100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Пичи Пурга ёросысь ожгарчилэсь медальонзэ шедьтӥзы Смоленск улосвылысь

  • 251
  • 0
Куреггурт / Удмуртия
Пичи Пурга ёросысь ожгарчилэсь медальонзэ шедьтӥзы Смоленск улосвылысь
Туспуктэм: vk.com (Администрация Малопургинского района)

Смоленск улосвылысь Сычёвка кар дорысь Карабаново урочищеысь Пичи Пурга ёросысь Куреггуртысь потэм ожгарчилэсь Фёдор Лебедевлэсь медальонзэ шедьтӥзы. Улосчиосыз Быдӟым Атыкай ожын бырем бӧляксылэсь лысьӧмъёссэ вордскем гуртаз вайыны малпазы. Со сярысь ивортодэтъя «Удмуртия» агентстволэн корреспондентэзлы Пичи Пурга ёросысь Куреггуртлэн старостаез Олег Дыгаев вераз.

Со интыын Ржевско-Вяземской операция ортчиз. Смоленск улосвылысь ожын быремъёслэсь лысьӧмъёссэс утчасьёс бомба пуштэм бервылэз шедьтӥзы. Ӵапак отысь, Олег Дыгаевлэн верамезъя, 177 адямилэсь лысьӧмъёссэс ӝутӥзы. Соос пӧлын Куреггуртысь Фёдор Лебедевлэн медальонэз но вал.

Ёросысь кивалтӥсьёслы ивортӥм, военкоматэ ивортӥм. <…> Нырысь ик гурт калыклы ивортӥм. Соослэсь мылкыдзэс юам. Мар каром шуыса. <…> Калыкен кенешыса, малпанэ вуим, что ми ваём татчы гуртэ
Олег Дыгаев, Пичи Пурга ёросысь Куреггуртлэн старостаез

Олег Дыгаевлэн кылъёсызъя, Фёдор Лебедевлэн ӵыжы-выжыосыз ӧвӧл ини, нылыз но, нунокъёсыз но улонысь кошкемын.

Огезлэн нунокезлэн пиналъёсыз луыны кулэ на шуизы. Соосты али утчаськом. Но шедьтом-а, ум-а
Олег Дыгаев, Пичи Пурга ёросысь Куреггуртлэн старостаез

Ужпум ӵыжы-выжыоссэ шедьтон бордын гинэ ӧвӧл. Бырем ожгарчилэсь лысьӧмъёссэ но вайыны уз луы, дыр, шуэ староста.

Бомба усем бервылын 177 адями одӥг азе куямын вылэм. Отысь шедьтэмын сое. Соин сэрен лысьӧмъёссэ вайыны ум быгатэ, дыр. Некызьы луоз сомында мурт пӧлысь сое утчаны
Олег Дыгаев, Пичи Пурга ёросысь Куреггуртлэн старостаез

Соин ожгарчиослэсь лысьӧмъёссэс шедьтэм интыын ик ватозы, нош Куреггуртэ со интыысь музъемез вайыны тыршозы. 

Тодэ вайытом, Удмуртиын улӥсьёсты Россиысь ожгар кужымъёслэн Валтӥсь храмзылэн интывылаз Вормонлэн 75 ар тырмонэзлы пуктӥськись «Дорога памяти» мемориал огъетлэсь мультимеди галереязэ кылдытонэ пыриськыны ӧтё



Наверх
Вниз