Ижкар+15 °C
18 -тӥ куарусён 2020 Удмуртарня
18+

2 сюрс пала ӵыжы-выжыоссэ шедьтэмез понна Пичи Пурга ёросысь Анатолий Прозоровез йӧскалык премиен пусйизы

  • 763
  • 0
Москва / Россия
2 сюрс пала ӵыжы-выжыоссэ шедьтэмез понна Пичи Пурга ёросысь Анатолий Прозоровез йӧскалык премиен пусйизы
Туспуктэм: vk.com (Администрация Малопургинского района)

Пичи Пурга ёросысь Анатолий Прозоров «Семейная реликвия» йӧскалык преми басьтӥз. Семьялэсь лулчеберет но истори кылёсбурзэ утён но азинтон удысын трос тыршисьёсты пусъён 26-тӥ шуркынмонэ Москваын Россилэн Мер палатаяз ортчиз. Ивортодэтъя «Удмуртия» агентстволэн корреспондентэз шаерчиез данъет басьтэменыз ӟечкылаз но утчаськон-эскерон ужез сярысь юалляськиз.

Премилэн лауреатэзлэсь гадьпуссэ но дипломез Удмуртиысь шаерчилы Иван Конев маршаллэн нылыз Наталия Конева но Россилэн Героез Вячеслав Сивко сётӥзы.

Со шумпотон. Мон тодэмъя, <…> тани таӵе родословной мынам кадь нокытын но ӧвӧл. Малы ке шуоно мынам со систематизировать каремын. Мынам одӥг буквае но, одӥг запятое но огшоры пуктэмын ӧвӧл
Анатолий Прозоров, шаерчи

Туннэ нуналлы Анатолий Прозоров 2 сюрс пала ӵыжы-выжыосыз сярысь иворен но туспуктэмъёсын 200 бамъем 12 альбомъёс лэсьтӥз ини, киын гожъяса 12 книга дасяз. Со куинь летопись нуэ: Прозоровъёслэсь - анай но атай выжыоссыя но Осиповъёслэсь - кузпалызлэн выжыезъя. Вераны кулэ, летописьёсты нуон амалэз Анатолий Иванович ачиз малпаз. 

Анатолий Прозоров 45 ар ӵоже ини семьяеныз Пичи Пурга ёросысь «Юськи» санаторийын улэ, нош вордӥськиз Можга ёросысь Бальӟашур гуртын трос нылпиё семьяын. Семьяязы 10 пиос но кык нылъёс вал, со - тямысэтӥез пинал. Ож бере аръёсы улон капчи ӧй вал, соин семьязылы кун юрттэт сётӥзы. Солы луыса Анатолий пизэс интернатэ интыязы. Отын со будӥз, дышетскиз, но анай-атай юртэныз, агай-апайёсыныз кусыпсэс ӧз ышты. Луонлык кылдыку дораз но бертылӥз. Аръёс ортчыса, агайёсыз кин кытчы кошкизы.

Братъёсмы-сузэръёсмы вань котырамы, но ваньмыз пазьгиськемын. И ог-огмес вань шуыса тодӥськом, но адӟылэммы ӧвӧл. <…> Соин весь кыӵе ке но мӧзмем кадь, адӟеме потэм кадь
Анатолий Прозоров, шаерчи

Сыӵе шӧдонъёсыныз воргорон пинал дырысеныз ини семьяез, выжыез сярысь ивор люканы кутскиз. Мӧйымемезъя – валасагес.

Сомында ини пичиен люкам материалэ, со ведь кытчы ке но так ышоз но, быроз но шуыса, мон сое одӥг пол кутӥ но, рос-прос кариськыса, йӧно-йӧно ужаны кутски соин. Ужаку малпанъёс кылдо. Тани бичаськод но, эшшо умойгес карем потэ кадь, адӟиськымонгес ужед мед луоз кадь. Озьы мынам йырам лыктӥз, туспуктэмъёсын лэсьтоно шуыса
Анатолий Прозоров, шаерчи

Луонлыкъёсъя ваньмыныз али улӥсь ӵыжы-выжыосыныз кусып возьыны тырше, телефон номеръёссэс, адресъёссэс пусйыса кельтэ. Арлы быдэ вордӥськем нуналъёссэс дырпусэ гожъя. Араз, оло, кык-куинь нунал гинэ нокинэ ӟечкылатэк кыле шуыса пусъе.

Котькуд ар гожъясько мон 500-600 адямиез. Одӥг бамаз сомында адями мынам луэ. Уг но тэро соос
Анатолий Прозоров, шаерчи

Ужзэ воргорон одӥг нуналлы но уг дугдытъя. Выль вордӥськемъёсты чакласа возе. Озьы ик вашкалаоссэ но тодыны тырше.

Алигес тани мон шедьтӥ атае ласянь одӥг ветказэ. Али улӥсь семьяез вань али. Мон сое тодӥ, телефонъёссэс шедьтӥ. Сое мон быгатӥсько ини. Со гуртэ мынӥ. <...> Кузпалыным яке огнам мынӥсько. Чиньыеным уг возьматӥськы, ми ӵыжы-выжы луиськом шуыса. Мон весь-вань материалэным мынӥсько
Анатолий Прозоров, шаерчи

Озьы Анатолий Прозоров вань тодэм, шедьтэм ӵыжы-выжыосыныз тодматскыны тырше. Но выль семьяе пыронлэсь азьвыл, туж трос дасяськоно луэ шуыса пусъе.

Мон дасяськисько. Соосыз но дасясько. Мон тыршисько, мыным мед оскиськозы шуыса адямиос. Пичиен-пичиен. Вӧсь карыны медам шедьты. Туж чакласькыса нырысь тодматскисько. Калык пушкысь тодыны турттӥсько, кыӵеесь соос
Анатолий Прозоров, шаерчи

Кутскыкуз туж секыт сётӥське вал, шуэ. Табере али тросэз тодо ини, мар со ужа, соин ик капчигес луиз. 

Анатолий Прозоровлэн туннэ нуналлы тодэм тужгес вашкалаез ӵыжы-выжыез - 1660-тӥ арын вордӥськем Ермак. Со анай выжыезъя луэ.

Нош улон интызыя учконо ке, соос быдэс Россиын вӧлмемын, тросэзгес - Удмуртиын ик. Со сяна, Эстониын, Украинаын выжыяськемъёс вань.

Анатолий Ивановичлэн выжыоссэ эскерон «висёнэз» кык нылпиосызлы но нунокъёсызлы пумен палаське. Соос нырысь ик техника ласянь юрттэт сёто.

«Семейная реликвия» йӧскалык премиез кык ар талэсь азьло Ожгар службаысь ветеранъёслы юрттонъя «Офицерский клуб» мер огазеяськон но Коммерци луисьтэм огъяйӧскалык союз кылдытӥзы. 2019-тӥ арын премия понна вожвылъяськонэ Россилэн 39 улосвылъёсысьтыз 100-лэсь трос куриськонъёс вуизы. Данъетэз 23 улосвылъёсысь 35 адямилы сётӥзы


Наверх
Вниз