Ижкар+22 °C
11 -тӥ пӧсьтолэзь 2020 Кӧснунал
16+

«Таврида» форумын 1 миллион манет утӥзы Удмуртиысь творчество удысын ужась егитъёс

  • 402
  • 0
Судак / Россия
«Таврида» форумын 1 миллион манет утӥзы Удмуртиысь творчество удысын ужась егитъёс
Туспуктэм: vk.com (Филипп Павлов)

Удмуртиысь Татьяна Шихова но Филипп Павлов лулчеберет но искусство удысысь егитъёслэн «Таврида 5.0» форумазы грантъёсъя вожвылъяськонын вормисьёс пӧлы шедизы. Йылпумъянъёс 14-тӥ пӧсьтолэзе Крымын лэсьтӥзы. Со сярысь Лулчеберетъя кичӧлтонъёсты азинтонъя центрлэн пресс-службаез ивортэ.

Татьяна Шихова эктонъя «Танцевальный RESTART» усьтэм улосвылкуспо форумен тодматӥз но сое быдэстыны 300 сюрс манет утӥз. Филипп Павлов «Фотоволонтёры Удмуртии» ӵектосэн 700 сюрс манет утӥз. 

Удмуртиысь егитъёслэн «Тавридае» пыриськемзы дырысен та нырысетӥез учыр, куке кык ӵектосъя юрттэт басьтӥзы но быдӟалаезъя рекорд пуктӥзы – фестивальёсысь но форумъёсысь кык адями миллион манет ӧз вайылы на
Игорь Крымский, Егитъёсын ужанъя федерал агентстволэн грантъёсъя федерал экспертэз

Солэн верамезъя, таяз сменаын грантъёслэн быдӟалазыя Удмуртилэн делегациез Санкт-Петербурген нырысетӥ интыез люкиз.

«Танцевальный RESTART» ӵектосъя коньдон ӧнерчиосын мастер-классъёс радъяны но финалэз ортчытыны мыноз.

Танцевальный RESTART»Ижкарын куинь люкетэн ортче: быръён люкетаз быдэс элькунысь пыриськисьёс асьсэлэсь быгатонлыкъёссэс возьмато, дышетон люкетаз вить арня ӵоже пыриськисьёслы усьтэм (ваньмызлы) но ворсам (быръёнэз ортчемъёслы) мастер-классъёс радъясько но йылпумъян перформанс. Концертын финалистъёс эктонъёс пуктонъя дышетонъёсын басьтэм тодон-валанъёссэс возьмато. Шумпотӥсько, Таврида ӵектосэз быдэстыны луонлык сётӥз шуыса
Татьяна Шихова, «Таврида 5.0» форуме пыриськись

«Фотоволонтёры Удмуртии» ӵектос озьы ик кӧня ке люкетэн ортче. Нырысь ик Ижкарын быръён вожвылъяськон радъяське, отын Удмуртиысь но бускель улосвылъёсысь пыриськисьёс быгатонлыкъёссэс возьмато. Собере кык толэзь ӵоже дышетонъёс мыно. Йылпумъян адӟытонын фотоконкурс радъяське. Форумлэн берпуметӥ люкетэз – Удмуртиысь фотоволонтёръёслэсь штабзэс кылдытон. Коньдон дышетонлы, со пӧлын Россиысь тодмо туспуктӥсьёсты ӧтьыса, фототӥрлыклы, вожвылъяськонлэсь йылпумъян люкетсэ радъяны кутӥськоз. 

«Контемпорари-арт» сменаын грантъёсъя вожвылъяськонэ 82 куриськон вуиз. 16 адями вормиз, соослэн ӵектосъёссылы 6 миллион манет висъязы.

ВАТСАН

Лулчеберет но искусство удысын егит ужасьёслэн «Таврида» форумзы Крымын 2015-тӥ арысен ортчылэ. Со дырысен ужрадэ 15 сюрслэсь трос адями вуылӥз ни. 2019-тӥ арын ӵектос арт-кластер форматозь паськытаз, со улсын сяме пырем форум (11-тӥ куартолэзьысен 5-тӥ коньывуонозь), творчествоя огазеяськонъёслэн «Таврида-АРТ» фестивальзы (20-26 гудырикошконэ) ортчозы, озьы ик дышетонъя «Арт-резиденция «Таврида» центр пуктон (2022-тӥ арын йылпумъяськоз)

Тодэ вайытом, Удмуртиысь вылӥ дышетсконниос егитъёслэн ӵектосъёссыя огъяросси вожвылъяськонын 11 но ӝыны миллион манет пала утӥзы.



Наверх
Вниз