Ижкар-1 °C
29 -тӥ коньывуон 2020 Покчиарня
18+

Удмурт кылын литература гожтосъёсъя онлайн-вожвылъяськон ялэ Удмуртиысь «Кебит» лаборатори

  • 527
  • 0
Ижкар / Удмуртия
Удмурт кылын литература гожтосъёсъя онлайн-вожвылъяськон ялэ Удмуртиысь «Кебит» лаборатори
Туспуктэм: «Кебит» гожъяськон лабораторилэн пресс-службаез

Удмуртиын «Кебит» гожъяськон лаборатори удмурт кылын литература гожтосъёсъя онлайн-вожвылъяськон ялэ. Со сярысь ӵектослэн пресс-службаез ивортэ.

Вожвылъяськонэ удмурт кылэз тодӥсь 14-35 аресъем егитъёсты ӧтё. Тужгес усто кылбурчиосты, критикъёсты, драматургъёсты, прозаикъёсты но кылысь кылэ берыктӥсьёсты 2020-тӥ арын 6-9 тулыспалэ «Дзержинец» лагерьын дышетсконъёсы быръёзы

Кутскись гожъяськисьёсын куинь нунал ӵоже Россиысь драматург но сценарист Ярослава Пулинович, прозаик но литературая критик Роман Сенчин, Россиысь гожъяськисьёслэн огазеяськонзылэн ёзчиез, кылысь кылэ берыктӥсь, Кореяысь Сеулысь «Чунг-Анг» университетысь профессор Лариса Писарева, озьы ик тодмо удмурт гожъяськисьёс, критикъёс но кылысь кылэ берыктӥсьёс ужалозы.

Егит гожъяськисьёслэн тужгес усто ужъёссы вуоно арын куартолэзе потоно бичетэ пырозы.

Ӵектос удмурт кылэз но литератураез удмурт кылын вераськись егитъёс пӧлын вӧлмытон понна ортчытӥське. Со понна ми егит гожъяськисьёслэсь огинзэс кылдытыны, огазеяны соосты, дышетыны но пыриськисьёслэн тужгес усто ужъёсынызы бичет поттыны малпам, озьы удмурт литератураез пӧртэм жанръем выль произведениосын узырмытыны, туала удмурт литератураын но театрын со али туж уг тырмы
Алина Крестьянинова, «Кебит» гожъяськон лабораторилэн кивалтӥсез

Пыриськисьёслэсь ужъёссэс вить ӧръёсъя куто: кылбурет, проза, драма, критика но кылысь кылэ берыктон. Котькуд ӧрлэн аслаз куронъёсыз вань. Кылбурчиос куинь яке тросгес кылбуръёс келяны кулэ, прозаикъёс – кык яке тросгес веросъёс, драматургъёс – кык яке тросгес пьесаос, критикъёс – кык статья, нош кылысь кылэ берыктӥсьёслы куинь кылбур, кык верос яке одӥг пьеса котькыӵе кылысь удмурт кылэ берыктоно.

Конкурсэ пыриськон понна чӧлсконпусъя анкетаез гожтоно но ужъёсты ватсано. Куриськонъёсты 2020-тӥ арын 15-тӥ толшорозь кутозы. «Дзержинец» лагерьын дышетсконъёсы 40 муртэз быръёзы.

Пусъём, «Кебит» гожъяськон лаборатори Егитъёслэн ужъёссыя федерал агентстволэн (Росмолодёжь) грантэзлы луыса улонэ пыӵатӥське

Тодэ вайытом, Удмуртиысь тӧрлыкъёс егитъёс пӧлын литературая фестиваль но удмурт детективъёсъя вожвылъяськон ортчытонлы дурбасьтӥзы.



Наверх
Вниз