Ижкар-9 °C
24 -тӥ толшор 2020 Удмуртарня
16+

«Удмуртия» книгапоттоннилэн кивалтӥсез: ӧвӧл сыӵе ужъёс, кудъёссэ ми лэсьтыны ум быгатӥське

  • 472
  • 0
Ижкар / Удмуртия
«Удмуртия» книгапоттоннилэн кивалтӥсез: ӧвӧл сыӵе ужъёс, кудъёссэ ми лэсьтыны ум быгатӥське
Туспуктэм: Майя Бывальцева

26-тӥ куарусёнэ 2019-тӥ арын Удмуртиысь «Удмуртия» книгапоттонни 100 ар тырмонзэ пусъе. Ужъюртлэн кивалтӥсез Юрий Кузнецов ивортодэтъя «Удмуртия» агентстволэн корреспондентэзлы вераз, кыӵе инты басьтэ туннэ издательство Россиысь книга поттон удысын но кыӵе выль книгаосын шумпоттозы лыдӟисьёссэ та ар пумозь.

Россиысь йӧскалык книгоизданилэн историяз «Удмуртия» издательство басьтэ аслэсьтыз интызэ, малы ке шуоно йӧскалык элькунъёс пӧлысь «Удмуртия» издательство одӥгез нырысетӥез кылдытэмез. Милемын ӵош пусъё 100 ар тырмонзэс башкиръёс, Башкириысь «Китап» издательство, но «Татарской книжной издательство». Мукетъёсыз трослы берлогес кылдытъямын
Юрий Кузнецов, «Удмуртия» книгапоттоннилэн кивалтӥсез

1919-тӥ арын куарусёнэ кылдытэм издательстволы кивалтӥсе Кузебай Гердэз юнматӥзы. Вуонояз арын ини отын 100 пумо изданиос потӥзы – книгаос, газетъёс, журналъёс, плакатъёс. Соос пӧлын Кузебай Гердэн кылдытэм «Малмыж удмуртъёслэн кырӟанъёссы» книга. 100 ар ӵоже «Удмуртия» оглом 91 миллион экземплярлэсь трос тиражен 12 сюрс пала книгаос, учебникъёс но брошюраос поттӥз

Кызьы враз Юрий Кузнецов, ас вакытъёсаз издательствоез трос данъетъёсын пусйизы. 1970-тӥ арын солы Госкомиздатлэсь Горд знамязэ сётӥзы, нош ужъюртлэн кивалтӥсез Пётр Яшин орден Трудового Красного Знамени басьтӥз.

Собере туж чебер пушъетэз вал издательстволэн, кыкетӥ шоканэз-а, мар-а кутскиз, эшшо 80-тӥ аръёсы. Соку издательство пыриськиз пӧртэм-пӧртэм конкурсъёсы, туж пӧртэм трос данъетъёс басьтылӥз, собере Лейпциге но лэзьяллязы издательствоысь ужасьёсты. Собере 2000-тӥ аре потӥз Россиын нырысез региональной энциклопедия – со вал издательство «Удмуртия». Али Россиын одӥгез издательство, кудӥз поттэ нылпиослы лингвистической шудонъёс – ми нырысез но одӥгез туннэ понна. Соин ик вань милям асьме интымы, мон малпасько
Юрий Кузнецов, «Удмуртия» книгапоттоннилэн кивалтӥсез

Издательстволэн ужамез али но синйылтытэк уг кыльы. Туэ, кылсярысь, «Удмуртия» издательство книга поттӥсьёслэн кыказ огъяросси вожвылъяськонъёсазы куинь диплом басьтӥз. Та нуналъёсы Рязаньын йӧскалык книгая «Лыдӟиськись дунне («Читающий мир») улосвылкуспо фестивальын «Мифы, легенды, сказки удмуртского народа» но «Удмурты: тайна тамги» книгаоссэс дипломъёсын пусйизы.

Со сяна, котырес лыдпусэз пусъён нуналэ ӟеч ивор вуиз Россиысь книга поттӥсьёслэн ассоциациысьтызы: «Удмурты: Тайна тамги» но «Музей-заповедник «Лудорвай» книгаоссэс 2018-тӥ ар понна Россиысь 50 устоосыз книгаос пӧлы пыртӥзы. Соин ик одӥг тубат вылэ тубыса, уллань погыльскем уг поты, шуэ Юрий Кузнецов.

Ми валаськом, толло нуналэн, тушак вылын пукыса, кема уд кошкы. Соин ик ар пумозь потозы туж-туж тунсыкоесь книгаос. «Удмуртия» издательстволэн историяз нырысьсэ потоз кык томъем туала удмурт писательёслэн антологизы – проза но поэзия. Потоз туж тунсыко книга - «Удмуртская народная книга». Тани верасько, аслам дыльдые вия! Кыӵе со тунсыко! Ӟазегзэ гинэ учкид ке, чорыгзэ-а, перепечсэ но, дыльды шыр кошке!
Юрий Кузнецов, «Удмуртия» книгапоттоннилэн кивалтӥсез

Озьы ик таяз арын Печатья но калыке ивортодэт вӧлмытонъя федерал агентство юрттэмен Удмуртиысь усточиослэн ужъёсынызы бадӟым книга поттозы - «Секреты удмуртских мастеров». Со сяна, издательстволэн «кӧкыез» но вунэтэмын уз луы.

Ми ведь кылдэмын Сарапулын – удмуртъёслэн куинетӥ съездзылэн нылпиосыз, кудӥз ортчиз 25-29 куарусёнэ Сарапул карын 1919-тӥ арын (отын издательство кылдытон сярысь резолюци кутӥзы - ред.). Сарапул карлы тау карыса, поттомы туэ книга – «Сарапул – жемчужина Прикамья». Мон малпасько, лыдӟисьёсмылы со но туж кельшоз
Юрий Кузнецов, «Удмуртия» книгапоттоннилэн кивалтӥсез

Туэ «Удмуртия» издательство покчи классъёслы удмурт кылъя 9 пумо учебникъёс поттӥз. Выль дышетскон арысен соос школаосын кутыны ӵектэм учебникъёсын федерал лыдметэ пыртэмын

Туннэ «Удмуртия» издательствоын 10 адями ужа. «Могучая кучка», - шуэ Юрий Кузнецов.

Трос адями уг ужа ке но, туннэ понна ӧвӧл сыӵе изданиос, ӧвӧл сыӵе ужъёс, кудъёссэ ми лэсьтыны ум быгатӥське но кудӥз борды ми кутскыны ум дӥсьтӥське. Ваньмыз, мар борды (тьфу, тьфу,тьфу!) кутскиськом, ваньмыз пӧрме кадь
Юрий Кузнецов, «Удмуртия» книгапоттоннилэн кивалтӥсез

«Ми ведь асьме понна гинэ ум ужаське, милям внештатной активамы 400-лэсь уно суредасьёс, дизайнеръёс, авторъёс, учебникъёслэн авторъёссы, историкъёс, этнографъёс. Кинлы гинэ ум вазиське, нокин «уг» шуэмез ӧвӧл. Соин ик туннэ ваньмызлы тау карисько! Тау карисько ветеранъёсмылы, кудъёсыз кыло, тунсыкъясько, жингыръяло, соослэн ӟеч-а, кылъёссы, оло, мар ке уг кельшы-а, ми ваньзэ санэ басьтӥськом, пелямы понӥськом», - пусйиз издательстволэн кивалтӥсез. 

Наши партнеры

Наверх
Вниз