Ижкар+5 °C
21 куарусён 2019 Кӧснунал
16+

«Тамга» удмурт видеошкола ужзэ йылпумъяз Удмуртиын

  • 561
  • 0
Ижкар / Удмуртия
«Тамга» удмурт видеошкола ужзэ йылпумъяз Удмуртиын
Туспуктэм: Алёна Глухова

Удмуртиын «Тамга» видеошкола ужзэ йылпумъяз. Со улсын тодмо удмурт кырӟасьёслы Иван Белослудцевлы но Алексей Пикулевлы «Тӧл» кырӟанзыя видеоклип лэсьтӥзы. Со сярысь ивортодэтъя «Удмуртия» агентстволэн корреспондентэзлы «Куара» огинлэн тӧроез, видеомонтаж ӧрен кивалтӥсь Влад Степанов вераз.

Курсъёс толэзь ӵоже кыстӥськизы. Нырысь кӧня ке лекциос мынӥзы, собере ини практика борды кутскизы. Нош видеоклипез лэсьтыны нимысьтыз Пичи Пурга ёросысь Курег гуртысь «Курег азбар» коммерции луисьтэм огазеяськонэ потазы. Влад Степановлэн верамезъя, курсъёсы пыриськисьёс уж борды туж мыло-кыдо, вань кужымзэс сётыса кутскизы, тыршизы.

Быдэс нунал снимать карыны, эшшо ик нырысьсэ, со капчи ӧвӧл. Но ваньзы чидазы, жадемын вал ини ке но, быгатӥзы. Ваньзэ, вазь ӵукна лыктыса, 15 час ӵоже лэсьтыны пӧрмытӥм
Влад Степанов, «Куара» огинлэн тӧроез, «Тамга» видеошколаысь видеомонтаж ӧрлэн кивалтӥсез

Ӵектос улсын лэсьтэм видеоклипен 13-тӥ куарусёнэ тодматскыны луоз

Видеошколалэн ужез куинь ӧръя радъяськиз: сценарий гожтӥсьёс, операторъёс но монтаж бордын тыршисьёс. 28 вазиськисьёс пӧлысь котькуд ӧре быдэн ньыль адямиез бырйизы. Сценарий гожъясьёсын удмурт кылбурчи, филолог, журналист Анастасия Шумилова ужаз. Операторъёсты моушн-дизайнер но видео лэсьтон бордын тыршись Пётр Иванов дышетӥз, нош монтажёръёсты - «Куара» огинлэн кивалтӥсез Влад Степанов.

«Тамга» видеошкола удмурт видеоконтент бордын ужасьёсты дасян понна кылдытэмын вал.

Мыным потэ ӵектос улсын кылдӥз одӥг команда, кудӥз азьланяз но ужалоз милям ӵектосъёсмыя. Малы ке шуоно милям вань ужасьёслы кулэяськонмы, видеоматериалмы но чаклам съёмкаосмы. Соин ик соос одно ик ми доры нош лыктозы
Влад Степанов, «Куара» огинлэн тӧроез, «Тамга» видеошколаысь видеомонтаж ӧрлэн кивалтӥсез
 

Радъясьёс «Тамга» ӵектослэн азьланез сярысь но малпасько ини. Кылсярысь, Влад Степановлэн кылъёсызъя, умой луысал тол но гужем видеошкола радъяны, кытын рос-прос удмурт видеоконтент бордын ужаны быгатысалзы.

Потэ тросгес практика: милям но, адямиослэн но. Сыӵе учыръёс, кудъёсыз практикаын пумиськыло, соосты воштыны нокызьы но уг луы. Озьы тросгес опыт луысал: соослы но, милемлы но. Тросгес продукт но лэсьтыны пӧрмысал. Эшшо но умойгес луысал на, кытын ке ортчысал ке сыӵе медиа смена. Нош кыӵе ке лагере выжысалмы ке, ми быгатысалмы на отчы ӧнерлыко адямиосты ӧтьылыны. <…> Ӵектослэн сыӵе азинсконэз милемлы туж тунсыко потэ
Влад Степанов, «Куара» огинлэн тӧроез, «Тамга» видеошколаысь видеомонтаж ӧрен кивалтӥсь
 

Тодэ вайытом, «Куара» огинлэн «Тамга» ӵектосэз Удмуртиысь йӧскалык политикая министерстволэсь субсидизэ басьтэмлы луыса улонэ пыӵаз

Ватсалом, Удмуртиын анай-атайёс понна «Аныкай» удмурт медиашкола ужаны кутске.

Наши партнеры

Наверх
Вниз