Ижкар-1 °C
29 -тӥ коньывуон 2020 Покчиарня
18+

Нылкышно мотоциклистъёслы сӥзем пумиськон ортчоз Ижкарын

  • 872
  • 0
Ижкар / Удмуртия
Нылкышно мотоциклистъёслы сӥзем пумиськон ортчоз Ижкарын
Туспуктэм: Кузебай Герд нимо йӧскалык музейлэн пресс-службаез

Нылкышноослэн калыккуспо нуналзы азьын, 5-тӥ южтолэзе, Ижкарысь Кузебай Герд нимо йӧскалык музейын «Нылкышно мотопробегъёс кунлэн историяяз» («Женские мотопробеги в истории страны») пумиськон ортчоз. Ужрадэ 1976-тӥ арын кыкетӥ нылкышно мотопробеге пыриськем кышномуртъёс лыктозы. Со сярысь ужъюртлэн пресс-службаез ивортэ.

Кунамы нырысетӥез нылкышно мотопробег ӵапак Ижкарын кутскиз. 1936-тӥ арын 15 нылкышноос Ижкарысь мотоцикл поттонъя кун заводын бичам «ИЖ-7» мотоциклъёсын 10 нунал ӵоже Ижкар-Москва сюресэз ортчизы

40 ар ортчыса, 1976-тӥ арын, «ИЖмаш» завод, кытчы мотоцикл поттонэз выжтӥзы, кыкетӥзэ нылкышно мотопробегез радъяз: Ижкар – Ковров – Минск – Киев – Ижкар. Та рад кышномуртъёс али гинэ конвейерысь васькем «ИЖ Планета Спорт», «ИЖ Планета - 3», «ИЖ Юпитер - 3» мотоциклъёсын сюрес вылэ потӥзы. Мотопробегзы 15 нунал кыстӥськиз, со пӧлысь 11 нуналзэ – жаль зориз.

Ӵапак со мотопробеге пыриськемзы, нырысетӥ мотопробегысь нодъясьёссы сярысь асьсэос нылкышноос вералозы. 

Озьы ик пумиськонын нырысетӥ мотопробеге пыриськем Мария Шкляевалэн – лапегеныз сэрен быдэссэ сямен сюрессэ бензобак вылын пуконо луэм нылкышнолэн – нылыз но луоз. Со анаезлэсь туспуктэмъёсын синпель альбомзэ ваёз, сыӵе бичетъёс 1936-тӥ арын мотопробеге пыриськем котькуд нылкышнолэн вал.

Пумиськонлэн программаез:

  • 1936-тӥ арын ортчем Ижкар – Москва нырысетӥ нылкышно мотопробеглэн историез;
  • 1976-тӥ арын ортчем кыкетӥ нылкышно мотопробеге пыриськисьёслэн тодэ ваёнъёссы;
  • Ижкар – транзит. XXI даурысь нылкышно мотопробегъёс.

Пумиськон «Мотоцикл ИЖ: история, инженерия, спорт, культура» музей лекториез усьтоз.

Ужрадэ пыриськисьёс «Ижевские мотоциклы» адӟытонэз учкыны быгатозы. Пумиськонэ вань мылкыд карисьёсты ӧтё. Кутсконэз – 18 часын. Дуныз: мӧйыослы – 60 манет, льготая – 40 манет.

Тодэ вайытом, та дыре Удмуртиысь Кузебай Герд нимо йӧскалык музейын Быдӟым Вормонлы 75 ар тырмонлы сӥзем «Я расскажу вам о войне» адӟытон (6+) ужа.



Наверх
Вниз