Ижкар+15 °C
18 -тӥ куарусён 2020 Удмуртарня
18+

25 ар тырмонзэ пусйиз Удмуртиысь йӧскалык политикая министерство

  • 302
  • 0
Ижкар / Удмуртия
25 ар тырмонзэ пусйиз Удмуртиысь йӧскалык политикая министерство
Туспуктэм: Удмуртиысь тӧролэн но кивалтэтлэн пресс-службазы

27-тӥ шуркынмонэ Удмуртиысь Калыкъёслэн эшъяськон юртазы элькунысь йӧскалык политикая министерстволэн 25 ар тырмонэзлы сӥзем сӥё-дано ужрад ортчиз. Празднике люкаськемъёсты – министерствоын ужасьёсты, лулчеберетъя йӧскалык огазеяськонъёслэсь азьветлӥсьёссэс, Москваысь но мукет улосвылъёсысь лыктэм куноосты улосвыллэн тӧроез Александр Бречалов ӟечкылаз, ивортэ элькун тӧролэн но кивалтэтлэн пресс-службазы.

Улосвыллэн кивалтӥсез Удмуртилэн аспӧртэм йӧскалык тусыныз висъяське шуыса пусйиз. Элькунын 100-лсэь трос выжы калыкъёс тупаса уло. Совето вакытэ кылдытэм инъет берло аръёссы эшшо юнгес луиз, отын Йӧскалык политикая министерстволэн бадӟым ужез адӟиське, вераз Александр Бречалов.

Йӧскалык ужпумъёсъя кун ёзэсъёсын улосвылъёсты лыдъяны туннэ одӥг киысь чиньыос тырмозы. Та удысын 25 ар ӵоже централизованной ужан опытмы асьмелэн гинэ вань
Александр Бречалов, Удмуртилэн тӧроез

Удысэтын ужасьёсын 25 ар талэсь азьвыл пуктэм ужпумъёс пӧлын вал Удмуртиын улӥсь котькуд калыклэсь аспӧртэмлыксэ, йылолъёссэс, гожъяськетсэ, фольклорзэ, осконъёссэ утён. Туннэ Удмуртилэсь йӧскалык политика удысын ужан амалъёсызлы дышетскыны мукет улосвылъёс ыстэм муртъёс дышетскыны ветло.

Ӵапак Удмуртиын кылдӥзы «Брангурт песянайёс», «Пельяньлэн дунневыл нуналэз» выллем ӵектосъёс но кичӧлтонъёс. Нимысьтыз вераме потэ калыккуспо инлык басьтэм «Этнографияя бадӟым диктант» сярысь. Гербер праздник арлы быдэ кӧня ке сюрс удмуртъёсты но Удмуртилэн лулчеберетэныз, сиён-юонэныз тунсыкъяськись адямиосты, асьме но бускель финн-угор улосвылъёсын гинэ ӧвӧл, Москваын но
Александр Бречалов, Удмуртилэн тӧроез

Со элькунлэн нырысетӥ азьмуртэзлэсь Александр Волковлэсь тыршемзэ пусйиз, солы луыса Удмуртиын кунысь устоез Калыкъёслэн эшъяськон юртсы кылдӥз. 

Министерстволэн ужамезъя кутсконаз ик вылӥ куронъёс пуктӥз Светлана Смирнова, али Россиысь калыкъёслэн ассамблеязылэн кивалтӥсез. Огъя ужлы туннэ трос кужымзэс сёто нырысетӥ эксперт кенешлэн ёзчиосыз Владимир Владыкин, Кузьма Куликов. Удмурт кылэз но литератураез азинтонын, соосты туала лулчеберет улонэ пыртонын бадӟым инты басьтэ Зоя Богомоловалэн тодосъя но творчествоя кылёсбурез
Александр Бречалов, Удмуртилэн тӧроез

Йӧскалык политикая министерстволэн ужамезлэсь пайдалыксэ Александр Бречалов лыдпусъёсын возьматӥз: лулчеберетъя йӧскалык огазеяськонъёслэн лыдзы ог ньыль поллы йылӥз – 10-ысен 40-озь; мыло-кыдо адямиослэн лыдзы ялан будэ, пӧлазы пумен тросгес луо йӧскалык но вӧсьлык кусыпъёсты юнматон ӧръя ӵектосъёс бордын ужаны дась егитъёс. 2019-тӥ арын оглом 20 миллион манет тыр ӵектосъёс улонэ пыӵатэмын, со пӧлын грантъёс чотын.

Удмуртилэн тӧроез элькунын «калыкъёслэн эшъяськонзы» валатон ноку но медаз вуны шуыса сӥзиз.

Улосвылын йӧскалык политикаез быдэстон бордын тыршисьёс кун, улосвыл но удыстэт данъетъёс басьтӥзы.

Тодэ вайытом, Удмуртиысь йӧскалык политикая министерство юрттэмен туэ ар пумозь выль ӟуч-удмурт кыллюкам поттозы



Наверх
Вниз