Ижкар+23 °C
9 -тӥ пӧсьтолэзь 2020 Покчиарня
16+

Геннадий Корепанов-Камскийлы сӥзем ужрадъёс ортчытыны Дэбес ёрос грант утӥз

  • 1363
  • 0
Дэбес / Удмуртия
Геннадий Корепанов-Камскийлы сӥзем ужрадъёс ортчытыны Дэбес ёрос грант утӥз
Туспуктэм: vk.com (Дебесская районная библиотека)

«Байгурезь» Дэбес бӧляк» мер огазеяськонлэн «Удмурт музъемлэн кырӟасез» творчествоя лаборатория» («Творческая лаборатория «Певец земли удмуртской») ӵектосэз Росси азьмуртлэн грантъёсъя фондэныз ялэм вожвылъяськонын вормисьёс пӧлы шедиз. Со удмурт крезьгурчи Геннадий Корепанов-Камский сярысь тодонлыкез утён ужен герӟаськемын. Со сярысь ивортодэтъя Удмуртия агентстволы проектэз гожтӥсь, Дэбес ёрос администрациысь Лулчеберетъя но туризмъя управленилэн кивалтӥсез Александр Корепанов вераз.

Ӵектосэз улонэ пыӵатон понна Фонд 499 сюрс 745 миллион манет сётоз. Эшшо 202 сюрс 500 манет Дэбес ёрос ватсалоз

Геннадий Михайлович Корепанов Камский сярысь тодонлыкез утёнъя уж ӵектосъя вить толэзь ӵоже мыноз, отчы кӧня ке ужрадъёс пыртэмын. 17-тӥ гудырикошконэ Дэбес черкогуртын элькун фестиваль ортчоз. Со улсын Чупчипал паркын нимысьтыз сцена лэсьтыны малпаськомы но синпелет - со Геннадий Михайлович Корепанов-Камскийлэн тусыныз пу скульптура кадь ӟус луоз, со ик туспуктон лэсьтон инты
Александр Корепанов, ӵектосэз гожтӥсь

Со нуналэ ик крезьгурчилэн вордскем палаз - Тыловай черкогуртын - «Удмурт музъемлэн кырӟасез» творчествоя лаборатория» элькун конференци ортчоз. Тодосчиосын, мер ужасьёсын ӵош люкаськыса, крезьгурчи сярысь тодонлыкез утён ужпумъёсты ӝутозы.

Озьы ик ӵектосэз улонэ пыӵатон улсын - пӧсьтолэзьысен шуркынмон пумозь - куинь буре ваён пулъёс юнматыны чакламын. Одӥгез Дэбес ёросысь Тыловай черкогуртын луоз, эшшо кыкез – Ижкарын: крезгуръя элькун колледжын но улон юртэз вылын.

Со сяна, та дыре Корепанов-Камский сярысь тодонлыкез вотэсын люкан-огазеян уж мынэ.

Интернет вотэсын #КорепановКамский хештэг улын ивортодэт люкаськомы, малы ке шуоно отын номыр ӧй вал шуыны луоз, 2-3 ролик гинэ. <…> Туннэ «ВКонтакте» мерлыко вотэсын хэштэг лэземын ни. Ми ваньзэс итӥськыны куриськом, кин Геннадий Михайлович сярысь мар ке но тодэ
Александр Корепанов, ӵектосэз гожтӥсь

Александр Корепановлэн верамезъя, ӵектос кутскемлэсь азьвыл Дэбес ёросын Геннадий Корепанов-Камскийлы сӥзем кык ужрад ортчытӥзы ни – суредан устолыкъя элькун фестиваль но искусствоосъя школаос куспын крезьгуро фестиваль. Та ужрадъёсы пыриськем пиналъёсты 17-тӥ гудырикошконэ крезьгурчилэн котырес дырпусэзлы сӥзем празднике ӧтьыны малпало. 

Тодэ вайытом, 2018-тӥ арын гудырикошконэ Дэбес ёросысь Яг гуртын Геннадий Корепанов-Камскийлы буре ваён пул усьтӥзы. Нош туэ Ижкарысь выль ульчалы Геннадий Корепанов-Камскийлэсь нимзэ сётыны пумкылъян кутӥзы

ВАТСАН

Геннадий Корепанов-Камский Удмуртиын профессиональной крезьгурлы кутскон сётӥсьёс пӧлысь одӥгез. Вордӥськиз 1929-тӥ арын 18-тӥ гудырикошконэ али Дэбес ёросысь Ягвуково гуртын. Ас понназ балалайкаен, гитараен, баянэн шудыны дышиз. Москваысь П. И. Чайковский нимо консерваториын, Казаньысь консерваториын дышетскиз. Удмуртиысь крезьгурчиослэсь огазеяськонзэс кылдытон бордын тыршиз, солэн нырысетӥ тӧроез вал. «Любушка» оперетталэн (1959-тӥ ар), «Италмас» балетлэн (1961-тӥ ар), «Чипчирган» опера-балетлэн (1963-тӥ ар) но мукет ужъёслэн авторзы луэ.

Тодэ вайытом, Росси азьмуртлэн грантъёсъя фондэныз 2019-тӥ арлэн нырысетӥ палараз ортчытэм вожвылъяськонын вормисьёс озьы ик пӧлы шедиз «Удмурт Кенеш» огазеяськонлэн Калык творчествоя элькун юртэн огазьын дасям «Нылкышно творчествоя «Чеберай» марафон» ӵектосэз.



Наверх
Вниз