Ижкар-10 °C
27 -тӥ толшор 2020 Вордӥськон
16+

Удмурт кылэз дышетон но ивор вӧлмытӥсь йӧскалык ёзэсъёслэн ужан луонлыкъёссы сярысь вераськизы «Удмурт Кенешлэн» Пичи кенешаз Ижкарын

  • 628
  • 0
Ижкар / Удмуртия
Удмурт кылэз дышетон но ивор вӧлмытӥсь йӧскалык ёзэсъёслэн ужан луонлыкъёссы сярысь вераськизы «Удмурт Кенешлэн» Пичи кенешаз Ижкарын
Туспуктэм: Анжелика Тихонова

13-тӥ шуркынмонэ «Удмурт Кенеш» огазеяськонлэн Пичи кенешаз удмурт кылэз дышетонэз, ивортодэтъёсты вӧлмытӥсь йӧскалык ёзэсъёслэсь улон-вылонзэс, «Мынам Удмуртие» телеканалын йӧскалык программаослы саклык висъямзэс но мукет ужпумъёсты сэрттӥзы-пертчизы. Вераськон туж тыро-пыдо пӧрмиз. Кылзӥсьёслэсь трос гинэ юанъёс но ӵектонъёс чузъяськизы.

Удмуртиысь дышетонъя но тодосъя министр Светлана Болтникова анай кылъёсты дышетон сярысь вераз. Солэн кылъёсызъя, та дыре соосты федерал стандартлэн куронъёсызъя но дышетонъя федерал кат вылэ пыкъяськыса дышето. Со сяна, табере анай-атайёс асьсэос быръё, кыӵе кылэз пиналзы дышетоз.

Воштӥськонъёслы луыса, адямиослэн анай кылзэс, соос пӧлын ӟуч кыл но, дышетыны луонлыксы вань. Табере анай-атайёс быръё, кыӵе кылэз дышетоз пиналзы
Светлана Болотникова, Удмуртиысь дышетонъя но тодосъя министр

Туннэ удмурт кылэз анай кыл шуыса элькунысь 191 школаосын 17 сюрс 495 пиналъёс дышето. Кылем дышетон арен ӵошатоно ке, со 963 адямилы ӧжытгес луэ.

Светлана Болотниковалэн верамезъя, туэ удмурт кылэз дышетӥсьёслэн лыдзы Балезино, Якшур-Бӧдья, Кияса, Глаз, Юкаменск ёросъёсын, Ижкарын йылӥз. Но со вакытэ ик Шаркан, Пичи Пурга, Можга, Эгра, Алнаш ёросъёсын но Глазкарын – кулэсмиз.

Кенеше люкаськемъёс министрлы трос гинэ юанъёс сётӥзы. Кылсярысь, калыкез пиналъёслэн нылпи садъёсын ӟучомемзы, удмурт кылъя электрон учебникъёсты уже кутон, бускель улосвылъёсын удмурт кылэз дышетон сюлэмшугъяськытэ.

«Удмурт Кенешлэн» азьвыл кивалтӥсез Игорь Семёнов элькунын дышетонъя катын школаосын удмурт кылэз дышетон понна кылкутон сярысь статьяез мед луоз вылэм шуыса малпанзэ шараяз. Светлана Болотникова сыӵе воштӥськонъёсты федерация пыр гинэ пыртыны луоз шуыса валэктӥз.

Пумиськонэ Удмуртиысь печатья но калыке ивортодэт вӧлмытонъя агентстволэн выль кивалтӥсез Александр Валов но пыриськиз. Со элькунысь йӧскалык СМИ-ослэн улон-вылонзы пумысен вераськиз.

Солэн верамезъя, туннэ Удмуртиын 7 изданиос удмурт кылын но ёрос газетъёс бордын 8 приложениос пото. Со сяна, удмурт но бигер кылъёсын «Мынам Удмуртие» телеканал ужа.

Озьы ик ми тыршиськом вань ӵектосъёсамы, кытын луонлык вань, кык кылэз кутыны. Кылсярысь, кунлыклы 100 ар тырмонлы ивортодэтъя «Удмуртия» агентстволэн инъетаз лэзем Удмуртия100.рф портал но кык кылын лэсьтӥське
Александр Валов, Удмуртиысь печатья но калыке ивортодэт вӧлмытонъя агентстволэн кивалтӥсез

Кивалтӥсьлы ёрос газетъёсысь удмурт ватсэтъёслы юрттэт сётон пумысен вазиськизы.

«Мынам Удмуртие» телерадиокомпанилэн ужаменыз ужъюртлэн кивалтӥсез Марина Городилова тодматӥз. Солэн верамезъя, быдэс нунал ужась элькун телеканалэз Россиын тужгес вӧлмем «Триколор» но «Телекарта» спутник антеннаос пыр учкыны луэ. Со сяна, цифра амалэн ужась телевизор возисьёс 29-тӥ шуркынмонысен программаосты «Общественное телевидение России (ОТР)» телеканалысь ӵукна 7 часысен 8 часозь но ӝытазе 18 часысен 19 часозь учкыны быгатозы шуыса ивортӥз. Но нырысь-валысь отын ӟуч программаосты гинэ возьматозы.

Шугъяськон мар бордын. <…> Вань улосвыл каналъёс отчы пыро «Общественное телевидение России» телеканаллэн лицензиез улсын. Нош «Общественное телевидение России» телеканаллэн лицензиез ӟуч кылын
Марина Городилова, «Мынам Удмуртие» телерадиокомпанилэн кивалтӥсез

Марина Городиловалэн верамезъя, йӧскалык кылъёсын но программаос мед луозы шуыса вераськон вал ини, но та дыре тросэз уг на валало, макем со милемлы кулэ.

Соин валче «Удмурт Кенеш» огазеяськон «Общественное телевидение России» телеканаллэн кивалтэтэзлы улосвыл каналъёслы висъям дыре, ӟуч кылын сяна, Россиысь калыкъёслэн кылъёсынызы программаос но пуктылыны вазиськонэн потоз шуыса вераськизы. Та кичӧлтонлы вань кенешчиос дурбасьтӥзы.

Тодэ вайытом, «Удмурт Кенешлэн» Пичи Кенешаз 2020-тӥ арын вань удмуртъёслэсь XIV ӧтчамзэс ортчытон пумысен кенешизы, огазеяськонлэн Данъян книгаяз пыртэм муртъёсты сӥды каризы но Трокай Борисов нимо йӧскалык премиен пусъем экономика тодосъя докторез Юрий Перевощиковез ӟечкылазы.  

Наши партнеры

Наверх
Вниз