Ижкар+20 °C
24 гудырикошкон 2019 Кӧснунал
16+

Ар кутсконысен ужасьёслы кулэяськон Удмуртиын кулэсмиз

  • 121
  • 0
Ижкар / Удмуртия
Ар кутсконысен ужасьёслы кулэяськон Удмуртиын кулэсмиз
Туспуктэм: Григорий Фомин

2019-тӥ ар кутсконысен Удмуртиын ужасьёслы кулэяськон огъя кулэсмиз. Толшоре элькунысь уже интыянъя ёзэсъёсы 4 сюрс 600 вакансиос вуизы. Кылем арысь та вакытэн ик ӵошатыса, со 500 интылы ӧжытгес, ивортэ улосвылысь Мерлыко политикая но ужъя министерстволэн пресс-службаез.

Озьы ке но, миымысь та вакытэн ӵошатыса, Алнаш, Балезино, Грак, Дэбес, Камбарка, Ува, Юкаменск, Шаркан ёросъёсын, Глазкарын но Сарапулын ужасьёслы кулэяськон будӥз.

Котьку сямен ик, Удмуртиын ужась профессиослы кулэяськон тужгес бадӟым. Вань вакансиос пӧлысь со 64 процентэз луэ. Ужъя рыноклы кулэ водительёс (калыкез уже интыянъя ёзэсын шорлыдын 27 сюрс 107 манет уждунэн вакансиос вань), вузкарисьёс (шоро-куспо уждун 18 сюрс 033 манет), электрогазосварщикъёс (шоро-куспо уждун 34 сюрс 392 манет), пӧраськисьёс (шоро-куспо уждун 14 сюрс 260 манет), вуриськисьёс (шоро-куспо уждун 17 сюрс 299 манет), азбар ӵужисьёс (шоро-куспо уждун 13 сюрс 105 манет), плотникъёс (шоро-куспо уждун 30 сюрс 941 манет) но мукет.

1-тӥ тулыспаллы улосвылын 7 сюрс 622 адями ужлы кулэяське шуыса пусъемын. Ар кутсконысен ужтэк кылемъёслэн лыдзы шӧдскымон йылӥз Кизнер но Камбарка ёросъёсын.

Тулыспал кутсконын ужано арлыдъем муртъёс пӧлын 0,98 процентэз ужтэк кылемен пусъемын, кылем арын та вакытэ 0,93 процент вал. Удмуртиысь 8 муниципал кылдытэтъёсын ужасьтэм муртъёслэн лыдзы элькунъя шоро-куспо лыдпуслэсь ичигес: Дэри ёросын – 0,44 процент, Вотка карын но Якшур-Бӧдья ёросын – 0,57 процент, Ижкарын – 0,59 процент, Ува ёросын – 0,67 процент, Эгра ёросын – 0,72 процент, Балезино ёросын – 0,73 процент, Глазкарын – 0,79 процент.

Пусъём, арлэн нырысетӥ толэзяз  107 адями дышетскыны келямын, 98-эз соос пӧлысь ужасьтэм муртъёс, арлыдзыя песния басьтӥсь кык адями но куинь аресозь нылпиен пукись сизьым нылкышноос.

2019-тӥ арын толшоре Удмуртиысь 783 адями уже интыянъя ёзэсъёс пыр уж шедьтӥз, со пӧлын 34 ссыръёс.

Ватсалом, 1-тӥ тулыспаллы Удмуртиысь уже интыянъя кун ёзэсъёслэн базаяз ваньмыз 11 сюрс вакансиос. Соосын szan.mintrud18.ru сайтын «Уж утчан» люкетын но «Работа в России» порталын тодматскыны луэ. 

Наши партнеры

Наверх
Вниз