Ижкар+20 °C
8 -тӥ гудырикошкон 2020 Кӧснунал
16+

Богдан Анфиногенов интернетын удмурт кылын «Даур ТВ» канал кылдытыны сертификат утӥз

  • 772
  • 0
Ижкар / Удмуртия
Богдан Анфиногенов интернетын удмурт кылын «Даур ТВ» канал кылдытыны сертификат утӥз
Туспуктэм: Удмуртиысь тӧролэн но кивалтэтлэн пресс-службазы

Интернет вотэсын удмурт кылын «Даур ТВ» канал кылдытозы. Со сярысь ивортодэтъя «Удмуртия» агентстволэн корреспондентэзлы ӵектослэн авторез Богдан Анфиногенов вераз.

Каналэз кылдытыны малпанэз Богдан Анфиногеновлэн кемалась вылэм ини. Али сыӵе луонлык кылдӥз - удмурт азьветлӥсез улосвыл тӧролэн «Признание» премиеныз но каналэз кылдытыны сертификатэн пусйизы.

Милям ноку но ӧй вал на удмурт кылын уй-нунал чузъяськись каналмы, нош туала вакытэ интернет сыӵе луонлыкъёсты сётэ. Соин ик мынам потэ со бордын ужаме
Богдан Анфиногенов, «Даур ТВ» ӵектослэн авторез

Богдан Анфиногеновлэн кылъёсызъя, «Даур ТВ» каналын интернетысь удмурт кылын пӧртэм видеоконтентэз возьматозы. Озьы ик ас рубрикаоссэс, передачаоссэс кылдытозы.

Нырысь ик со сӥземын егитъёслы, школаын дышетскисьёслы, студентъёслы. Нош зэмзэ ке вераса, котькыӵе аресъем адямилы со тунсыко луоз, малпасько
Богдан Анфиногенов, «Даур ТВ» ӵектослэн авторез

Ӵектос бордын Богдан Анфиногенов «Эктоникаысь» Владислав Горжакен, Пётр Пушкинэн, «Куара» огинысь ӧнерчиосын валче ужаны чакла. Озьы ик бордазы вань мылкыд карисьёс итӥськозы шуыса оске.

Ваньмыз умой пӧрмоз ке, арлэн кутсконаз, толлэн пумаз яке тулыслэн кутсконаз, оло, эфире потом ини
Богдан Анфиногенов, «Даур ТВ» ӵектослэн авторез

Каналэз «ВКонтакте» мерлыко вотэсын яке «Яндекс.Эфир» платформаын лэзёзы.

Тодэ вайытом, Удмуртилэн тӧроезлэсь «Признание» премизэ кылем арняе элькунысь ӟеч но пайдалыко ужась муртъёслы но коллективъёслы сётӥзы



Наверх
Вниз