Ижкар+20 °C
24 гудырикошкон 2019 Кӧснунал
16+

Ву выльдон йылолэз ортчытӥзы Ува ёросын

  • 182
  • 0
Узей-Тукля / Удмуртия
Ву выльдон йылолэз ортчытӥзы Ува ёросын
Туспуктэм: Андрей Перевозчиков

Ува ёросысь Узей-Тукля гуртын ву выльдон йылолэз ортчытӥзы. Удмуртъёслэн вӧсяськон ужрадзы 7-тӥ тулыспалэ радъяськиз, ивортэ Удмуртиысь Калыкъёслэн эшъяськон юртсылэн пресс-службаез.

Ву выльдонэз удмуртъёс толэзь будыку, 19-тӥ толшорысен 9-тӥ тулыспалозь ортчытъяло.

Ижкарысь, Глазкарысь, Эграысь, Пичи Пурга но Ува ёросъёсысь сямъёсты утисьёс, куинь ошмесъёсысь вуэз огазеяса, сое вӧсязы но отын тари кеньырлэсь вӧйын но курегпузэн ӝук пӧзьтӥзы.

Вӧсяськон ортчем бере куноос Узей-Тукляысь Чеберлыко киужъёсъя юртын калык лулчеберетлэн дунлыкез но сое утёнлэн кулэлыкез сярысь кенешизы. Люкаськемъёс малпамъя, зэмос калык лулчеберетлэн инъетэз кыл, вашкала сям-йылолъёс но вӧсьлык луо. Озьы ик удмурт калыклэсь ышем йылолъёссэ улӟытон но та дырозь вуэмъёссэ утён сярысь ужпумез ӝутӥзы. 

Узей-Тукля гурт – Ува ёрослэн одӥгез валтӥсез лулчеберетъя центрез. Калыклэн узыр историез но йылолъёсты воземез гуртлэн нимаз но адӟиське – со кык вашкала удмурт воршуд нимъёслэсь кылдэмын – Узей но Тукля.

Тодэ вайытом, озьы ик Ува ёросын бусы ужъёсты кутсконлы «Гуждор» праздник сяме пыӵамын.

Наши партнеры

Наверх
Вниз