Ижкар+18 °C
24 гудырикошкон 2019 Кӧснунал
16+

Анай-атайёс понна удмурт медиашкола ужаны кутске Удмуртиын

  • 712
  • 0
Ижкар / Удмуртия
Анай-атайёс понна удмурт медиашкола ужаны кутске Удмуртиын
Туспуктэм: Григорий Фомин

Удмуртиын анай-атайёс понна «Аныкай» удмурт медиашкола ужаны кутске. Со сярысь ивортодэтъя «Удмуртия» агентстволы дышетонэз огез радъясь Наталья Шулакова вераз.

Удмурт медиашколае ӧтё ваньзэсты удмурт анай-атаёсты, кинлы тунсыко туспуктэм но видео лэсьтыны, фильмъёс кылдытыны, монтаж ужен вырыны.

Дышетозы ӧнерчиос – фотографъёс, видеографъёс, SMM-специалистъёс. Нырысь ортчозы лекциос, собере луоз практика, кытын нылпиосын ӵош лэсьтэмын луозы видеоос пӧртэм темаосъя: семьялэн реликвиезлэн историез, пӧраськомы ӵошен, Удмуртиысь тунсыко интыос, лыдӟиськом книга, яратоно шудон, кыӵе ке кизилиослэсь интервью. Оглом, мар анай-атайёслы тунсыко потӥз, со бордын ик ужалом
Наталья Шулакова, «Аныкай» удмурт медиашколаын дышетонэз огез радъясь

Дышетон очной но заочной амалъёсын луоз. Чакланъёсъя, ог дасо адями Ижкарын Калыкъёслэн эшъяськон юртазы ветлоз, нош отысь вань лекциосты вотэсэ поттозы, соосты вань мылкыд карисьёс учкыны быгатозы.

Дышетон йылпумъяськем бере интернет-марафон ортчоз. Со улсын удмурт анай-атайёс ӵектэм темаосъя выль туспуктэмъёс, аудио- но видеоматериалъёс лэсьтозы. Ужъёсты жюри но учкисьёс дунъялозы. Вормисьёсты нимысьтыз ужрадын пусъёзы.

Ваньмыз ужъёс удмурт кылын луозы – со валтӥсез, мин висъяське медиашкола мукет та выллем ӵектосъёслэсь.

Со малпамын удмурт видео-, аудиоконтентэз будэтон понна. Со контент мед луоз нылпиосын ӵош лэсьтэмын но нылпиос понна. Эшшо самой бадӟым плюсэз - со удмурт кылэз туала амалэн вӧлмытон шуод-а, мар-а
Наталья Шулакова, «Аныкай» удмурт медиашколаын дышетонэз огез радъясь

Курсъёсы пыриськон понна 20-тӥ гудырикошконозь «Аныкай» удмурт медиашколалэн «ВКонтакте» мерлыко вотэсысь огиназ ӵектэм кабъя (формая) гожтӥськыны кулэ.

Ватсалом, дышетон дунтэк луоз. Удмурт медиашколаез радъян понна егитъёслэн «Куара» мер огазеяськонзы Удмуртиысь йӧскалык политикая министерстволэн вожвылъяськоназ грант утӥз. Ӵектосэз Ольга Степанова кылдытӥз. 

Тодэ вайытом, Ижкарын видео пуктон бордын тыршись удмурт егитъёслы «Тамга» курсъёс усьтӥзы

Наши партнеры

Наверх
Вниз