100 лет государственности Удмуртии
Ижкар+18 °C
28 -тӥ куартолэзь 2020 Покчиарня
16+

Удмурт блогер Лукерья Шихова: ми туж трос калыкмы понна лэсьтӥськом, но ог-огмес ум ушъяське

  • 1507
  • 0
Хельсинки / Финляндия
Удмурт блогер Лукерья Шихова: ми туж трос калыкмы понна лэсьтӥськом, но ог-огмес ум ушъяське
Туспуктэм: vk.com («Куара» огин)

Удмуртиысь куать удмурт блогеръёс Финляндиын финн-угор калыкъёслэн «Sugrifest» фестивальзы улсын асьме калыклэн лулчеберетэныз, ас блогъёсынызы, ӵектосъёсынызы тодматӥзы. Суоми шаерын пумиськонъёссы, выльзэ усьтонъёссы сярысь ивортодэтъя «Удмуртия» агентстволэн корреспондентэзлы удмурт блогер Лукерья Шихова вераз.

Финляндие Удмуртиысь кылбурчи, кырӟась, Калыкъёслэн эшъяськон юртысьтызы ӧнерчи Богдан Анфиногенов, кырӟась, «Лудорвай» музейысь тодосъя ӧнерчи Анастасия Иванова, «Куара» огинлэн кивалтӥсез Владислав Степанов, журналист, кылысь кылэ берыктӥсь Лукерья Шихова, «Истаудмурточки» марафонэз радъясь Вера Трефилова но дышетӥсь, кылбурчи Мария Галеева вуылӥзы.

Сыӵе луонлыксы Суоми шаерысь дышетонъя но лулчеберетъя министерство юрттэм улсын «Финляндия - Россия» огазеяськонэн радъям финн-угор но самоди кылын гожъяськись блогеръёс пӧлын вожвылъяськонын вормемзылы луыса кылдӥз. Удмуртиысь егитъёс сяна, ас калыкъёсынызы, лулчеберетэнызы карел, саам, коми-пермяк, пор, ханты, ненец, мокша но эрзя калыкысь потэмъёс тодматӥзы. 

Нырысетӥ нуналаз ми тодматским ваньмы, кин пыриськиз. Адямиос асьсэ сярысь веразы но, мон котьку сямен валай, ми, удмуртъёс, кылсярысь, 10-15 ар со соцсетьёсын оломар но лэсьтӥськом ини, «Инстаграмын» но ми али крутоесь, нош мукетъёслэн со воксё ӧвӧл на шуыса
Лукерья Шихова, удмурт блогер

Лукерья Шиховалэн верамезъя, мукет калыкъёслэн туж трос кышканъёссы. Соосты сюлмаськытэ, ужзы нокинлы кулэ уз луы, нокинлы тунсыко уз поты шуыса.

Мар милемыз сюлмаськытӥз 10 ар талэсь азьло, ми кышкаса кутским со ужмес, нош соослэн со али. Нош милям со ваньмыз ортчемын ини, ми али туж эрикоесь ини
Лукерья Шихова, удмурт блогер

Финляндиын ортчоно ужрадъёс улсын 13 блогеръёсты пичи группаослы люкизы но кунысь пӧртэм каръёсысь, гуртъёсысь школаосы нуллӥзы. Оглом учкыны ке, мерлыко вотэсъёсысь финн-угор «кизилиос» быдэс Финляндиез ортчизы шуыны луоз. Лукерья Шиховалэн группаез Хельсинки, Тампере, Вантаа, Лаппеенранта, Иматра, Сиппола, Париккала интыосы вуылӥз.

zIzz1BUWuQA.jpg
Фото: Лукерья Шихова ©

Лукерья Шихова финн пиналъёсты аслаз «Инстаграменыз» тодматӥз. Удмурт кылын тросгес гожъяськыны тыршиськом шуыса мадиз. Солэн апаез Мария Галеева «Усточикар» лагерь сярысь вераз.

Тросэзлэн вал, бадӟымъёслэн ини, мылкыдзы дышетыны удмурт кылэз. <…> Ми ваньзылы вераськом вал, милям удмурт кылэз дышетонъя гужем курсъёсмы вань шуыса. Мон чакламъя, тросэзлэн мылкыдзы ӝутскиз. Оло, кин ке но вуоз но
Лукерья Шихова, удмурт блогер

Финляндиысь школаос удмурт блогеръёсты асьме школаослэсь трослы висъяськеменызы паймытӥллям. Кылсярысь, Лукерья Шиховалэн верамезъя, покчи классъёсын дышетскись пиналъёс школаетӥ пыдкуксэс куштыса ветло. Котькуд урок бере вань дышетскисьёсты, куазь шоры учкытэк, одно ик ураме потыны, тӧлатскыны косо. Дышетскон понна финн пиналъёслы школаосын ваньзэ сёто.

Музыкая урокъёсазы соослэн вань инструментъёссы классазы вань, соослэн вань барабанъёссы, ваньмыз озьы пуктэмын, тон кыӵе ке группаын кырӟаськод кадь. И соос весь вошъясько но ваньмыныз шудо, даже бас-гитараен. <…> Кӧня удмурт группа луысал, милям озьы луысал ке. Соизлы мон пайми
Лукерья Шихова, удмурт блогер

Со сяна, соосты туж паймытэм пиналъёсты урок дыръя телефонъёсазы, ноутбукъёсазы бугыръяськыса пукемзы понна алымтэзы но. Соос озьы но пал пельынызы кыло, шуо, пе, дышетӥсьёссы.

Машае (Галеева - ред.) шуэ, милям ваньзэ косо карыны, озьы кар, тазьы кар, но милям, наоборот, уг кылзо. Нош соослэн мукет. Но мыным кельшиз, соос ми выступать карыку, ваньзы телефонзэс палэнэ понӥзы шуыса
Лукерья Шихова, удмурт блогер

Школаос сяна, блогеръёслы Хельсинкиысь «Ооди» выль лыдӟетъюрт сюлэмъёсазы пырем. Ужъюрт нырысетӥ арзэ гинэ ужа ай. Лукерья Шиховалэн кылъёсызъя, отчы пырон азьын ик солэн ӧсъёсыз ваньмызлы усьтэмын шуыса гожтэмын азьмуртъёс дорысен кутскыса, ужтэм муртъёс дорозь.

Отын куинь этаж книгаосын, эшшо вань отын 3D принтеръёс, дунтэк, вань маке мында крутой планшетъёс, компьютеръёс, кытын озьы ик адямиос, дизайнеръёс быгато пукыны но ужаны, суредаськыны. Эшшо отын кытын ке но инструментъёс вань, пе, но инты, кытын группаослы яра репетировать карыны
Лукерья Шихова, удмурт блогер

RZZliqogD9I.jpg
Хельсинкиысь «Ооди» лыдӟетъюрт                                                                                                                    Фото: Лукерья Шихова ©

Оглом вераса, финн-угор калыкъёслэн «Sugrifest» фестивальзы улсын ортчем ужрадъёс, финнъёслы сяна, асьсэлы блогеръёслы но бадӟым пайда вайизы. Ог-огзылы выльзэ усьтыны, выль тодон-валан басьтыны юрттӥзы.

Мар вал тужгес но кулэез та пумиськонын: мон валай, удмуртъёс туж трос калыкмы понна оломар но лэсьто, но ог-огмылы ми ӵемысь ум вераське, кыӵе тон ӟечок шуыса, ум ушъяське. Нош татын мынам вань удмуртъёсты ӟыгыръям потэ вал, кыӵе ми ваньмы золэсь но быгатӥсесь шуыса, кыӵе бадӟым уж лэсьтӥськом
Лукерья Шихова, удмурт блогер

Лукерья Шиховалэн кылъёсызъя, палэнысен тужгес но умой адӟиське тыршемзылэн емышез но.

Финнъёслэн синъёссыя валамон вал, соос милемлы но милям ужмылы синмаськыса быремын. Соос озьы ик шуизы: кызьы тӥляд йырады сомында оломар но шукке но кызьы тӥ ваньзэ лэсьтыны вуиськоды?
Лукерья Шихова, удмурт блогер

Тодэ вайытом, финн-угор но самоди кылын гожъяськись блогеръёслэн конкурсазы оглом 57 вазиськонъёс вуизы, 13 вормисьёс пӧлысь витез удмуртъёс вал.



Наверх
Вниз