Ижкар+5 °C
21 куарусён 2019 Кӧснунал
16+

Бесланын терактын быремъёсты буре вайизы Ижкарын

  • 510
  • 0
Ижкар / Удмуртия
Бесланын терактын быремъёсты буре вайизы Ижкарын
Туспуктэм: Елена Перевощикова

Ижкарын улӥсьёс Бесланын теракт дыръя быремъёсты, террористъёсын сӧсыртэмъёсты но кужымо но ожгар ёзэсъёсын службазэс нуыку быремъёсты буре вайизы. Удмуртилэн шоркараз ортчем «Капля жизни» огъяросси акцие ивортодэтъя «Удмуртия» агентстволэн корреспондентэз но пыриськиз.

«Капля жизни» огъяросси акция

8 фото

Ижкарын акция интыосысь ожъёсы пыриськемъёслы сӥзем синпелет дорын ортчиз. Отчы вылӥ дышетсконниосысь, колледжъёсысь но техникумъёсысь студентъёс, эрикрадэз утись ёзъёсын ужасьёс, тӧрлыкъёслэн но мер огазеяськонъёслэн ыстэм муртъёссы но вань мылкыд карисьёс пыриськизы.

Терроризм – туала улонын тужгес бадӟымез кышкытлык, куке янгышамтэ муртъёс, соос пӧлын нылпиос но нылкышноос, быро. Соин ик асьмеос ваньмы ӵош кулэ лэсьтыны ваньзэ, таӵе учыръёс медаз луылэ ни шуыса
Олег Гарин, Ижкар думалэн тӧроез

Ужрадын кырӟанъёс чузъяськизы, кылбуръёсын терактлэсь историзэ тодэ вайизы.

Асьмеос тодамы возьытозь, вань луонлык таӵе учыръёс уз берытске ни шуыса
Александр Варшавский, Удмуртиысь физкультурая, спортъя но егитъёсын ужан политикая министр

Ижкар администрацилэн тӧроезлэн мерлыко политикая воштӥсез Дмитрий Чистяков, Удмуртиысь терроризмлы пумитъяськонъя ӧрилэн аппаратэныз кивалтӥсь Олег Кузнецов но ожысь, ужысь, ожгар кужымъёсысь но эрикрадэз утись ёзэсъёсысь ветеранъёслэн мер огазеяськонзылэн ёзчиез Шамиль Утешев улосвыламы улӥсьёслы сак луоно, чакласьконо но янгыштэм бырем муртъёсты тодын возёно шуыса пусйизы.

Минут ӵоже чус сылыса, кадетъёс кипыдэсазы ву басьтӥзы но интыосысь ожъёсы пыриськемъёслы сӥзем синпелет дорысь сяськаосты «сектазы». Со «Улон шапыклэн» пусэз луиз, кудӥз 2004-тӥ арын 1-3 куарусёнэ Бесланысь школаын пытсам адямиослы ву тырмымтэез возьматӥз

Бӧрысь акцие мукет пыриськисьёс но сяськаос понӥзы но «Улон шапыкенызы» люкиськизы. Тросэз синвузэс кутыны ӧз быгатэ.

Туннэ пиналъёс кунмылэсь гожъёссэ утем ожгарчиосмылы йыбырттӥзы. Валамон ини, со нунал, куке Бесланын шимес учыр луиз, милям сюлэмъёсамы
Елена Агапитова, Ижкарысь радиоэлектроникая но ивортодэт технологиосъя техникумысь кивалтӥсьлэн дышетон но визьнодан ужъёсъя воштӥсез

Наши партнеры

Наверх
Вниз