Удмуртиысь студентъёслэн отрядъёссы 2019-тӥ арын гужем Краснодаре, Якутие, Челябинске но мукет интыосы ужаны мынозы. 24-тӥ куартолэзе Ижкарысь Пыраклы Россиен синпелет дорын егитъёслэн гужем ужан вакытсылы кутскон сётозы. Со сярысь элькунысь Физкультурая, спортъя но егитъёсын ужан политикая министерстволэн пресс-службаез ивортэ.
Удмуртиысь отрядъёслэн ужан семестрзы М. Т. Калашниковлэн вордскем дырысеныз 100 ар тырмонлы но Россиысь студентъёслэн отрядъёссылы 60 ар тырмонлы сӥземын луоз. 2019-тӥ арын 2 сюрс пала студентъёс лэсьтӥськон объектъёсын, нылпи центръёсын, чугун сюрес вылын, гурт возёсын ужалозы
Удмуртиысь отрядъёс огъяросси ӵектосъёсы пыриськозы: педагогика отрядъёс огъяросси отрядъёсын ӵош Краснодар шаерын, Пенза улосвылын, «Орлёнок» центрын ужалозы, лэсьтӥськон отрядъёс - Челябинск улосвылысь Озёрск карын «Мирный атом», Саха (Якутия) Элькунын «Север» ӵектосъёсын. Сервисъя отрядъёс Геленджике мынозы. Проводникъёслэн отрядъёссы «Федеральная пассажирская компания» огазеяськонлэн ёзъёсаз ужалозы.
2019-тӥ арын нырысьсэ Удмуртиын Ижысь эм академиын студентъёслэсь эм отрядзэс кылдытӥзы. Егитъёс нылпи лагерьёсын, клиникая но диагностикая улосвылкуспо центръёсын, санаторийёсын но профилакторийёсын, эмъяськонниосын ужалозы.
Тодэ вайытом, 20-24 куартолэзе Ханты-Манскийскын «Мисс студенчества Финно-Угрии – 2019» калыккуспо вожвылъяськон ортчоз. Отчы Удмурт кун университетын дышетскись Юлия Сунцова но Глазкарысь педагогикая институтын дышетскись Ольга Ашихмина пыриськозы.