Ижкар+22 °C
11 -тӥ пӧсьтолэзь 2020 Кӧснунал
16+

Ижкар «Россиысь таза каръёс» федерал вожвылъяськонын вормиз

  • 322
  • 0
Ижкар / Удмуртия
Ижкар «Россиысь таза каръёс» федерал вожвылъяськонын вормиз
Туспуктэм: Алексей Арзамасцев

Ижкар «Россиысь таза каръёс» («Здоровые города России») федерал вожвылъяськонын вормиз. Со сярысь Ижкар администрацилэн пресс-службаез ивортэ.

Вожвылъяськонлы йылпумъянъёс коньывуон пумын лэсьтӥзы. Конкурслэн ужпумез – таза сиськон, алама сямъёсын нюръяськон, кема аръёс ӵоже етӥз улон, калыкез мугорзэс кыдатонэ кыскон ласянь но уж интыосы тазалыкез юнматон программаосты пыртон удысын тужгес усто ӵектосъёсты шараян.

Ижкарын улонэ пыӵатӥськись «Вместе за здоровьем» ӵектос «Лучший проект по развитию физической активности среди населения» номинациын вормисе потӥз

Вожвылъяськонэ кык ӵектосъёсъя куриськон лэзизы – Индустри ёросысь трос луонлыкъем спорт площадка но Ленин ёросысь «Тропа здоровья» лымшор парк. Озьы ик трос адями понна уно аръёс ӵоже радъяськылӥсь спортъя но тазалыкез кыдатонъя ужрадъёсты лыдэ басьтӥзы. Кылсярысь, 2000-тӥ арысен Ижкарын Тазалыкъя фестиваль ортче. Кылем арын отчы 115 сюрс пала адями пыриськиз.

«Вместе за здоровьем» ӵектослэн ужпумез – кичӧлтонъёсты улонэ пыӵатон понна коньдэтысь уксё басьтыса, Ижкарын улӥсьёслы тазалыксэс кылдытон понна умой луонлыкъёс кылдытон. 

Ленин ёросын нюлэсо интыез умоятон борды 2017-тӥ арын басьтӥськизы. Таяз арын «Южный Парк «Тропа здоровья» ӵектос «Инициативное бюджетирование» вожвылъяськонын вормиз. Солы луыса паркез югыт карон, скандинав амалэн ветлон но куасэн нискылан понна трассаез тупатон, тренажёръёс пуктон ужъёсты азьланьтозы. Ужез туэ 31-тӥ толсурозь йылпумъяны чаклало.  



Наверх
Вниз