Ижкар+5 °C
21 куарусён 2019 Кӧснунал
16+

Федерал грант утэм ӵектосэз улонэ пыӵатонэ пыриськыны дась луэмзэс веразы Пичи Пурга ёросысь гуртоос

  • 641
  • 0
Баграш-Бигра / Удмуртия
Федерал грант утэм ӵектосэз улонэ пыӵатонэ пыриськыны дась луэмзэс веразы Пичи Пурга ёросысь гуртоос
Туспуктэм: vk.com (МО "Баграш-Бигринское")

Пичи Пурга ёросысь Баграш-Бигра гуртысь калык грант утэм «Деревня, где живёт Шӧртчи» ӵектосэз улонэ пыӵатонэ пыриськыны дась луэмзэ вераз. Радъясьёс калыкен юалляськон ортчытӥзы, малпанъёссэс, ӵектонъёссэс тодӥзы. Со сярысь ивортодэтъя «Удмуртия» агентстволэн корреспондентэзлы юалляськонэз огез радъясь, ёрос лыдӟетъюртысь ӧнерчи Елена Абдрахманова вераз.

Юалляськонэ гуртысь 100 адями пыриськиз (75 нылкышноос но 25 воргоронъёс): 79-ез пумиськыса, 21-ез – «Баграш-Бигринское» муниципал кылдытэтлэн «ВКонтакте» мерлыко вотэсысь огинэз пыр.

Тужгес но трос 46-60 аресъемъёс вал (43 адями). Вань категориос пыриськизы: дышетскисьёс но, студентъёс но, ужасьёс но, арлыдоос но. Соос пӧлысь 75 процентэз – ужась калык. Ӧжытэзтэк ваньзы ӵектосэз улонэ пыӵатон понна дурбасьто. Кык адями гинэ пумит луиз
Елена Абдрахманова, юалляськонэз огез радъясь

Елена Абдрахмановалэн кылъёсызъя, тросэз (100 пӧлысь 71-ез) котырез умоятон ужъёсы пыриськыны дась луэмзэс веразы, 61-ез – «Даур шыкыс» музей юрт бордын ужаны мылкыд каризы. Со сяна туристъёсты пумитаны, удмурт кылэз дышетыны луонлыкъёссэс но шараязы.

Туж тунсыко сӥзёнъёс вал. Юалляськон милемлы мастер-классъёсын лыдметмес паськытатыны луонлык сётӥз. Кылсярысь, одӥг пинал пи пукыӵысь ыбылӥськонъя мастер-класс ортчытыны быгатоз шуыса ивортӥз, одӥг кышномурт сугон керттыны дышето шуиз, эшшо огез бисерен вырыны дышетыны мылкыд кариз
Елена Абдрахманова, юалляськонэз огез радъясь

Озьы ик юаллямъёс калыкез уже кыскыны ӵектонъёссэс но веразы.

Ми соосты санэ басьтӥм. Тросэз шуизы почтаен герӟаськыса ивортӥсь флаеръёс лэсьтоно но соосты котькуд семьяе вӧлмытоно. Уго ваньзы мерлыко вотэсъёсын уг пуко
Елена Абдрахманова, юалляськонэз огез радъясь

Со сяна тросэз егитъёсты уже кыскон бордын тыршыны сӥзизы. Но оглом шонер ужаськоды, калыкез вырӟытӥськоды шуыса пусйизы.

Тодэ вайытом, Пичи Пурга ёрос лыдӟетъюртлэн «Деревня, где живёт Шӧртчи» ӵектосэз Елена но Геннадий Тимченкоослэн Ӟечлэсьтон фондысьтызы 700 сюрс манет утӥз. Солы луыса Баграш-Бигра гуртын вить ёзсӧзнэто-дышетон вӧлметъёс кылдытэмын луозы.

Наши партнеры

Наверх
Вниз