2020-тӥ арын Удмуртиын «Пять лучших этнический изданий России» огъяросси конкурс ортчоз. Со сярысь элькунысь печатья но ивортодэт вӧлмытонъя агентстволэн пресс-службаез ивортэ.
Йӧскалык газетъёслэсь ӟечлыксэс эскеронъя вожвылъяськон Ивортодэт вӧлмытӥсь йӧскалык ёзэсъёслэн ассоциацизы кичӧлтэмен Россиысь журналистъёслэн огазеяськонзы но АРС-ПРЕСС юрттэм улсын ортчытӥське. Со йӧскалык изданиослы чаклам Россиын нырысетӥез конкурс луэ. Ужпумез – анай кылъёсты утён но вӧлмытон, йӧскалык печатез азинтон но данзэс будэтон.
Тодэ вайытом, туэ вожвылъяськонэ Россиысь 16 улосвылъёсысь 20 кылъёсын потӥсь 51 изданиос пыриськизы. Удмуртия сётэм куриськонъёслэн лыдзыя азьветлӥсьёс пӧлы пырем сяна, вормисьёс пӧлы но шедиз. «Устоез газет» номинациын «Удмурт дунне» газет вормиз.