Ижкар-24 °C
6 -тӥ толсур 2021 Вордӥськон
18+

Глазкарысь студентъёс «Калыклэн данъяськонэз – анай кыл» ужрад борды итӥсько

  • 781
  • 0
Глазкар / Удмуртия
Глазкарысь студентъёс «Калыклэн данъяськонэз – анай кыл» ужрад борды итӥсько
Туспуктэм: Григорий Фомин

Глазкарысь дышетӥсьёсты дасянъя В.Г. Короленко нимо институт «Калыклэн данъяськонэз – анай кыл» улосвылкуспо ӵектос борды итӥськиз. 20-21 тулыспалэ отын удмурт кыллы сӥзем ужрадъёс ортчозы. Со сярысь дышетсконнилэн «ВКонтакте» мерлыко вотэсысь огиназ ивортэмын.

Институтын дышетскисьёс понна вуоно арняе удмурт мунёосты лэсьтонъя, «Выжыкыл дуннеын» мастер-классъёс, «Кырӟаськом анай кылын» видеоэстафета, финн-угор пуштросо адӟытон но удмурт кыллы но лулчеберетлы сӥзем мукет ужрадъёс возьмало.

«Калыклэн данъяськонэз – анай кыл» ӵектосэз Сыктывкарысь Питирим Сорокин нимо кун университет радъяз. Со борды Финн-угор университетъёслэн калыккуспо ассоциациязы пырись вылӥ дышетсконниосысь студентъёс итӥсько. Анай кыллэн нуналэзлы сӥзем ужрадъёс Россиысь 11 улосвылъёсын ортчозы.

Ӵектос финн-угор кылъёсты утён но азинтон, соосты егитъёс пӧлын утён вылысь радъяське. 

Ватсалом, ӵектос егитъёслэн проектъёссыя огъяросси вожвылъяськонын утэм коньдонэн быдэстӥське.

Тодэ вайытом, 21-тӥ тулыспалэ, ӵапак Анай кыллэн калыккуспо нуналаз, Ижкарысь Кузебай Герд нимо йӧскалык гимназиын «Герд лыдӟонъёс» элькун конференци ортчоз. Валтӥсь ивортонъёсты пиналъёс но егитъёс лэсьтозы шуыса вераськизы.



Наверх
Вниз