Ижкар+15 °C
18 -тӥ куарусён 2020 Удмуртарня
18+

Пинал лётчикъёслэн школаысьтызы нылъёс но пиос курсантлэсь анткылзэ сётӥзы Ижкарын

  • 318
  • 0
Ижкар / Удмуртия
Пинал лётчикъёслэн школаысьтызы нылъёс но пиос курсантлэсь анткылзэ сётӥзы Ижкарын
Туспуктэм: Анжелика Тихонова

9-тӥ толсуре Атыкай музъемлэн Геройёсызлэн нуналазы Ижкарысь школаосысь «Школа юных лётчиков» центре ветлӥсь витетӥ классъёсын дышетскисьёс курсантлэсь анткылзэ (клятва) сётӥзы. Удмуртиысь Калыкъёслэн эшъяськон юртазы ортчем сӥё-дано ужрадэ ивортодэтъя «Удмуртия» агентстволэн корреспондентэз вуылӥз.

«Школа юных лётчиков» центре Ижкарысь пӧртэм школаосысь сюрслэсь ятыр пиналъёс ветло. Атыкай музъемлэн Геройёсызлэн нуналазы ветеранъёс, дышетӥсьёссы, школаоссылэн кивалтӥсьёссы азьын зэмос курсант луыны кыл сётӥзы витетӥ классъёсын дышетскись 75 пиос но нылъёс. 

«Школа юных лётчиков» центрысь курсантъёслэн анткыл сётон ужрадзы

19 фото
 

Курсантлэсь кылзэ 7 номеро школаын дышетскись 11 аресъем Никита Четкарёв но сётӥз. Со пинал лётчикъёслэн школаенызы бадӟым классъёсын дышетскисьёслэн рапорт сётъямзылы синмаськыса тунсыкъяськыны кутскем. 

Мынам потӥз курсант луэме, малы ке шуоно мынам уг поты ымнырыным дэрие усеме, вылӥын воземе мынам потэ. И форма чебер нуллэме
Никита Четкарёв, курсант
 

Пинал лётчикъёслэн школаысьтызы ватсаса тодон-валан сётонъя дышетӥсьлэн Наталья Клабуковалэн верамезъя, анткыл сётонъя сӥё-дано ужрад 1965-тӥ арын центр усьтӥськем дырысен арлы быдэ ортчытъяське.

Та присяга юри тупатэмын Атыкай музъемлэн Геройёсызлэн нуналзылы, малы ке шуоно асьмеос сӥлы кариськом Геройёсыз но, асьмеос дышетӥськом пиналъёсыз. Герой луыны ум, дано адямиос мед луозы соос
Наталья Клабукова, «Школа юных лётчиков» центрысь ватсаса тодон-валан сётонъя дышетӥсь

Анткыл сётэмзы бере пиналъёс курсант луэмзы сярысь сертификат басьтӥзы. Азьланяз соос центрлэн пӧртэм ӧръёсызъя тодон-валанъёс басьтозы, строен ветлыны но трос мукетызлы дышетскозы.

Милям пӧртэм программаосмы вань: юный лётчик, авиатор но пӧртэм-пӧртэм. Соосты дышето лётной ужлы, дасяло егит лётчикъёсты. Берло милям выпускникъёсмы дышетско военной училищеосын яке служить карыны мыно
Наталья Клабукова, «Школа юных лётчиков» центрысь ватсаса тодон-валан сётонъя дышетӥсь

Дышетӥсьлэн верамезъя, курсантъёссы тазалыксыя ваньзы ик ожгар училищеосы пырыны уг быгато, озьы ке но туж тыршо, рос-прос дышетско, пӧртэм ужрадъёсы пырисько. Кылсярысь, центрысь куинез курсантъёссы та нуналъёсы Брестэ Буре ваён вахта нуыны ветлӥзы. 

Курсант луэм пиналъёс лыз буёло, шевронэн, йӧно адӟытӥсь форма нулло. Наталья Клабуковалэн кылъёсызъя, дӥсьсы курсантъёсты дисциплиналы дышетэ.

Форма дӥсяськод ке, тон мукет адями луиськод, тон огшоры нылпи, огшоры пияш яке нылаш гинэ уд луиськы, тон курсант ини, тон кутскиськод ини валаны аслэсьтыд луонлыктэ, мар ке но умойзэ лэсьтыны кулэ луэмзэ
Наталья Клабукова, «Школа юных лётчиков» центрысь ватсаса тодон-валан сётонъя дышетӥсь

Выль курсантъёсты Ижкар администрациысь дышетонъя управленилэн кивалтӥсезлэн визьнодан но ватсаса тодон-валан сётон ужъёсъя воштӥсез Ольга Моторина ӟечкылаз. Озьы ик сӥзёнъёссэс но ӟеч кылъёссэс ветеранъёслэн «Боевое братство» огъяросси мер огазеяськонзылэн улосвыл ёзэтаз пыриськисьёс веразы.



Наверх
Вниз