнолэн визьмыз, мылкыдыз котьку но бурдъя воргоронъёсты но. Малпасько троссэ шуг-секытъёсты но сэрттыны-пертчыны луэ, куке вӧзын вань зэмос, малпаськись, визьмо, чебер нылкышноос
Татьяна Ишматова, Кун Кенешысь депутат, «Удмурт Кенеш» огазеяськонлэн тӧроез

Ватсалом, Удмуртиын кун йӧскалык политикаез быдэстонын трос тыршемзы но «Удмурт нылкышно кенеш» огазеяськонлэн ужаз мыло-кыдо пыриськемзы понна азьветлӥсь нылкышноосты элькунысь Йӧскалык политикая министерстволэн но «Удмурт Кенешлэн» таукаронъёсыныз пусйизы. Форуме люкаськемъёсты творчествоя быгатонлыкъёсынызы шупмоттӥзы Ижкарысь Кузебай Герд нимо йӧскалык гимназиын дышетскисьёс - «Шулан» ансамбль но Ульяна Климкина.



Наверх
Вниз