Ижкар+20 °C
8 -тӥ гудырикошкон 2020 Кӧснунал
16+

«Вожодырен» шудыса пӧртмаськон вакытэз пумитазы Ижысь удмурт егитъёс

  • 321
  • 0
Ижкар / Удмуртия
«Вожодырен» шудыса пӧртмаськон вакытэз пумитазы Ижысь удмурт егитъёс
Туспуктэм: Марина Степанова

Ижкарысь Арт-резиденциын 13-тӥ толшоре «Вожодыр» турнирлэн йылпумъян шудонэз ортчиз. Ужрадэ ивортодэтъя «Удмуртия» агентстволэн корреспондентэз но пыриськиз.

Таиз шудон юромо вожояськон вакытлы тупатэмын вал. Туала дырпусъя со 7-тӥ толшорысен 19-тӥ толшорозь, Ымусьтонысен Йӧ вылэ султонозь ортче. Пыриськисьёслы но радъясьёс азьвыл ик курон пуктӥзы – ужрадэ пӧртмаськыса вуоно. Соин ик шудон ӝӧк сьӧрын та ӝытэ кинэз гинэ ӧй вал.

Ужрадэз «Юмок» театре ветлӥсьёс аспӧртэм, кӧшкемыт, пеймыт, сюлэмез юзыр-кезьыр карись перфомансэн кутскизы. Со возьматон ик быдэс ӝытлы мылкыд сётӥз. Шудонъёс вискын Алнаш ёросысь Байтэрег гуртысь нимысьтыз ӧтем Полина Куликова вань люкаськемъёсты аспӧртэм, ньылпуэн ческыт чаен куноятӥз.

Уй вуиз. Шудон кутскиз. Мыным, паймоно кадь, полуфиналын сямен ик, нырысь нош ик Палэсмурт луыны кылдӥз, нош бӧрысь Гурт калык луылӥ.

Та рад пыриськисьёс куронъёсын ӟеч тодмо вал ини, соин ик шудон но вӧй вылтӥ кадь ортчиз. Но Палэсмуртъёсты шедьтыны капчи ӧй вал, уго финалэ куинь полуфиналысь тужгес но кужмоосыз гинэ потӥзы, котькудзы кин луэмзэс усто ватыны быгатӥзы.

Шудӥсьёс куинь пол Палэсмуртъёсты шараяны выризы. Кыказ шудонын соос ӧз сётске. Огаз – Гурт калык кужымзэ возьматӥз.

Денис Максимов, огез шудӥсь, таӵе удмурт «Мафия» туж кельышлы шуыса пусйиз.

Удмурт калыкен шудӥськод, удмурт сямен вераськиськод. Со туж тунсыко. Таӵе ужрадъёсты ортчытъяно ӵемгес, малы ке шуоно та тунсыко шудон. Особенно сыӵе калыкен, визьмо калыкен, трос калыкен, бадӟым компаниен
Денис Максимов, «Вожодырен» шудӥсь

Ужрад вожояськон вакытлы туж тупа шуыса мукетыз шудӥсь Анастасия Сергеева вераз.

Котькудӥзлэн аслаз малпанэз, кызьы ортче. Пичи дыръямы ми ветлӥськом вал пӧртмаськыса калык дортӥ. Мыным со тунсыко потэ вал. Али мон бадӟымгес ини, и тазьы калык пӧлын мадиськыны, вераськыны, мон понна али со туж матын
Анастасия Сергеева, «Вожодырен» шудӥсь

Анастасиялы та шудонын тужгес но удалтӥз шуыны луоз. Полуфиналын но йылпумъясь люкетын шудонъёсты чакласа, солы куать пол Палэсмурт луыны кылдӥз.

Мон кӧня шудылӥ ӟученыз, мыным ноку но Мафия луыны ӧз шедьылы. Мон весь Гурт калык луисько вал. Нош татын удмурт-а мар-а со шуыса. <…> Но со фантастика, что мыным куать пол шедьылӥз Палэсмурт. <…> Мон туж шумпотӥсько татчы шеди шуыса
Анастасия Сергеева, «Вожодырен» шудӥсь

Шудонэз огез радъясь но «Вожодырез» нуись Вадим Крестьянинов быръем шудӥсьёссы туж кельшизы шуыса пусйиз.

Мыным та ӝыт сыӵе уютной, атмосферной, семьяен пукон порма вал кадь потӥз
Вадим Крестьянинов, «Вожодырез» нуись

Шудонъёс бере радъясьёс, куспазы кенешыса, куинь вормисьёсты шараязы. Куинетӥ интыез Денис Максимовлы сётӥзы. Сое Чукиндэр гадьпусэн пусйизы. Кыкетӥ луиз Анастасия Сергеева. Солы Елена Миннигараевалэсь «69 ар ортчыса, яке Кытчы кошко дэймонъёс?» книгазэ кузьмазы. Нош нырысетӥ интыез Максим Агафонов басьтӥз. Солы валтӥсь кузьым - нырысетӥ инты басьтӥсьлы шуыса юромо поттэм выль дизайнэн «Вожодыр» шудон.

«Вожодыр» турнирлэн финалэз

16 фото

Азьланяз радъясьёс ар ӵоже тазьы ик шудонъёс ортчытъяны, нош вуоно арын вожодыре тужгес кужмооссэ финалэ ӧтьыны чаклало. Вормисьлы валтӥсь кузьым – киысь кие выжись Палэсмуртлэн статуэткаез луоз. Сое Ижысь усточи Софья Чузова лэсьтӥз.



Наверх
Вниз