Ижкар+20 °C
8 -тӥ гудырикошкон 2020 Кӧснунал
16+

Дышетонъя «Точка роста» центр усьтозы Юкаменскысь школаын 2020-тӥ арын

  • 493
  • 0
Юкаменск / Удмуртия
Дышетонъя «Точка роста» центр усьтозы Юкаменскысь школаын 2020-тӥ арын

2020-тӥ арын Юкаменскысь шоръёзо школаын цифровой но гуманитарной ӧръёсъя «Точка роста» дышетон центр усьтозы. Со сярысь ёросэ вуылыкуз Удмуртилэн тӧроез Александр Бречалов ивортӥз. Улосвыл тӧро «Большой ремонт» программая, калыклэсь кичӧлтонъёссэс улонэ пыӵатонъя ӵектосъёс улсын быдэстэм ужъёсты чаклаз, трос нылпиё семьяен тодматскиз, ивортэ элькун тӧролэн но кивалтэтлэн пресс-службазы.

«Точка роста» центрез Росси азьмуртэн Владимир Путинэн кичӧлтэм «Образование» йӧскалык ӵектос улсын усьтозы, солы инты висъямын ни. Центр куинь тодметъёсъя ужалоз: технология, информатика, ОБЖ. Отчы туала тӥрлык басьтозы, ӵектосъёсъя ужаны коворкинг амалэн интыос лэсьтозы, кытын медиазона но шахматэн шудон гостиной луозы.

Кылем арын «Большой ремонт» программая Юкаменск школалэсь кыкетӥ корпуссэ тупатъязы. Отын липетсэ воштӥзы, 100 выль укноос пуктӥзы, ву гумыосты тупатъязы. Коньывуонэ школалэн стадионаз ГТО-лэн куронъёсызлы тупась спортплощадка лэсьтӥзы.

Большой ремонт» борды басьтӥськыса, ми туж шонер лэсьтӥмы. Бен, уж туж трос. Трос коньдон кулэ. Но куке выль укноосын юртъёсты, пиналъёслэсь но дышетӥсьёслэсь шумпотэмзэс адӟиськод, валаськод, тупатъян ужъёсты нуны кулэ. Программа одӥг арлы гинэ чакламын ӧвӧл, кутскем ужез ми одно ик азьланьтом
Александр Бречалов, Удмуртилэн тӧроез

Со элькунын «Большой ремонт» программая 2019-тӥ арлы чаклам ужъёс ваньмыз сямен быдэстэмын шуыса пусйиз, нош кытын бадӟым ужъёс вал, соослэсь ог люкетсэс таиз арлы выжтӥзы.

Юкаменскын Александр Бречалов быдэс ёросысь дышетскисьёсын пумиськон ортчытӥз. Со элькунын дышетон удысэз азинтыны луонлыкъёс сярысь вераз, «Образование» йӧскалык ӵектос улсын 2020-тӥ арын Удмуртиын 42 «Точка роста» центр усьтозы шуыса ивортӥз. Тодэ вайытом, 2022-тӥ арозь элькунысь гурт ёросъёсын 157 «Будон интыос» усьтыны малпало.

«Засеково» муниципал кылдытэтын улосвыллэн тӧроез Жувам гуртысь тупатъям сюресэз эскериз. Калыклэн кичӧлтэмезъя отын Центральной урамез выльдӥзы. Ужъёсты быдэстыны ӝыны миллион манет пала кошкиз. Гурт поселение 112 сюрс манет пала висъяз, 300 сюр манет пала элькун сётӥз, 45 сюрс манет котыр асьсэос гуртоос люказы.

2019-тӥ арын «Инициативное бюджетирование» ӵектосъя ялэм вожвылъяськонэ 140-лсэь трос куриськонъёс вуизы, 83-ез вормисьёс пӧлы шедизы. Соос пӧлын – жувамъёслэн гуртысьтызы сюрессэс выльдонъя ӵектоссы

Нунал пумын Александр Бречалов Камки гуртысь Васильевъёслэн трос нылпиё семьязы доры вуылӥз. «Гурт интывылъёсты ялан азинтон» программая лэсьтӥськонлы 1 миллион манетлэсь трос субсидия басьтыса, 2018-тӥ арын семья выль коркаязы пыриз.

Михаил но Татьяна Васильевъёслэн семьязы ту тупаса, ог-огзылы юрттыса уло, пиналъёссэ пичи дырысенызы ужаны дышето. Коркалэн кузёез Андрей выныныз ӵош подсобной хозяйстовзэс азинто. Кылем арын Андрей Васильев «Агростартап» ӵектосын вормиз но сюро таза пудо будэтыны 1 миллион 855 сюрс манет грант басьтӥз.

Александр Бречалов пусйиз, элькун тӧрлыкъёс азьланяз но калыклэн кичӧлтонъёсызлы дурбасьтыны но пичи табышен улӥсь семьяослы юрттыны коньдон висъяны вань луонлыкъёсты кутоз.

Тодэ вайытом, кылем арня пумын Удмуртилэн тӧроез озьы ик Яр, Балезино ёросъёсы но Глазкаре вуылӥз. 



Наверх
Вниз