Ижкар+18 °C
24 гудырикошкон 2019 Кӧснунал
16+

Киросъёс, нылкышно чеберъяськонъёс но манетъёс шедьтӥзы археологъёс вашкала Шаркан шайысь

  • 411
  • 0
Шаркан / Удмуртия
Киросъёс, нылкышно чеберъяськонъёс но манетъёс шедьтӥзы археологъёс вашкала Шаркан шайысь

Тунсыко арбериос шедьтӥзы Удмурт кун университетысь ӧнерчиос XVIII даур пумысь – XIX даур кутсконысь алигес шедьтэм археологи синпелетысь - Шаркан черкогуртысь Шаркан шайысь. Археологи ужъёсты пӧсьтолэзь пумын ортчытӥзы. Со сярысь Удмуртиысь Лулчеберетъя кылёсбурез кун ласянь утёнъя агентстволэн «ВКонтатке» мерлыко огиназ ивортэмын.

Археологъёс оглом православи йылолъёсъя ватэм муртъёслэсь туж тунсыко арбериоссэс шедьтӥзы – киросъёс, нылкышно чеберъяськонъёс, улонын кутӥськись арбериос, озьы ик котькудаз сямен шайгуын манетъёс вылэм.

Ужъёсын кивалтӥсь, профессор Е. М. Черных пусъе, шай кылдэмын со вакытэ, куке Шаркан волостьысь удмуртъёсты христиан цивилизацие пыртыны кутскизы. 1837-тӥ арын Петропавловской черкез пуктыны кутскон азьын Лонлэз-Докья (Шарканлэн азьвыл нимыз) гуртысь кӧняез ке удмуртъёс христианизировать каремын ни вылэм, лэся, озьы ке но тодосчиос чутрак вераны уг быгато на, кыӵе вӧсьлыке пыро вал шараям шайвылэ ватэмъёс (пӧлазы черке пыртэм удмуртъёс но, язычникъёс но луыны быгато)
Удмуртиысь Лулчеберетъя кылёсбурез кун ласянь утёнъя агентство

Кызьы верамын ивортонын, Шаркан шай удмуртъёслэн одӥгезлэн группазылэн историезъя синпелет сямен туж тунсыко луэ, но нырысь ик отысь шедьтэм материалъёс христианизаци кутскем, язычестволэн но православилэн кусыпъёссы сярысь тодонлыкез будэтыны луонлык сёто. Шарканлэн интывылаз нырысетӥ гуртлэн кылдэмез сярысь юанлы валэктон али но ӧвӧл. Озьы ик отын улӥсьёсты ватон интыос, со вакытысь шарканъёслэн ваньбурлыко но лулпушлыко культуразылэн аспӧртэмлыкез тодмотэм вал.

Тодэ вайытом, Удмуртиысь Лулчеберетъя кылёсбурез кун ласянь утёнъя агентство Ува ёросысь Чекан черкогуртысь Николай Чудотворецлэсь черксэ лулчеберетъя кылёсбурен лыдъяськись объектъёсын лыдметэ пыртӥз.

Наши партнеры

Наверх
Вниз