Ижкар+2 °C
28 -тӥ коньывуон 2021 Покчиарня
18+

Сергей Маев генерал-полковниклэсь нимзэ сётӥзы Удмуртиысь школалы

  • 829
  • 0
Можга / Удмуртия
Сергей Маев генерал-полковниклэсь нимзэ сётӥзы Удмуртиысь школалы
Туспуктэм: Елена Перевощикова

25-тӥ коньывуонэ Можгаысь 10 номеро школалы Сергей Александрович Маев генерал-полковниклэсь нимзэ сётӥзы. Сиё-дано ужрадэ ивортодэтъя «Удмуртия» агентстволэн корреспондентэз вуылӥз.

Ужрадэ тӧрлыкъёслэн, удысэтъёслэн но министерствоослэн ыстэм муртъёссы, эшъёсыз, кадетъёс но карын улӥсьёс пыриськизы.

Можгаысь 10 номеро школалы Сергей Маевлэсь нимзэ сётон

10 фото

Маевлэн кичӧлтэмезъя 2003-тӥ арын Можгаысь 10 номеро школаын кадет классъёс но ожгар автомобилистлэсь клубзэ усьтӥзы. Озьы ик со Можгаысь, Грак но Можга ёросъёсысь мемориал огъетъёсты утьыны юрттэ. Солэн тыршеменыз «Можга» авиаклуб азинтӥське. Сергей Александрович Можгаын Николай Чудотворецлы сӥзем черкез но ожгар комиссариатэз пуктонэ пыриськиз. Озьы ик со анай-атайтэк кылем пиналъёслы но сӧсыръёслы юрттэ.

Сӥё-дано ужрад бере Сергей Маев куноосын ӵош школаысь ожгар данлыкъя музее пыриз. Отын генерал-полковниклэн пинал дырысеныз туннэ нуналозь туспуктэмъёсыныз стендъёс лэсьтэмын.

Пияшъёслэн но нылашъёслэн син азязы та музей но луоз, соос дано адямилэсь нимзэ нуллӥсь школаын дышетскозы, со пиналъёслы шонер сюрес бырйыны юрттоз
Ярослав Семёнов, Удмуртиысь кивалтэтлэн тӧроез

Со пусйиз, Маев огшоры пияш вал шуыса, но сыӵе вылӥе ӝутскыны быгатӥз – со дышетскисьёслы мылкыд сётыны кулэ.

Удмуртиысь Кун Кенешлэн тӧроез Алексей Прасолов генерал-полковниклэсь улонсюрессэ рос-прос дышетыны куриз.

Сергей Маев – асьме удмурт адями, кудӥз аслаз уженыз, аслаз улонэныз быдэс Удмуртимес данъя
Алексей Прасолов, Удмуртиысь Кун Кенешлэн тӧроез

Кун Кенешлэн тӧроез пусйиз, Удмуртия кунысь 23 улосвылъёс пӧлысь одӥгез, кытын егитъёслы атыкай музъемез гажан мылкыд пыӵатон сярысь кат кутӥзы. 

Мылкыд бугырскемын. <…> Сыӵе вылӥ данъян азям бадӟым куронъёс пуктэ. <…> Школалы ним сётон со бадӟым кылкутон
Сергей Маев, генерал-полковник

Озьы ик со вераз, 25-тӥ коньывуонэ Удмуртилэн тӧроеныз Александр Бречаловен пумиськылӥз шуыса. Соос атыкай музъемез гажан мылкыд пыӵатон ужез радъян сярысь кенешизы.

Элькун кивалтӥсьёс лэсьтозы ваньзэ, школа дышетон инъетэзъя вань куронъёслы мед тупалоз шуыса
Сергей Маев, генерал-полковник

10 номеро школалы Сергей Маевлэсь нимзэ сётон сярысь ӵектонэз Можга администрациысь историен но лулчеберетэн герӟаськем кылёсбурез утёнъя ӧрилэн кенешоназ куарусёнэ эскеризы. Нош коньывуонэ дышетсконниез ниманъя пумкылъян кутӥзы. 

Маев Сергей Александрович генерал-полковниклэсь нимзэ сётыны ӵектонмылы солэн дурбасьтэмез милям кармы, школамы понна бадӟым дан
Надежда Вдовина, Можгаысь Кар думалэн тӧроез

Сергей Александрович Маев вордскиз 1944-тӥ арын 13-тӥ пӧсьтолэзе Грак ёросысь 21-тӥ октябрь нимо каргуртын нюлэс дасянын ужасьёслэн семьяязы. 17 аресаз вордскем каргуртысьтыз Омске мынӥз но танково-технической училищее пыриз. Берлогес анай-атаез Можгае улыны выжизы. Генерал-полковник Удмуртилэн дано кунмуртэз луэ, кун данъетъёсыз: «За службу Родине в Вооруженных Силах СССР» III степенё орден, Горд Кизили кык орден, «За заслуги перед отечеством» IV степенё орден, орден Почёта, орден Дружбы, «За военные заслуги» орден, озьы ик удысэт но тодос данъетъёсыз вань.

Ватсалом, Сергей Маев кема аръёс ӵоже Москваын удмуртъёслэн бӧлякенызы кивалтӥз. Али огазеяськонлэн дано тӧроез луэ. 



Наверх
Вниз