Ижкар+11 °C
27 -тӥ куарусён 2020 Воскресенье
18+

200 пала адями пыриськиз удмурт анайёслы чаклам «Аныкай» ӵектосэ Удмуртиын

  • 831
  • 0
Ижкар / Удмуртия
200 пала адями пыриськиз удмурт анайёслы чаклам «Аныкай» ӵектосэ Удмуртиын
Туспуктэм: vk.com (Ольга Степанова)

Ижкарын «Куара» мер огазеяськонлэн «Аныкай» ӵектосэз ужзэ йылпумъяз. Удмурт анайёслы чаклам медиашколае 200 пала адями пыриськиз. Со сярысь ивортодэтъя «Удмуртия» агентстволэн корреспондентэзлы ӵектослэн авторез но кивалтӥсез Ольга Степанова вераз.

Мон малпасько, вань люкетъёссэ кутыса, блогъёсы пыриськем нылпиосты учкыса, кызьы ке но 200 котырын луиз, дыр, пыриськисьёсмы
Ольга Степанова, «Аныкай» ӵектослэн авторез но кивалтӥсез
 

«Аныкай» ӵектос сӥзьыл кутсконын ужзэ мытӥз но кӧня ке люкетъёсъя ортчиз. Нырысь ик медиашколаын очной но заочной амалэн дышетсконъёс мынӥзы. Удмурт анайёсты туспуктэмъёс, видео, монтаж лэсьтыны дышетӥзы, блог нуонэн тодматӥзы. Бӧрысь мерлыко вотэсъёсын «Аныкай» марафон ортчиз. Озьы ик ӵектос улсын удмурт семьяосын туспуктэмъёс лэсьтӥзы.

Ольга Степановалэн верамезъя, «Аныкай» медиашколалэн очной амалэн дышетсконъёсаз 15 адями гожтӥськиз. Со пӧлысь 12-ез пумозяз вуиз но йылпумъян ужрадын дышетсконъёсты ортчемез сярысь сертификат басьтӥз.

Шумпотӥськом, милям одӥгез дышетскисьмы, Лилия Широбокова, нылыныз ӵош рос-прос блог кылдытӥз. Кӧня ке выпусксы соослэн потӥз ини. Со сяна, милям озьы ик «Куара» огинысь адямиосмы блог бордын ужало на
Ольга Степанова, «Аныкай» ӵектослэн авторез но кивалтӥсез
 

Озьы ик удмурт кылын видео «Аныкай» марафонэ пыриськисьёс но лэсьтӥзы. Соосты но мерлыко вотэсъёсысь шедьтыны луэ. Ольга Степановалэн кылъёсызъя, марафонэ 60-лэсь трос адями пыриськыны кутскиз вал, со пӧлысь 34-ез вань куронъёсты быдэстӥзы но финалозь вуизы.

Милемлы со туж умой лыдпус луиз, малы ке шуоно заданиосмы капчиесь ӧй вал, тужгес но видео люкетэз. Шумпотӥськомы, интернет табере удмурт кылын 34 видеолы узырмиз
Ольга Степанова, «Аныкай» ӵектослэн авторез но кивалтӥсез

Ӵектослэн кивалтӥсез пусйиз, марафонэ пыриськисьёслэн тросэз ужъёссы туж ӟечлыкоесь, паймымонэсь, синмаськымонэсь пӧрмизы. Тросэз мунёосын кыӵе ке выжыкыл пуктӥзы, нылпиен ӵош киужен выремзэс, кылбур лыдӟемзэс возьматӥзы.

Марафонын валтӥсь кузьымез Ижкарысь Анна Байсарова нылыныз утӥзы. Табере соос быдэс ар ӵоже «Куара» огин юрттэм улсын видеоблог лэсьтон бордын тыршозы. Ӧнерчиос съёмкаос ортчытыны, монтаж лэсьтыны юрттӥськозы.

Азьланезлы «Аныкай» ӵектос бадӟым ужпумъёс пуктэ ини: ёросъёсы потыны.

Куке ми заочной амалэн дышетскисьёслэсь куриськонъёссэс чаклам, тросэз соос пӧлысь, валамон ини, ёросъёсысь вал. Нош заочной амал со материалэ мур пырыны луонлык быдэсак уг сёты. Соин ик вань малпанмы та ӵектосмес ёросъёсын азьланьтыны. Кулэлыкез вань шуыса ми шӧдӥмы
Ольга Степанова, «Аныкай» ӵектослэн авторез но кивалтӥсез

Тодэ вайытом, «Аныкай» медиашколалэн нырысетӥ ужъемышъёсыныз али тодматскыны луэ ини. 



Наверх
Вниз