Ижкар+22 °C
8 -тӥ гудырикошкон 2020 Кӧснунал
16+

Удмурт кылын вераськонъя «Кубо» клуб усьтӥзы Глазкарын

  • 327
  • 0
Глазкар / Удмуртия
Удмурт кылын вераськонъя «Кубо» клуб усьтӥзы Глазкарын
Туспуктэм: Елена Трефилова

Глазкарын удмурт кылын вераськыны мылкыд карисьёслы «Кубо» клуб усьтӥзы. Со сярысь ивортодэтъя «Удмуртия» агентстволэн корреспондентэзлы клубез кылдытӥсь, «Красное знамя» газетысь журналист Елена Трефилова вераз.

Ижкарын йӧскалык лыдӟетъюртын ужась «Кубо» клуб сярысь Елена Трефилова учырлы луыса гинэ мерлыко вотэсысь тодэм. Солы со тунсыко потэм но Глазкарын но сыӵе ик клуб усьтыны вазиськон гожтэм. Елена Кутасова, «Кубо» клублэн кивалтӥсез, ваньзэ пыр-поч валэктэм.

Мон ас сяменымгес радъяй, малы ке шуоно опытэ бадӟым ини. Мон газетын 29 ар ужасько ини. Пӧртэм шулдыръяськонъёс ортчытъясько. <…> Ачим викторинаосын сценарий гожтӥ. Малпасько, милям форматмы – тунсыко адямиосын пумиськонъёс
Елена Трефилова, Глазкарын «Кубо» клубез кылдытӥсь

Елена Трефилова ачиз ӟуч сямен вераське ке но, ньылетӥ арзэ ини удмурт кылэз дышетэ.

Милям Глазкарын, элькунысьтымы лымшор ёросъёсын ӵошатоно ке, удмурт кыл уг ик чузъяськы. Туж шер удмурт кылэз кылоно. Мыным со воксё уг кельшы. Мон ачим ӟуч ке но, туж сюлмаськисько удмурт кыл понна
Елена Трефилова, Глазкарын «Кубо» клубез кылдытӥсь

Нылпи вакытаз Елена песянайзэ но куре вылэм дышетыны удмурт кыллы, но со пумит кариськем. Соку, 1988-тӥ арын 8-тӥ классын дышетскись нылаш кытын Глазкарын удмурт кылэз дышетыны луэ шуыса юанэн дышетонъя министерствое гожтэт келям.

Со бере мон доры кар роноысь нылкышно вуиз, меӵак министерствое гожтӥсько шуыса тышкаськиз, но со бере мон институтэ курсъёсы ветлыны кутски
Елена Трефилова, Глазкарын «Кубо» клубез кылдытӥсь

Нош рос-прос удмурт кылэз дышетон борды ньыль ар талэсь азьло Глазкарысь дышетӥсьёсты дасянъя кун институтысь доцентлы, дышетсконниын дунтэк курсъёсты нуись Ольга Никифоровалы луыса басьтӥськем. Ӵапак отын ик али кылдытэм «Кубо» клубе ветлӥсьёсын но тодматскем.

Милям отын пӧртэм арлыдъем нылкышноос. Вань мӧйыос но, вань мон быдӟаос но. Ми Ольга Петровналы (Никифорова –ред.) луыса сокем эшъяським, милемлы ӧжыт луыны кутскиз институтысь аудиториын гинэ пуконъёсмы. Ми пумиськылыны, Выль арез, вордӥськем нуналъёсмес пусйыны кутским. <…> Ми валам, милемлы дышетэм сяна, вераськыны тунсыко шуыса
Елена Трефилова, Глазкарын «Кубо» клубез кылдытӥсь

Глазкарын «Кубо» клубын нырысетӥ пумиськонзы 3-тӥ шуркынмонэ ортчиз. Сое радъяны лыдӟетъюртысь ӧнерчи Ольга Чиркова юрттӥз. Отчы 17 адями люкаськиз. Соос пӧлысь ньылез – туркмен студентъёс.

Соос дышето удмурт кылэз милям пединститутамы ӵапак Ольга Петровна дорын. Со соослы ӵектӥз, сыӵе клуб усьтӥське шуиз но, соос лыктӥзы. Ми туж шуныт, туж тунсыко вераським
Елена Трефилова, Глазкарын «Кубо» клубез кылдытӥсь

Озьы ик пумиськонэ «Понинское» муниципал кылдытэтлэн тӧроез, «Удмурт Кенеш» огазеяськонлэн ёзчиез Нина Дзюина, «Пумитан» ансамбльысь нылашъёс Анна Волкова но Дарья Богданова но узьыгумыен шудӥсь Агата Овечкина вуылӥзы. Нош вуоно пумиськонэ Елена Трефилова выль тунсыко адямиосты ӧтьыны малпа ини.

Вуоноез пумиськонзы 1-тӥ толсуре 13 часын Калинин нимо урамысь лыдӟетъюртын ортчоз

Елена Трефиловалэн верамезъя, удмурт кылэз дышетӥсьёс чутрак вераны уг быгато, марлы соослы удмурт кыл кулэ, мылкыдзы сюлмысьтызы потэ.

Мон куке пукисько, лыдӟиськисько, удмурт кылъёсты дышетӥсько, мон доре бертӥсько кадь потӥсько, <…> мон сое куке но тодӥсько вал кадь но, вунэтӥ, нош али тодам вайисько, нылъёсы но мынам озьы ик шӧдо
Елена Трефилова, Глазкарын «Кубо» клубез кылдытӥсь

Тодэ вайытом, Ижкарын «Кубо» клуб 1-тӥ коньывуонэ усьтӥськиз. Кылемаз пумиськонэ люкаськемъёс Удмуртиысь тужгес чебер интыос сярысь вераськизы но эктыны дышетскизы



Наверх
Вниз