100 лет государственности Удмуртии
Ижкар+18 °C
28 -тӥ куартолэзь 2020 Покчиарня
16+

Лазер флешмоб но выль ӵектосъёс: 2 сюрс 500 адями «Удмуртия огазея!» возьматонэ пыриськиз Глазкарын

  • 911
  • 0
Глазкар / Удмуртия
Лазер флешмоб но выль ӵектосъёс: 2 сюрс 500 адями «Удмуртия огазея!» возьматонэ пыриськиз Глазкарын
Туспуктэм: Руслан Нуриахметов

Удмуртилэн кунлыкезлы 100 ар тырмон арез усьтон улсын 4-тӥ шуркынмонэ Глазкарын «Удмуртия огазея!» гражданско-патриотической возьматонэз 2 сюрс 500 адями учкиз. Шулдыръяськонэ элькунлэн дано кунмуртъёсыз, лулчеберетъя йӧскалык огазеяськонъёслэн азьветлӥсьёссы, ужысь ветеранъёс, спортсменъёс, ужбергатӥсьёс, эрикрадэз утисьёс, улосвыл кивалтӥсьёс но иворъёсты вӧлмытӥсьёс вуизы.

«Удмуртия огазея!» возьматон ортчиз Глазкарын 4-тӥ шуркынмонэ


Возьматонэз дасян бордын кӧня ке толэзь ужазы. 4-тӥ шуркынмонэ «Глазов Арена» йӧ дворецын 200-лэсь трос волонтёръёс, 500 артистъёс, техникъёс ужазы

Радъясьёс шоулэсь пуштроссэ кутскытозяз ватыса возизы. Нырысетӥез ик эктон учкисьёсты вашкала лулчеберетэ «зымытӥз» но историлэсь питранзэ лэзиз. Собере граждан ож вакытэ секыт улонэз но Вотской автоном областез кылдытонлэн кутсконаз сылэм муртъёслэсь тусъёссэс возьматӥзы.

Озьы ик ужрадын историен герӟаськем кӧня ке ӵектосъёсын тодматӥзы. «Удмуртилэн ошмесъёсыз» элькунысь семьяослэн историзылы сӥземын. Соосты аслаз ӵыжы-выжыосыз сярысь тодонлыкез кельтыны котькуд мылкыд карись гожтыны быгатэ. «Даур. 100 мест Удмуртии» - тунсыко но пусйымон интыостӥ квест, кытчы ар ӵоже вуылы луоз.

Палэнэ ӧз кыле вуоно арлы чаклам бадӟым ужрадъёс но. Театр возьматонэ Тол Бабай, Ижик, Илья Чайковский – крезьгурчилэн атаез - кузпалыныз но мукетъёсыз потӥзы.

Люкаськемъёслы Удмуртилэн тӧроез Александр Бречалов вазиськиз.

Удмурт элькунлэн кунлык басьтэмезлы 100 ар тырмон дорозь одӥг ар гинэ кылиз. Ортчем 99 аръёс элькун понна пӧртэм удысъёсын вормонъёс но азинсконъёс вайизы – дышетонын но тодосын, лулчеберетын но спортын, жжутиськон промышленностьын но гурт возёсын
Александр Бречалов, Удмуртилэн тӧроез

Со пусйиз, асьме музъем вылын улӥсьёслэн устолыксы но ӟеч ужамзы, чылкыт сюлэмо но мылкыдо луэмзы, азьлань вамышъяны тыршемзы Удмуртиез быдэс дуннеын данъяло.

Возьматонэз йылпумъяса, пинал кырӟась Арина Петрова Удмуртилэн кункрезьзэ удмурт но ӟуч кылъёсын быдэстӥз. Куноос лазер флешмобе пыриськыны, крезьгурасьлэн но кылбурчилэн Богдан Анфиногеновлэн выль уженыз тодматскыны быгатӥзы.

Ватсалом, возьматонэ Ижкарысь эктонъя коллективъёс, Глазкарысь творчествоя студиосысь нылпиос, дышетон ужъюртъёсысь егитъёс, театр коллективъёс, калык кырӟанъя но эктонъя ансамбльёс, егитъёслэн огазеяськонъёссы но трос мукетыз пыриськизы. 



Наверх
Вниз