Ижкар+27 °C
12 -тӥ пӧсьтолэзь 2020 Воскресенье
16+

«Культурная мозаика Удмуртии» вожвылъяськонэ куриськонъёсты кутон кутске 1-тӥ южтолэзе

  • 897
  • 0
Ижкар / Удмуртия
«Культурная мозаика Удмуртии» вожвылъяськонэ куриськонъёсты кутон кутске 1-тӥ южтолэзе

1-тӥ южтолэзе Удмуртиын пичи каръёсысь но гуртъёсысь мерлыко но лулчеберет ӵектосъёсты азинтон вылысь малпам «Культурная мозаика Удмуртии» вожвылъяськонэ куриськонъёсты кутон кутске. Со сярысь элькун тӧролэн но кивалтэтлэн пресс-службазы ивортэ.

Вожвылъяськонэ сиён-юонъя, крезьгуръя, мувылтусъя фестивальёс, театр гастрольёс, пыдын экскурсиос, выльысь улӟытэм киужъёс, усьтэм лыдӟиськонъёс, дышетон программаос, адӟытонъёс но мастер-классъёс пыриськыны быгато. Ӵектосэз быдэстонэ одно ик интыын улӥсьёс кыскемын луыны кулэ, со одӥгез валтӥсез курон.

Куриськонъёсты кутон 20-тӥ южтолэзе йылпумъяськоз

Вожвылъяськон Можга но Камбарка каръёсын, озьы ик 26 гурт ёросъёсын ортчоз. Вормисьёсты экспертъёслэн кенешсы быръёз. Полуфиналэ потэмъёслэсь лыдметсэс 28-тӥ южтолэзе шараялозы, собере кыкетӥ люкетэ потэмъёс, ӵектосъёссэс йылаз-пумаз вуттон понна, дышетон семинарез ортчозы.

Вормисьёсты 14-тӥ оштолэзе вералозы. Соос троссэ 500 сюрс манет басьтозы. Со сяна, мукет улосвылъёсысь лулчеберетъя центръёсын стажировка ортчыны быгатозы.

Ӵектосъёсты улонэ пыӵатон туэ куартолэзьысен 2021-тӥ арысь тулыспалозь мыноз

29-тӥ тулыспалэ Ижкарын лулчеберет сярысь «Неформат» конференци улсын вожвылъяськонэн нимлыко тодматон, озьы ик вуоно пыриськисьёс понна семинар радъяськоз. Ужрад Калык творчествоя элькун юртын 10 часысен 13 часозь ортчоз.

«Культурная мозаика Удмуртии» элькун кивалтэт но Елена но Геннадий Тимченкоослэн ӟечлэсьтон фондзы юрттэмен ортчытӥське. Вожвылъяськон сярысь чӧлсконпусъя рос-просгес тодыны луоз.

2020-тӥ арын вожвылъяськонэз Удмуртиысь лулчеберетъя министерство, йӧскалык политикая министерство, «Сообщество» фонд но коммерци луисьтэм «ДондыДор» огазеяськон Тимченкоосэн фондзы юрттэмен радъяло.

Тодэ вайытом, Удмуртилэн тӧроез Александр Бречалов но Тимченкоосэн фондзылэн Чаклась кенешезлэн кивалтӥсез Ксения Франк лулчеберет но спорт ӵектосъёсъя валче ужан сярысь тупанкыл гожтӥзы. 2020-тӥ арын ӵектосъёсты быдэсъяны 20 миллион манет пала висъялозы. 



Наверх
Вниз