Ижкар+15 °C
18 -тӥ куарусён 2020 Удмуртарня
18+

Удмуртилэн тӧроез элькунысь мыло-кыдо адямиослы «Признание» премиос сётӥз

  • 362
  • 0
Ижкар / Удмуртия
Удмуртилэн тӧроез элькунысь мыло-кыдо адямиослы «Признание» премиос сётӥз
Туспуктэм: Удмуртиысь тӧролэн но кивалтэтлэн пресс-службазы

Удмуртиысь ӟеч но пайдалыко ужась муртъёс но коллективъёс улосвыл тӧролэсь «Признание» премизэ басьтӥзы. Соос пӧлын эмчиос, лулчеберет удысын ужасьёс, спортсменъёс, гуртын улӥсьёс, тодосчиос.

Премиез сётыса, Удмуртилэн тӧроез Александр Бречалов котькудӥзлы умой ужамзы понна тау карон кылъёс вераз.

Ваньзэс, кинэ мон ужась адямиос шуисько, одӥг залэ яке одӥг ролике пыртыны тэрытыны уг луы. Мыным туж удалтӥз, мон со сярысь ялан верасько, мон паймымон улосвылын ужасько, кытын кичӧлтӥсьёс, ас шаерзэс, ас музъемзэс яратӥсьёс туж трос
Александр Бречалов, Удмуртилэн тӧроез

Удмуртилэн тӧроезлэн «Признание» премиеныз пусъён

17 фото

Премиез басьтӥсьёс пӧлын Ижкарысь Наговицын нимо лыдӟиськонниын ужась Анна Кастильо-Мехиа. Кылем арын со Россиысь устоез библиотекарь луиз. Али Ижкарысь нырысетӥяз модельной библиотекаын ужа. Соослэн «БиблиоСтартап» ӵектоссы библиотечной инновациосъя огъяросси конкурслэн дас финалистъёс пӧлы пыриз.

Мон лыдӟиськонниын 10 ар пала ужасько ни. Зэмзэ но, калыклэсь кулэяськонъёссэ валан туж кулэ. Ми нырысь ик адямиосын ужаськомы, книгаосын ум. Ми тунсыко адямиосты шедьтӥськомы, сётӥськом соослы ресурсъёс, луонлыкъёс но ӵектосъёс. Нош соос милемлы азинскыны юртто
Анна Кастильо-Мехиа, Ижкарысь Наговицын нимо лыдӟиськонниысь валтӥсь библиотекарь

Пусъён ужрадын лауреатъёслы лэсьтӥськыны, ӵектосъёсты улонэ пыӵатыны, тӥрлык басьтыны сертификатъёс сётӥзы.

Бадӟым мылкыд вань ке, ас музъемдэ яратӥськод ке, сыӵе ужъёсты лэсьтыны, пуктэм ужпумъёсты быдэстыны луэ, кудъёсыз нырысь ик вормонтэм кадь пото
Александр Бречалов, Удмуртилэн тӧроез

Удмуртилэн тӧроезлэсь «Признание» премизэ куинетӥзэ сёто ни

«Признание» премиез озьы ик басьтӥзы:

- Илья Минеев, Грак ёросысь Юрыксы гуртлэн старостаез, улосчиосызлы-ожгарчиослы буре ваён пулъёс усьтон, ветеранъёслы юртъер котырзэс тупатъяны юрттон сюресъёсты умоятон ужез радъя;

- Юрий Кузнецов, «Техновек» заводлэн кивалтӥселэн воштӥсез, Воткаысь кар думалэн депутатэз, пиналъёслы спортэн вырын юрттэ;

- Александр Корепанов, Эгра ёросысь фермер, солэн тыршеменыз Мувыр гурт кыкетӥ улонзэ адӟиз;

- Константин Трофимов, командаеныз ӵош Можга ёросысь Удмурт Сюгийыл гуртын стадион пуктӥзы;

- Александр Чирков но Андрей Васильев, кӧня ке ар ӵоже ини Эгра ёросын стритболъя ӵошатсконъёс ортчытъяло, ужрадэ быдэс элькунысь тунсыкъяськисьёс люкасько;

- Людмила Кадочникова, Камбарка ёросысь калыклы мерлыко юрттэт сётонъя центрысь нылпи эмъясь;

- Жанна Дмитриева, эктонъя «Бродвей-инклюзив» студилэн кивалтӥсез, 6 арлэсь трос ни сцена вылэ аспӧртэм артистъёсты поттэ;

- Михаил Болтарев но Елена Мельникова, Удмуртиын «Транспорт ветерана» акцилы кичӧлтон сётӥзы;

- Станислав Широбоков, «Красногеройская, 105» ТСЖ-лэн кивалтӥсез, азбарзэс ваньзылы адӟем карымон лэсьтыны быгатӥз но бускельёсты эшъяськытӥз;

- Александр Мустаев, Россиысь дано артист, Удмуртиысь мунё театрлэн сцена вылаз 100-лэсь трос рольёсты шудӥз, солэн тыршеменыз театр искусство азинске, выль кизилиос ӝуатско;

- Богдан Анфиногенов, кылбурчи, туала удмурт кырӟанъёсты быдэстӥсь, аслаз творчествоеныз удмурт лулчеберетэз Россиын но кунгож сьӧрын вӧлмытэ;

- Студентъёслэн «Доброволец» отрядзы (Вильдан Газизов, Леонид Степанов, Альбина Леконцева, Айрат Сахабиев) Красноярск шаерын но Иркутск улосвылын шимучыръёслэсь бервылзэс утялтонэ пыриськиз;

«Калашников» концернлэн коллективез, Ижкарын пинал эскерисьёслы выль юрт – Калашниковлэсь академизэ – кылдытӥз.

Тодэ вайытом, 2018-тӥ арын Удмуртилэн тӧроезлэсь «Признание» премизэ 11 мурт басьтӥз.

Ватсалом, азьвылгес Удмуртиысь кивалтэтлэсь литература премиоссэ басьтӥсьёслэн нимъёссы тодмо луизы



Наверх
Вниз