Ижкар+20 °C
8 -тӥ гудырикошкон 2020 Кӧснунал
16+

Сюресъёсты лэсьтон но семьяослы юрттон ужпумъёсты ӝутӥзы Удмуртилэн тӧроез уйпал ёросъёсы вуылыку

  • 684
  • 0
Балезино / Удмуртия
Сюресъёсты лэсьтон но семьяослы юрттон ужпумъёсты ӝутӥзы Удмуртилэн тӧроез уйпал ёросъёсы вуылыку
Туспуктэм: Удмуртиысь тӧролэн но кивалтэтлэн пресс-службазы

Удмуртилэн тӧроез Александр Бречалов Выль ар шулдыръяськонъёс бере нырысетӥ ужан нуналэ Балезиное но Глазкаре ужъя вуылӥз. Со интыосысь кивалтӥсьёсын но калыкен пумиськылэмез бере журналистъёслы валтӥсь шугъяськонъёс сярысь вераз.

Улосвыл кивалтӥсьёс муниципал тӧрлык ёзэсъёсын валче Балезино каргуртын ву сётон но ву кошкон сӧзнэтэн шуг-секытъёсты сэрттыны-пертчыны тыршо, со пӧлын федерал коньдэтысь уксёлы, йӧскалык ӵектосэ пыриськемлы луыса но. Озьы ик чакланъёсын Балезино – Сергино, Сергино – Карсовай сюресъёсты тупатъян. Сюреслэсь нырысетӥ люкетсэ туэ выльдозы ини.

Со сяна, Александр Бречалов Балезиноысь Макаровъёслэн трос нылпиё семьяязы вуылэмез сярысь вераз. Соос 2019-тӥ арын мерлыко огкыл гожтӥзы но коньдонэн югдурзэс умоятыны быгатӥзы. Элькунлэн тӧроез пусйиз, со ӵектос туж кулэ шуыса, солы луыса семьяос подсобной хозяйствозэс возьыны коньдон басьтыны, ужбергатонэ нырысь вамыш лэсьтыны быгато.

Мерлыко огкыл – элькунмы понна туж кулэ луись ӵектос луэ шуыса малпасько. Ми кылем арын 6 миллион 800 сюрс манет солы быдтӥм, туэ - 247 миллион манет. Ӵектосъёс трослы паськыталозы, ми со подсобной хозяйствоосты радъянлы саклык висъялом, юрттом сыӵе адямиослы, кинъёс номыр шоры учкытэк ужало, нылпи ваё, будэто, пиналъёссы но соослэн умоесь
Александр Бречалов, Удмуртилэн тӧроез

Озьы ик Удмуртилэн тӧроез «Большой ремонт» ӵектосэз улонэ пыӵатонлы умой дунъет сётӥз. Солы луыса мерлык удысысь вужмем юртъёсты тупатъяло, чебер каро, адямиослы отын шуныт но умой ужаны луэ. Александр Бречаловлэн кылъёсызъя, ӵектос туж азинлыко. 2020-тӥ арын но сое быдэсъянэз азьланьтозы. Озьы ик вуоно арлы но коньдон утчалозы.

Балезино ёросын со ӵектослы луыса 14 юртъёсты тупатъязы. Нырысь ик дышетон юртъёсын липетъёсты но укноосты воштӥзы. Азьланяз электроезъёсты, выжъёсты выльдозы, собере вылзэс тупатъян дорозь вуозы. Но со ужъёслы 10 миллиард манетлэсь трос коньдон кулэ луоз.



Наверх
Вниз