Ижкар+22 °C
8 -тӥ гудырикошкон 2020 Кӧснунал
16+

Гуртоослэсь улон интыя югдурез умоятон понна Удмуртилы 138 миллион манет висъязы

  • 469
  • 0
Москва / Россия
Гуртоослэсь улон интыя югдурез умоятон понна Удмуртилы 138 миллион манет висъязы
Туспуктэм: Руслан Нуриахметов

Гуртоослэсь улон интыя югдурез умоятон понна «Гурт интывылъёсты ялан азинтон» улсын 2019-тӥ арын Удмуртилы 138 миллион манет висъямын. Удмуртилэн тӧроез Александр Бречалов Россиысь гурт возёсъя министрен Дмитрий Патрушевен пумиськылыкуз та ӧрлы тросгес уксё кулэ шуыса вераськизы, ивортэ улосвыл тӧролэн но кивалтэтлэн пресс-службазы.

«Коньдон гуртоослэн улон интыя югдурзэс умоятон понна кулэ. 2019-тӥ арлы кулэяськон – 437 миллион манетлэсь ятыр. Висъямын 138 миллион манет, со 390 семьялы улон инты сётыны тырмоз. Ватсаса 300 миллион манет манет висъян эшшо 457 семьялы улон интыен юрттыны луонлык кылдытоз», - верамын ивортонын.

Со сяна, гуртъёсын ву но чагыр эстӥськон сётонэз азинтыны коньдон кулэ. Озьы ик ёросъёсын спортъя объектъёс пуктон, калыклэсь кичӧлтонъёссэ быдэсъян понна уксёлы кулэяськон вань. Федерал центрысь ватсаса субсидиос висъязы ке, элькун Удмуртилэн коньдэтысьтыз валче вылысь уксё сётыны оскытэ.

Тодэ вайытом, «Гурт интывылъёсты ялан азинтон» программая 2018-тӥ арын оглом 38,9 иськем гурт сюресъёсты тупатъязы. Таяз арын арын Удмуртиын 70,9 иськем сюресъёсты выльдыны чакламын.

Александр Бречаловлэн верамезъя, федерал программаез быдэсъян ласянь Удмуртиын умой опыт люкамын. Со элькунын та ужпумъёсъя форум ортчытыны ӵектӥз. Азьланяз сыӵе ужрадэз сяме пыӵатыны луэ, со муниципал клыдытэтъёслэн кичӧлтонъёссы пумысен кенешон, улосвылъёслэн ужан амалъёсынызы тодматскон но тӧрлыклэсь но ужбергатонлэсь кусыпъёссэс пайдалыко радъян вылысь выль амалъёс шедьтон понна ялан ужась инты кылдытыны юрттоз.

Улосвыл тӧролэн кылъёсызъя, Россиысь министерство кичӧлтонлы дурбасьтӥз ке, таяз арын ни форум улсын Гурт интывылъёсты азинтонъя кун программаен тодматыны луоз. Росси азьмуртлэн косэмезъя, сое нырысетӥ палар пумозь лэсьтыны кулэ.

Со сяна, Александр Бречалов Дмитрий Патрушевез Удмуртиысь гурт возёс удысысь югдурен тодматӥз, пудо вордон удыслэсь пайдалыксэ будэтон ласянь умой пала воштӥськонъёсты пусйиз. Йӧл поттонъя элькунмы Россиысь вить устоосыз улосвылъёс пӧлы пыре.

Тодэ вайытом, Удмуртиысь гурт возёсъя но сиён-юонъя министретсво ивортэмъя, 2018-тӥ арын нырысьсэ элькунысь гурт возёсъёс нырысьсэ котькуд скаллэсь шорлыдын 6 сюрс килограммлэсь трос йӧл кыскизы.



Наверх
Вниз