Ижкар-9 °C
24 -тӥ толшор 2020 Удмуртарня
16+

Йӧскалык кылъёсын передачаосты возьматон сярысь курон келяз Кун Думаысь комитет герӟетъя министерствое но ОТР телеканалэ

  • 535
  • 0
Москва / Россия
Йӧскалык кылъёсын передачаосты возьматон сярысь курон келяз Кун Думаысь комитет герӟетъя министерствое но ОТР телеканалэ
Туспуктэм: Кристина Берестова

Россилэн Кун Думаысьтыз йӧскалык ужъёсъя комитетлэн ёзчиосыз цифровой азинсконъя, герӟетъя но калыке ивортодэт вӧлмытонъя министерствое но «Общественное телевидение России» (ОТР) телеканалэ йӧскалык кылъёсын улосвыл телеканалъёслэсь ужъёссэс ОТР-ын возьматыны ӵектонэн вазиськон ыстӥзы. Со сярысь парламентысь «Огъя Россия» фракцилэн нимлыко сайтаз ивортэмын.

Ми каналэ сыӵе кичӧлтонэн потӥмы ни, озьы ик ивортодэт вӧлмытонъя министерствое но та каналлы со программаосты возьматыны луонлык сётӥсь лицензи басьтон понна
Ильдар Гильмутдиновлэн, Кун Думаысьтыз йӧскалык ужъёсъя комитетлэн кивалтӥсез

Солэн верамезъя, федерал телевещаниын Россиысь лулчеберетъя пӧртэмлыкез возьматон уг тырмы. ОТР телеканаллэн возьматон радлыказ вань часъёс, кудъёссэ улосвыл каналъёслы выжы калыкъёслэн кылъёсынызы программаоссы понна сётыны луэ, пусйиз комитетлэн кивалтӥсез. Озьы ик ватсаз, тунсыко луысал, быдэс кун Россиысь калыкъёслэсь аспӧртэм кылъёссэс, лулчеберетсэс но искусствозэс тодысал ке.

Удмуртилэн Кун Кенешысьтыз тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез, Вань удмуртъёслэн «Удмурт кенеш» огазеяськонзылэн тӧроез Татьяна Ишматова «Фейсбукысь» бамаз ужпум сэрттэмын-пертчемын луоз шуыса оскемзэ вераз. Тодэ вайытом, шуркынмонэ та юанэз огазеяськонлэн Пичи кенешаз эскеризы.

Татьяна Ишматовалэн кылъёсызъя, «Удмурт Кенеш», ОТР-ын йӧскалык кылъёсын передачаосты возьматыны луонлык кылдытыны курыса, Россиысь финн-угор калыкъёслэн ассоциациязы вазиськон келяз. Ассоциацилэн кивалтӥсез Пётр Тултаев федерал телекомапание гожтэт ыстӥз.

Тодэ вайытом, 2019-тӥ арын 15-тӥ оштолэзе Удмуртия цифровой телевещание выжиз, со 20 каналъёсты дунтэк но вылӥ ӟечлыкен учкыны луонлык сётӥз. Но со дыре ик «Мынам Удмуртие» телеканал дышем «5 каналлэн» сеткаысьтыз ышиз. 29-тӥ шуркынмонысен Удмуртиысь передачаосты «ОТР» (Общественное телевидение России) телеканалын учкыны луэ, но али ӟуч кылынъёссэ гинэ. 

Наши партнеры

Наверх
Вниз