100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

200 пала адями пыриськиз элькун Герд лыдӟонъёсы Ижкарын

  • 626
  • 0
Ижкар / Удмуртия
200 пала адями пыриськиз элькун Герд лыдӟонъёсы Ижкарын
Туспуктэм: Майя Бывальцева

21-тӥ тулыспалэ Ижкарысь Кузебай Герд нимо кун йӧскалык гимназиын «Герд лыдӟонъёс» XXII элькун научно-практической конференци ортчиз. Таяз ардэ ужрадэз Кузебай Гердлэн выль удмурт интеллигенциез будэтон удысын тыршемезлы сӥзизы.

Конференцие быдэс улосвылысь 200 пала адями вуиз: тодмо тодосчиос, литератураез эскерисьёс, мер ужасьёс, удмурт кылъя но литературая дышетӥсьёс, студентъёс но дышетскисьёс.

Ужрадмы туж пусйымон нуналэ тупаз – Анай кыллэн калыккуспо нуналаз, вераз, люкаськемъёсты пумитаса, «Удмурт Кенеш» огазеяськонлэн тӧроез, Удмуртилэн Кун Кенешысьтыз ялан ужась ӧрилэн кивалтӥсез Татьяна Ишматова. Конференциез ортчон инты но юнме быръемын ӧвӧл, ӵапак Кузебай Герд нимо гимназиын вуоно удмурт интеллигенцилэн пушъетэз кылдэ шуыны луоз, со сяна, дышетсконнилы туэ 25 ар тырме.

Берло дыре асьмеос трос кылӥськом, пӧртэм удысъёсъя кадръёсты дасяны кулэ шуыса. Ӵапак толон аслаз посланиеныз вазиськиз калыклы, Федерал Собранилы асьме азьмуртмы Росси Федерациысь Владимир Владимирович Путин и туж трос кылъёс верамын вал именно кадръёсты дасян пумысен. Удмурт калыклэсь улонзэ басьтыны ке, <…> туж трос лэсьтэмын вал асьме азьветлӥсьёсынымы, югдытӥсьёсынымы, удмурт калыклэн но йӧно, быгатӥсь, визьмо пиосыз но нылъёсыз мед будозы шуыса. Соин ик ми туэ бырйимы таӵе темаез: кыӵе вал Кузебай Гердлэн ролез, шуом, удмурт кадръёсты дасян бордын. <…> Туннэ солэсь адӟем карыса, асьмеос но, «Удмурт Кенеш» огазеяськон пыр ваньмы ӵош кариськыса, озьы ик кадръёсты дасянъя мед быгатомы ужаны, азьланьтыны та удысмес
Татьяна Ишматова, «Удмурт Кенеш» огазеяськонлэн тӧроез, Кун Кенешысь ялан ужась ӧрилэн кивалтӥсез

Удмуртиысь йӧскалык политикая министр Лариса Буранова вераськонзэ озьы ик Анай кыллэн нуналэз бордысь кутскиз. Анай кыл – со котькуд калыклэн выжыез, кылмы луоз ке, калыкмы но улоз, пусйиз со.

XXII Герд лыдӟонъёс

10 фото

Озьы ик министр Герд лыдӟонъёс улсын калыккуспо кенешон площадка кылдытыны ӵектонзэ вераз. Солэн кылъёсызъя, «Удмурт Кенешлэн» исполкомаз та ужпумез вазенгес ӝутылӥзы ни вал.

Герд лыдӟонъёсын лэсьтыны кулэ калыккуспо площадка, кытын учкыны кулэ, дыр, стратегической, мон шуысал, юанъёсты: кызьы али туала калыкъёс та дунне вылын асьсэдыз шӧдо но кытчы вамыштыны кулэ. Соин ик та аре со бордын но кӧня ке ужаны кулэ, ми дась пыриськыны та уже. Мон малпасько, Гер ниммы, Кузебай Гердмы – со сыӵе ми понна, калык понна, мон малпасько, мукет калыкъёс понна но, туж сыӵе бадӟым кизили. Кулэ лэсьтыны, дыр, сыӵе площадка, кытын ми быгатом нуыны практической ужъёс, практической юанъёсты эскерыны
Лариса Буранова, Удмуртиысь йӧскалык политикая министр

Элькун конференцие «Удмурт Кенеш» огазеяськонлэн дано президентэз Валентин Тубылов но вуиз. Герд лыдӟонъёсты нырысьсэ ортчытыку, соос сокем трос луозы шуыса ум малпаське вал, нош табере тани 22-тӥзэ люкаським ни, шуиз со.

Весь бугыръяло, бугыръяло асьмелэн тодосчиосмы, весь мар ке но вылез сюре. <…> Сомында уж лэсьтэмын сыӵе вакчи улытозяз асьме дунне вылын. Со огазеяз калыкез, сое ноку но вунэтоно ӧвӧл. азьланяз но лэсьтоно на- бадӟым пайда сётэ. Али шумпотӥсько соин, шонер соку малпаллям монэн ӵош ужась эшъёс
Валентин Тубылов, «Удмурт Кенеш» огазеяськонлэн дано тӧрез

Озьы ик Валентин Тубылов Удмуртилэн кунлыкезлы 100 ар тырмон улсын Кузебай Гердлэсь нимзэ, солэсь ужъемышсэ эшшо паськытгес возьматыны кулэ шуыса пусйиз.

Вуоно арын 100 ар тырме асьме кунлыкмылы. Тодӥськоды, со борды туж трос кужымзэ понӥз Кузебай Герд, мукетъёсыз но. Оло, вуоно аре Герд лыдӟонъёсы пыртыны кулэ вал, кызьы асьме Удмуртиямы кылдӥз кунлык, кин отчы сомында кужым понӥз, кытысь со потӥз. Ваньмыз малпа, дыр, яке вала, дыр: соос ке ӧй луысал, оло, луысал, оло, ӧй луысал Удмуртимы. Скорей всего, ӧй луысал. Соку удмурт кыл сярысь но, удмурт культурая сярысь но вераськон ӧй луысал ни. Самой отысь потӥз ваньмыз – соос бордысь
Валентин Тубылов, «Удмурт Кенеш» огазеяськонлэн дано тӧрез

Люкаськем калыклы вазиськиз Удмуртиысь Кун йӧскалык театрлэн кивалтӥсез, Кун Кенешысь депутат Андрей Ураськин но. Солэн верамезъя, Герд лыдӟонъёсты Удмуртилэн пӧртэм ёросъёсаз ортчытъян туж шонер, со отын улӥсьёслы выль мылкыдъёсты, малпанъёсты вуттыны луонлык. Но озьы ик туж умой, туэ конференци Кузебай Герд нимо гимназиын радъяськиз шуыса. Андрей Ураськин дышетсконнилы кузьым вайиз.

Ми кемалась ик малпан вал ини – тани та Кузебай Гердлы портрет, со лэсьтэмын Удмурт театрын ужакуз Валентин Белых художникен, со Удмурт театрлы лэсьтэмын. <… >Ми малпам: талэн киыз но пыдыз Кузебай Герд гимназиын луыны. <…> Сыӵе чебер портрет, адӟиськоды-а? Егит дыръяз художник адӟе сое. <…> Солэн бераз льӧмпу сяськаяське, кияз но, ваньмыз вордӥське, ӝужа. Кыӵе дырез Кузебай Герд туж яратэ вал, оске вал, удмурт калык ӝужалоз, Удмурт элькунмы ӝужалоз
Андрей Ураськин, Удмуртиысь Кун йӧскалык театрлэн кивалтӥсез, Кун Кенешысь депутат

Ватсалом, гимназилэн Кузебай Гердлэн портретэз та дырозь вылымтэ на.

«Герд лыдӟонъёс» элькун конференциын сизьым доклад чузъяськиз. Соосты тодосчиос, гожъясьёс, дышетӥсьёс, студентъёс но дышетскисьёс дасязы:

  • «Кузебай Гердлэн выль удмурт интеллигенциез будэтонын интыез» - Александр Шкляев, кылосубр тодосъя кандидат, УдГУ-ысь журналистикая кафедраысь доцент, Кузебай Герд нимо йӧскалык премилэн лауреатэз;
  • «Кузебай Гердлэн улоназ дас зарни аръёсыз» - Николай Кузнецов, Россиысь но Удмуртиысь гожъясьёслэн огазеяськонъёссылэн ёзчиез, Кузебай Герд нимо йӧскаылк премилэн лауреатэз;
  • «Кузебай Герд но Можга педтехникум (педколледж)» - Татьяна Иванова, Можгаысь Трокай Борисов нимо педколледжысь удмурт кылъя но литературая дышетӥсь, Удмурт Элькунысь калык дышетӥсь, Ашальчи Оки нимо премилэн лауреатэз;
  • «Выль Мултан педтехникумлы 100 ар. Кузебай Герд – Выль Мултан педтехникумез кылдытӥсь» - Евгений Эжбаев, Ува ёросысь Чистостем шоръёзо школаысь дышетӥсь, шаерчи, Эрик Батуев нимо премилэн лауреатэз;
  • «Кузебай Гердлэн «Шунты зор», «Выль сюрес» лыдӟон книгаосызлэн удмурт пиналъёсты дышетонын интызы» - Ксения Хохрякова, УдГУ-ысь Удмурт кылосбуръя, финно-угроведениея но журналистикая институтын 3-тӥ курсын дышетскись (тодосъя кивалтӥсез: педагогика тодосъя кандидат, УдГУ-ысь доцент Любовь Фёдорова);
  • «Кузебай Герд удмурт нылпи юртъёслы ужасъёсты дасянын» - Валентина Ившина, педагогика тодосъя кандидат, «Удмурт Кенешлэн» Ижкарысь Октябрь ёрос ёзэтэзлэн кивалтӥсез, Кузебай Герд нимо премилэн лауреатэз;
  • «Кузебай Гердлэн но Сергей Есенинлэн творчествоязы бусылэн кылсуредэз (образэз)» - Любовь Михайлова, Кузебай Герд нимо гимназиысь 11-тӥ классын дышетскись, Яна Кузьмина, Москваысь Экономикая вылӥ школаысь магистрант (кивалтӥсез: удмурт кылъя но литературая дышетӥсь Глафира Черепанова).

Озьы ик сяме пыӵамъя ужрадын Кузебай Герд нимо йӧскалык премиез сётӥзы. Таяз радэ сое кык мурт басьтӥз: Удмуртиысь калык суредась Семён Виноградов но Грак ёросысь Депутатъёслэн кенешсылэн тӧроез Михаил Крестьянинов. 



Наверх
Вниз