100 лет государственности Удмуртии
Ижкар+10 °C
25 -тӥ куартолэзь 2020 Вордӥськон
16+

«Усточикар» пиналэз воштэ: удмурт нылпиослы лагерь Башкириын 90 дышетскисьёсты огазеяз

  • 375
  • 0
Татышлы / Россия
«Усточикар» пиналэз воштэ: удмурт нылпиослы лагерь Башкириын 90 дышетскисьёсты огазеяз
Туспуктэм: vk.com (Ирина Самигулова)

5-14 гудырикошконэ Башкириысь Татышлы ёросысь Безовка черкогуртысь В. М. Комаров нимо лагерьын удмурт пиналъёс понна «Усточикар» лагерь ортчиз. Отчы Удмуртиысь, Пермь шаерысь но Башкириысь 4-11 классъёсын дышетскись  90 нылъёс но пиос пыриськизы. Со сярысь ивортодэтъя «Удмуртия» агентстволы лагерез огез радъясь, бускель элькунысь Калыкъёслэн эшъяськон юртсылэн ёзэзлэн - Историяя но лулчеберетъя удмурт центрлэн кивалтӥсез Ирина Самигулова вераз.

Пермь шаерысь Куеда ёросысь Гондыр гуртысь, озьы ик вал Удмуртиысь 15 кузя пиналъёс - пӧртэм ёросъёсысь но Ижкарысь, вал (Башкириысь – ред.) Калтасы ёросысь, Янаул ёросысь, Татышлы ёросысь, Балтась ёросысь пиналъёс. Ваньзы удмурт кылын верасько. Вань ужрадъёсмы удмурт кылын ортчизы
Ирина Самигулова, Башкириысь Историяя но лулчеберетъя удмурт центрлэн кивалтӥсез

Шутэтскем сяна, пиналъёс куать ӧръёсъя тодон-валанъёс басьтӥзы, быгатонлыкъёссэс волятӥзы: эстрада, театр, фольклор, журналистика, кызьпу туен вырон, дӥськут дизайн. Ирина Самигуловалэн верамезъя, ӧнерчиосты бырйыны удмурт егитъёслэн «Шунды» огазеяськонзы юрттӥз. Озьы лагере Удмуртиысь ньыль ӧнерчиос мынӥзы. Дӥськут дизайнэн тунсыкъяськись пиналъёсын Дарали Лели ужаз, театр ӧрез Василий Ушаков нуиз, эстрада ӧрез – Вероника Фёдорова, журналистика ӧрез - Мария Галеева.

Асьмелэн милям Туй агаймы вань, со кызьпу туез нуиз, со ини туэ 13-тӥ арзэ «Усточикарын» ужаз, кылем арын «Шундыкарын» ужаз – Алексей Шагиев. Фольклорез милям нуиз лагерьмылэн директорез Фанил Нуриславмович Нуриахметов
Ирина Самигулова, Башкириысь Историяя но лулчеберетъя удмурт центрлэн кивалтӥсез

Лагерез ворсан ужрадын котькуд отряд аслаз ужъемышеныз тодматӥз. Котькуд пинал анай-атайёс, дышетӥсьёс, гурт калык азьын тодонлыкъёссэ, быгатонлыкъёссэ возьматӥз.

Со сяна, Ирина Самигуловалэн верамезъя, «Усточикарлэн» сямаз пыриз ни кыӵе ке но гуртын концертъёс возьматон.

Туэ соос Вязовка гуртэ ветлӥзы, возьматӥзы концертсэс. Отчы тоже туж трос калык люкаське: олокытысь-олокытысь кыдёкысь но анай-атайёссы лыкто адӟыны нылпиоссэс, огшоры гуртысь калык но лыктэ, ёросъёсысь калыкъёс но лыкто. Со но сыӵе, кызьы шуод ни, трамплин пиналъёслы возьматыны ужзэс
Ирина Самигулова, Башкириысь Историяя но лулчеберетъя удмурт центрлэн кивалтӥсез

Тросэз пиналъёс «Усточикаре» кыкетӥзэ но, куинетӥзэ но лыкто. Радъясьёс солы пумит ӧвӧл.

«Усточикаре» одӥг пол лыктӥз бере пинал, солэн одно ик лыктэмез мед потоз. Лыктэмез потымтэ бере, лагерьлэн мар емышез луоз? Соин куд-ог пиналъёсмы вань, арессы вуиз ни, шуом, дышетскыны кошкыны, экзаменъёс, маръёс, но соос шуо, потэ лыктэммы, ми пумит ум луиське. Со нылпиез тодӥськом ке яркытэн, ассэ возьматыны быгатӥсен, малы уд басьты, басьтӥськом. Вожатойлэн юрттӥсез луо соос азьлапалан, собере луо соос вожатой соос пӧлысь ик тросэз
Ирина Самигулова, Башкириысь Историяя но лулчеберетъя удмурт центрлэн кивалтӥсез

Со дыре ик куд-огез пиналъёс «Усточикаре» марзэ созэ валатэк вуо. Ирина Самигуловалэн верамезъя, лагере шедён понна вожвылъяськонэз школаосын радъяло. Но луэ озьы но, конкурсын вормись пинал пӧртэм мугъёсъя лыктыны уг быгаты, соку ини басьто сое, кин быгатэ.

Конкурсмы милям лябгес ай, со ласянь ужано, солы сюлэм шуг. Туэ вераським со сярысь, вуоно арлы одно ик со конкурсэз кыӵе ке но ответственно, серьёзно карыса, дышетӥсьёсын вераськыса лэсьтыны, пинал точно мед тодоз. Ӧнерчиос но тани али секытгес луэ шуо, ку нылпи номыр но тодытэк, валатэк, кытчы вуэмзэ вуэ, ӧрез бырйыны секыт луэ
Ирина Самигулова, Башкириысь Историяя но лулчеберетъя удмурт центрлэн кивалтӥсез

Мукет ласянь, лагерь нылпиослы быгатонлыкъёссэс шараяны юрттэ. Татын со валаны кутске, мар солы тунсыко, кыӵе ужен солэн выремез потэ, шуэ Мрина Самигулова. 

Шуом, пинал кырӟаны быгатэм вылэм, но со уг тоды вылэм, уг кырӟа вылэм нокытын, нош татын лыктӥз, адӟиз. Со, оло, эстрадаын но ӧй вал - киужен выриз, маин ке но лэсьтӥськиз, шуом, но кылӥз, кызьы адямиос кырӟало, кызьы дышетско, вуоно араз со лыктоз, оло, кырӟаны. <…> Котьку но ми шуиськом: «Усточикар» пиналэз воштэ. Пинал мукет луыса бертэ. Соос асьсэос ик «воксё мукет дуннеын кать улӥськом» шуо
Ирина Самигулова, Башкириысь Историяя но лулчеберетъя удмурт центрлэн кивалтӥсез

Туэ лагерез радъясьёслы сюлмаськонъёс куазь но ваиз: дас нуналзэ ик кезьыт, зоро улӥз. 

Туж трос сюлмын сюлмаськонъёс вал, кызьы меда пиналъёс чидалозы, уз кынме-а, бертэмзы уз поты-а, но одӥг пинал но ӧз кошкы, одӥгез но висьыны ӧз усьы. Туж шумпотӥськом, одӥг пол но «скорой» ӧм ӧтчалэ, со но туж бадӟым шумпотон ми понна
Ирина Самигулова, Башкириысь Историяя но лулчеберетъя удмурт центрлэн кивалтӥсез

Быгатонлыко удмурт пиналъёслы «Усточикар» лагерь Башкириын 17-тӥ ортчиз ни. Туэ сое Башкириысь удмуртъёслэн лулчеберетъя йӧскалык огазеяськонзы, Историяя но лулчеберетъя удмурт центр, Татышлы ёросысь егитъёсын ужан политикая но спортъя ёзэт радъязы.

Тодэ вайытом, 17-27 гудырикошконэ Удмуртиын «Шундыкар» улосвылкуспо лагерь ортчоз



Наверх
Вниз