Ижкар-1 °C
22 -тӥ коньывуон 2020 Покчиарня
18+

Сергей Смирнов: лулчеберетъя Короленко нимо центр Удмуртиез но удмурт калыкез возьматӥсь инты луыны кулэ

  • 957
  • 0
Ижкар / Удмуртия
Сергей Смирнов: лулчеберетъя Короленко нимо центр Удмуртиез но удмурт калыкез возьматӥсь инты луыны кулэ
Туспуктэм: Алексей Арзамасцев

Улосвыл кивалтэтын Ижкарын Удмурт лулчеберетъя центр пуктон пумысен кенешон ортчиз. Удмуртиысь тӧролэн но кивалтэтлэн администрацизылэн кивалтӥсеныз Сергей Смирновен ортчытэм пумиськонэ удмурт движенилэн азьветлӥсьёсыз, элькун но кар тӧрлыкъёсысь, улосвылысь архитекторъёслэн огазеяськонысьтызы ыстэм муртъёс пыриськизы. Со сярысь тӧролэн но кивалтэтлэн пресс-службазы ивортэ.

Азьвыл ортчем калыкен кылзонъёслы луыса центрез тырмытонъя учкет (концепция) кылдытэмын. Со сяна, ӧнерчиосын юртлэн ӟечлыкезъя экспертиза лэсьтэмын.

Лулчеберетъя центр кылдытонъя малпан туннэ ӵектослы кельше ини. Ӵектос лэсьтонъя конкурс ортчиз, отын архитектурая «Группа А» мастерской вормиз. Возьматэм ӵектос калыкын споръяськон ӝутӥз, лулчеберетъя центрлы юртэз быдэсак выльдон яке выль юрт пуктон пумысен пӧртэм малпанъёс вал
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Элькун кивалтэтын та уже вань пыриськисьёсты люканы но лэсьтӥськон ласянь пӧртэм малпанъёсты эскерыны пумкылъян кутӥзы. Кенешонэ пыриськемъёс соглаш луиз, юрт уже кутӥськыны кулэ ӧвӧл ини, со кышкытлыке вуттыны быгатоз. Солэн интыяз Ижкарын улӥсьёс но, быдэс Удмуртия понна но данъяськымон выль юрт пуксьыны кулэ.

Выль юртлэн ӵектосэз Архитекторъёслэн союзэнызы но калыкен валче дасямын луоз. Центрлэн эскизэз но пушкыз Удмуртиысь лулчеберетлэн сяме пырем ёзнэтъёс (элементъёс) вылэ, озьы ик архитектурая но карез лэсьтонъя азинлыко ужан амалъёс вылэ пыкъяськыса лэсьтэмын луоз.

Ӵектосын азьвыл В. Г. Короленко нимо театрлэн но тусыз кылёз.

Лулчеберетъя Короленко нимо центр зэмзэ но удмурт лулчеберетлэн шорсюлмыз луыны кулэ шуыса чакламын, со тросгес туристъёсты мед кыскоз, узыр удмурт лулчеберет сярысь кунамы гинэ ӧвӧл, кунгож сьӧрын но мед тодозы. Лулчеберетъя центре фольклор кырӟанъя но эктонъя «Айкай» театр одно ик кыльыны кулэ. Оглом, татын пӧртэм студиос но кружокъёс луыны кулэ, со пӧлын нылпиослы. Валтӥсез – со Удмурт Элькунэз но удмурт калыкез возьматон. Та центр элькунамы ортчись пӧртэм ужрадъёс понна одӥгез валтӥсь инты луыны быгатысал
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Сергей Смирнов Удмуртиысь Лэсьтӥськонъя, жилищно-коммунальной возёсъя но дыкужымъя министерствоез ӵектос кылдытыкузы кенешонлэсь пумкылъянъёссэ но Архитекторъёслэн союззылэсь но мер огазеяськонъёслэсь малпанъёссэс лыдэ басьтыны куриз.

Куке визуализациен, валэктонъёсын огъя ӵектос дась луоз, сое калыклы возьматоно – сайтъёсы поттоно, ивортодэт вӧлмытӥсьёс пыр адӟытоно. Та ӵектос возьматэмез но со сярысь вераськемез кулэ каре
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Тодэ вайытом, Азьвыл В. Г. Короленко нимо театрлэн юртаз Удмурт лулчеберетъя центр пуктон сярысь юан кык ар талэсь азьло Удмуртилэн тӧроезлэн ужзэ огдырлы быдэсъясьлэн Александр Бречаловлэн «Удмурт Кенеш» огазеяськонлэн азьветлӥсьёсыныз пумиськоназ ӝутэмын вал. 2011-тӥ арысен юрт ӧжытэзтэк буш сылэ. Та дыре отын кырӟанъя но эктонъя «Айкай» театр но Йӧскалык лыдӟетъюртлэн одӥг ёзэтэз гинэ интыясько. Юрт рос-прос тупатъямез кулэ каре. Соку «Удмурт Кенешлэн» ёзчиосызлэсь ӵектонзэс элькун тӧрлыкъёс умоен лыдъязы.

Удмуртилэн тӧроез Александр Бречалов центр пуктон сярысь Россилэн азьмуртэныз Владимир Путинэн, озьы ик Россиысь лулчеберетъя министрен Владимир Мединскиен пумиськонын вераськиз.

Та дыре улосвылысь лулчеберетъя министерство федерал коньдэтысь субсидия кыскон бордын ужа.



Наверх
Вниз