Ижкар+20 °C
8 -тӥ гудырикошкон 2020 Кӧснунал
16+

Туалазэ но куто, азьлозэ но уг вунэто: удмурт пиналъёслы «Ӟечбур!» газет 90 ар тырмонзэ пусйиз

  • 315
  • 0
Ижкар / Удмуртия
Туалазэ но куто, азьлозэ но уг вунэто: удмурт пиналъёслы «Ӟечбур!» газет 90 ар тырмонзэ пусйиз
Туспуктэм: Алексей Арзамасцев

Пиналъёс но быдэ вуымтэос понна удмурт кылын арнялы быдэ потӥсь «Ӟечбур!» элькун газет 10-тӥ толшоре 90 ар тырмонзэ пусйиз. Редакцилэн туала газет кылдытыны тыршемез, ужаз выльзэ кутэмез сярысь ивортодэтъя «Удмуртия» агентстволэн корреспондентэзлы газетлэн валтӥсь редакторез Надежда Лопатина вераз.

«Ӟечбур!» 1930-тӥ арын 10-тӥ толшоре потыны кутскиз. Солэн нырысетӥ редакторез Трофим Архипов луиз

90 ар ӵоже газет трос воштӥськонъёс пыр ортчиз. Вошъяськизы ужасьёсыз, вылтусыз, форматэз, буёлэз, воштӥськытэк кылиз валтӥсь малпанэз гинэ – пиналъёслэсь гожъяськыны мылкыдзэс будэтон.

Туала пиналъёсты бордазы кыскон понна газетын ужасьёслы мар гинэ малпано уг луы. Туала технологиосты но ужазы кутыны ӧдъязы ини.

Тани таяз выль номерамы куинь QR-кодэз пуктӥмы, соя пиналъёс милесьтым ужрадъёсмес адӟыны быгатозы. Одӥгезъя гуртэ уж сётӥмы, пиналъёс, телефоназы юромо программазы вань ке, отчы пырыса милесьтым доре сётэм ужмес шедьтозы но лэсьтозы шуыса оскиськом
Надежда Лопатина, «Ӟечбур!» газетлэн валтӥсь редакторез

Со сяна, берло дыре газетчиос ужрадъёсысьтызы видеороликъёс лэсьтыны кутскизы. Соосты «ВКонтакте», «Фейсбук», «Одноклассники» мерлыко вотэсъёсысь бамъёсазы поттало. Надежда Лопатиналэн кылъёсызъя, учкисьёссы ньыль сюрсозь но люкаськыло.

Редакциын ужасьёс пиналъёс понна асьсэлэсь геройзэс – Ӟечбурка нимо нылашез – малпазы. Солы нимысьтыз дэрем вуризы. Табере Ӟечбурка школаосы вуылэ но пиналъёсты шудон пыр «Ӟечбур!» газетэн тодматэ.

Нош эшшо огез вылез ужан амалзы – мерлыко вотэс пыр егитъёсын кусып возён. Озьы, редакциын ужась Светлана Ерёмина бадӟым классъёсын дышетскисьёс понна «Мон Ӟечбурысь!» огин кылдытӥз. 

Бадӟым классъёсын дышетскисьёс милесьтым заданиос басьто но «ВКонтакте» пыр Светаен ужало. Соос ваньзы «Мон Ӟечбурысь!» нимо футболкаос заказать карылӥзы. Кыӵе ке ужрадъёс дыръя соос соосты дӥсяло но асьсэ интыосазы ужало газетлы юрттон вылысь
Надежда Лопатина, «Ӟечбур!» газетлэн валтӥсь редакторез

Со группае пырись нылъёсты газетчиос волонтёръёс нимало. Нылашъёс ас ёросъёсазы газетэн тодматон, гожтӥськыны мылкыд ӝутон бордын тыршозы. Ар ортчыса, тужгес мыло-кыдооссэ кузьымъёсын пусъёзы.

Туала амалъёсын ужаса, ӟечбуръёс азьлооссэ но уг вунэто, уго газетэз кагаз вылэ поттоно, озьыен солы гожъяськисьёс но, гожтӥськисьёс но кулэ. 

Кылем арын асьме азямы ужпум пуктӥм вал пӧртэм ёросъёсын праздникъёс ортчытъяны. Марафон шуыса ми сое нимамы вал. Пӧртэм-пӧртэм ёросъёсын пиналъёсын пумиськылӥмы. Нырысетӥ люкетаз ми ортчытылӥмы сыӵе огъя праздник, милемлы 90 ар тырмоз шуыса. <…> Собере кыкетӥ люкетсэ ми ортчытъяськомы шулдыръяськон <…> юанъёсын, эктонъёсын, пӧртэм-пӧртэм заданиосын, отын пиналъёс пӧртэм кузьымъёс басьтыны быгато
Надежда Лопатина, «Ӟечбур!» газетлэн валтӥсь редакторез

Валтӥсь редакторлэн кылъёсызъя, сыӵе пумиськонъёс бере пиналъёс мыло-кыдогес гожъяськыны кутско, уго тросэз газетэз доразы уг басьто, мар гожтыны но уг тодо, нош пумиськонъёсын тодматскыса, мылкыдзы ӝутске.

Тани милям берло дыре Дэри ёросысь Сентег гуртысь гожъяськисьёсты туж пусъеммы потэ, собере Мартьянысь нылпи садысь покчиосты, отысь визьнодасьсы но, дышетӥсьсы но. Соос ноку но милемын кусып ӧз возьылэ, но куке ми Дэри ёрослы нимысьтыз номер поттӥмы, со номер бӧрсьы дас школаосысь пиналъёс сыӵе мыло-кыдо гожъяськыны кутскизы, коть котькуд номер соослэсь ужъёссэс пукты
Надежда Лопатина, «Ӟечбур!» газетлэн валтӥсь редакторез

Куд-ог дыръя вань лэзем ужъёссы газетэ уг но тэро, шуэ Надежда Лопатина. Сыӵе дыръя заметкаоссэс мерлыко вотэсъёсысь бамъёсазы поттыны тыршо. Но пиналъёс ужъёссэс газетэ ик поттэмзэс возьмало, уго отысь ас нимтулзэс адӟемзы потэ. Собере ужзэс асьсэлэн портфолио шуоназы но понэмзы луэ.

Пиналъёслэсь гожъяськемъёссэс, суредъёссэс поттэм сяна, газетын ужасьёс соос понна трос гинэ вожвылъяськонъёс ортчытъяло. Отчы покчиос туж мыло-кыдо пырисько. Тани али, Удмуртилэн кунлыкезлы 100 ар тырмонлы сӥзьыса, нимаз котькуд ёросъя викторина ортчыто.

Али Дэбес, Можга ёросъёсъя сётӥм ини, Сарапул ёросъя юанъёс сётыны мылкыд каризы ини. 100 арез вань ёросъёсъя викторина ортчытыса пумитаны мед быгатом
Надежда Лопатина, «Ӟечбур!» газетлэн валтӥсь редакторез

Надежда Лопатина бадӟым тау каре тужгес но мыло-кыдо ужась удмурт кылъя дышетӥсьёслы. Соослы луыса куд-ог школаосын пиналъёс быдэс классъёсын но газетлы гожтӥсько. 



Наверх
Вниз