Ижкар+10 °C
19 -тӥ куарусён 2020 Кӧснунал
18+

Патриотической шоу, спорт шудонъёс но йӧскалык эктонъёс: кык праздникез пусъёз Удмуртия 4-тӥ шуркынмонэ

  • 511
  • 0
Ижкар / Удмуртия
Патриотической шоу, спорт шудонъёс но йӧскалык эктонъёс: кык праздникез пусъёз Удмуртия 4-тӥ шуркынмонэ
Туспуктэм: Алёна Селезнёва

4-тӥ шуркынмонэ Удмуртиын Россиысь Калыкъёслэсь огазеяськон нуналзэс пусъёзы но удмурт калыклэн кунлык басьтонэзлы 100 ар тырмон арлы кутскон сётозы. Валтӥсь ужрадъёс сярысь улосвыл тӧро дорын аппарат кенешонын вераськизы.

Удмуртилэн кунлыкезлы 100 ар тырмон арлы кутскон улосвыллэн азьвыл шоркараз - Глазкарын – сётозы. 4-тӥ шуркынмонэ отын «Глазов Арена» йӧ дворецын бадӟым сӥё-дано ужрад ортчоз.

100 ар тырмонэз пусйыны вань пӧртэм луонлыкъёс пӧлысь ми капчизэ ӧм ке но, милям учкеммыя, тужгес пайдалыкозэ бырйим. 100 ар котырес лыдпусэз ми нимысьтыз ужъюртъёсты, ёросъёсты но каръёсты, удысъёсты но быдэсак элькунмес азинтыны луонлыкез сямен учкиськом
Лариса Буранова, Удмуртиысь йӧскалык политикая министр

Туннэ быдэс элькунысь 110 интыосын тодматон Удмуртилэн кунлыкезлы 100 ар тырмонлы баннеръёс ошылэмын ини. 4-тӥ шуркынмонэ Удмуртия100.рф сайт ужзэ мытоз. Отчы вань ужрадъёсысь иворъёсты пыртозы.

Валтӥсез ужрад Глазкарын – автономимылэн нырысетӥ шоркараз - ортчоз. 4-тӥ шуркынмонэ 16 часын «Глазов Арена» йӧ двореце 2 сюрс 500-лэсь ятыр учкисьёс люкаськозы, ужрадэ 500 пала артистъёс но техника бордын ужась ӧнерчиос пыриськозы, 200-лэсь ятыр волонтёръёс ужалозы
Лариса Буранова, Удмуртиысь йӧскалык политикая министр

Учкисьёс пӧлын дано адямиос, мер огазеяськонъёсысь, промышленность, гурт возёс, коньдэт чотын ужась предприятиосысь но огазеяськонъёсысь ыстэм муртъёс, ужбергатӥсьёс но элькунэн кивалтӥсьёс луозы.

Вань мылкыд карисьёс церемониез телевидение пыр учкыны быгатозы. Ужрадысь меӵак эфир нуиськоз. Озьы ик «Мынам Удмуртие» телекомпанимылэн сайтысьтыз учкыны луоз
Лариса Буранова, Удмуртиысь йӧскалык политикая министр

Ужрадэ люкаськем делегациос понна пӧртэм программаос дасямын. Куноосты Глазкарысь музейёсын, синпелетъёсын тодматозы.Со сяна, архивысь интыысь интые ветлӥсь нимысьтыз дасям адӟытон, туспуктэм лэсьтон интыос, элькунлэн кунлыкезлы 100 ар тырмонлы дасям синпельёсын вузкаронъёс радъяськозы.  

Глазкарын сяна, праздниклы сӥзем шулдыръяськонъёс шаерысьтымы ёросъёсын но, каръёсын но радъяськозы. 1-тӥ шуркынмонысен ик пӧртэм ужрадъёс ортчозы ини, кылсярысь, Балезино ёросын «Назад в прошлое» истори квест, Дэбес ёросын калык шулдыръяськонъёс, Сарапулын калык эктонъёсъя конкурсъёс луозы. Вань ужрадъёс Россиын пӧртэм калыкъёс тупаса уло шуыса возьматон малпанэн огазеяськозы.

Ижкарын шулдыръяськонъёс куинь интывылын ортчозы - со Шор площадь, Киров нимо парк но Устинов нимо ёросысь Молодёжной ульчаысь гипермаркет вӧзын.

4-тӥ шуркынмонэ Ижкарын шулдыръяськонлэн радлыкез

Шор площадьын «В единстве - сила» нимо праздник программа ужалоз, пӧртэм арлыдъемъёслы йӧскалыккуспо караоке баттл ортчоз но спортъя площадкаос. Празднике люкаськем куноос асьсэзыз кёрлингын, флорболын эскерыны, скандинав амалэн поръяны, бадӟым боулинген, боччаен шудыны но шальы лэзьяны быгатозы
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

11 часысен 13 часозь пиналъёс но анай-атайёссы понна творчествоя мастерскойёс ужалозы. Куноослы пӧртэм йӧслыкысь ибырвесь мунёос лэсьтыны ӵектозы.

Киров нимо паркын 12 часысен 14 часозь «Содружество» праздник программа ужалоз. Отын творчествоя коллективъёс но лулчеберетъя йӧскалык огазеяськонъёс номеръёссэс возьматозы. Йӧскалык пӧрамъёсын ярмарка радъяськоз. Со сяна, паркын йӧскалыккуспо эктон флешмоб ортчытозы. Озьы ик «Моя Удмуртия» фотоконкурсын вормисьёсты пусъёзы.

Устинов ёросын «Народное единство» программа дасязы, шулдыръяськон 13 часысен 15 часозь мыноз. Ужрадлэн валтӥсь куноез Удмуртиысь калык артистка, Россиысь дано артистка Валентина Пудова луоз.

13 часын Ижкарысь вань куинь площадкаос Удмуртиын улӥсь калыкъёслэн тямыс крезьгуръёссы улсын йӧскалыккуспо берганэ огазеяськозы
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез



Наверх
Вниз