Ижкар+2 °C
28 -тӥ коньывуон 2021 Покчиарня
18+

Брангуртысь песянайёсын пуктэм черкез 20-тӥ инвожое вӧсялозы

  • 504
  • 0
Бураново / Удмуртия
Брангуртысь песянайёсын пуктэм черкез 20-тӥ инвожое вӧсялозы
Фото: Григорий Фомин

Брангуртысь песянайёсын пуктэм черкез 20-тӥ инвожое вӧсялозы. Со сярысь ивортэ Сарапулысь епархилэн пресс-службаез.

Выль черк пуктэмын кырӟась песянайёсын гастрольёс дыръя люкам коньдонэн, озьы ик юрттэт сётӥзы вань мылкыд карисьёс.

Лэсьтӥськон улэ нырысетӥез из понэмын вал 2011-тӥ арын, нырысетӥез служба ортчиз 2015-тӥ арын. Пӧртэм каръёстӥ но кунъёстӥ ветлон дыръя коллективлы трос мудоръёс кузьмазы, али соос выль храме интыямын. Кылсярысь, песянайёслэн Матроналэн чудотворной мудорез вань.

Фото: vk.com/b_babushki

Песянайёс трос пол вераллязы, соос черк пуктыны мылкыдъёсын кырӟаны кутскизы шуыса.

«Милесьтым ӵем юало, мар каромы ми черкез пуктэм бере, ветломы-а гастрольёсын? Мон верасько: «Ум, ум ветлэ. Кырӟаломы асьме храмын, отын кырӟасьёслы балкон лэсьтэмын, но черкогуртысьтымы клубын. Чылкак дунтэк», — вераз одӥгаз интервьюын коллективлэн кивалтӥсез Ольга Туктарева.

Нялтас вераса, черкез лэсьтон капчиен ӧз мыны. Нырысетӥзэ фундаментэз 2012-тӥ арын лэсьтӥзы, но сое выльысь тупатъяно луиз. Лэсьтӥськонлы 20 миллион манет пала кошкиз.



Наверх
Вниз